Search form

MANEUTNYI 11

Ahangka Kinpāha Yip Lanòh I Aikup Tö Môsös

1Ngaich ngö ṙô ngam Mā Tēv tö Môsös, Hĕngtöre öp plēk kahëtö Chu min i kui Fërō, i kui Aikup inrē ngaich unôichngöre min angā-aṅ nö hökngen yīö kiröönngöre ṙā-ang hih: ip hē ò min nö hökngen yīö kiröönngöre hankanringhöiny öp min tö yīö ṙòkhöre ṙā-ang ihih. 2Vëhet elnang yip tarik töngamuh, hökngen cha inrē nö kö havëkö kūö tarik öp hol ò, kikānö inrē ip hol ò, tö rupīö yanöṅtö, humlum inrē yanöṅtö. 3Ngaich ngam Mā Tēv nö kētö neukhö yik tarik nö i kūö yik aṅ Aikup. Ngaich inrē ngam tarik Môsös nö tökiröng nö im panam Aikup, nö i kūö yik kūön alaha Fërō i kūö yik tarik inrē.

4Ngaich ngö ṙô Môsös, Ngö ṙô an ngam Mā Tēv, Ip chūöl hatööm Chin min kiröön ellōn Aikup: 5Ngaich ṙòkngöre vah yip lanòh min im panam Aikup nö kapah, löktökuö öp lanòh Fërō öp amūichhak nö el kantēra rācha, söl ip lanòh öp kūön alaha ò kikānö öp lamārit öp kinṙīöt atra; ṙòkhöre nup lanòh inrē. 6Keuheūtngöre chūök min im panam Aikup öp yöng pineūnyö, öt töasā-avö min nö sā e, ötrēhĕn min nö hēktöre tö sā e. 7Lā in yip kūön Israĕl pöri min öthĕng nòng am kumchalnyö litākre, nö i tarik hēk i töṙeūla inrē: Hòṅ yīö akahalōn tö inrīkngöre tī ngam Tēv tö aṅ Aikup, Israĕl inrē. 8Ṙòkhöre vē kūön alaha meh min nö yihtöre nö in Chu ngaich sōntöre nö in Chu: nö ngö ṙô, Kē-ĕngre man ngaich, ṙòkhöre inrē më tarik Meh më tamömrit Meh, Möl chū-ö min kirönngöre ngaich angā-aṅ nö ṙā-ang in Fërō nö kirööngöre tanānyö. 9Ngaich ngö ṙô ngam Mā Tēv tö Môsös, Öthō öp Fërō min nö hang ṙô meh; Hòṅ në pinngangkūö tī Chu nö ṙūölöre ṙòken nö im panam Aikup.

10Tītö në pinngangkūö nā Môsös nā Aròn nö i kūö Fërō; Hangëngö ellōn Fërō pöri ngam Mā Tēv, ngaich öthalöngngen yip kūön Israĕl angā-aṅ nö kiröönngöre nö ṙāngö panam ò.

Nicobarese Bible

© 2014 Bible Society of India

More Info | Version Index