Search form

MANEUTNYI 26

Inrūkui Ngam Mā Tēv (Inrūkui Maneutnyi)

(Man 36.8-38)

1Ane inrē me-eṅ min vī öp inrūkui nö söömö ranang ël tö hilā; nö tö hīölö kinpātö nö linen, tölingūṅ, tököinyö nganāvömat, laturë inrē, vī-i u me-eṅ min nö aṅ mat tö kërup nö vahī yip tömilichngen huneū-en tarik. 2Nët anāi hëvhöre sumkôngö min rôta öp töhĕng ranangkūö hilā, fën sumkôngö (12 Mitör) inrē ṙôktāk öp töhĕng ranangkūö hilā: ṙòkhöre min nup ranangkūö hilā nö hēngö kinlaha ṙôktāk. 3Taneūi nup minranangkūö hilā nö taphen höö taseū nö in höö, ngaich inrē nup tö taneui ranangkūö hilā min nö taphen höö taseū nö in höö. 4Vī chūök yanòh pömchö min tö tölingūṅ i taseū öp hĕng ranangkūö hilā tö nup töt löinyö ta-īö ip tanapkūö; ngaich ngö tī inrē me-eṅ min öm vī-iti i taseū ngam ranangkūö hilā, ngam lā uk im innëtö tanapkūö. 5Taneui anāi vahī man min tö chūök yanòh ip töhĕng ranangkūö hilā, taneui anāi vahī man min tö chūök yanòh i taseū ap ranangkūö hilā im innëtö tanapkūö; kö lā-alre min nup chūök kūö yanòh nö in höö. 6Ane inrē taneui anāi vahī me-eṅ tö humlum kinvòkngö kūö, ngaich tap nup ranangkūö hilā nö in höö tö nup kinvòk: ngaich höng hĕng min öp inrūkui.

7Vī ranangkūö pömchö tö sanôi pököre nö rūkui ngam inrūkui: kahuksīön nup ranangkūö vahī meh min in u. 8Lūöi anāi sumkôngö (13 Mitör) rôta min öp töhĕng ranangkūö, fën sumkôngö (2 Mitör) min inrē ṙôktāk öp töhĕng ranangkūö: hĕngre kinlaha ṙôktāk min minë tö kahuksīön ranangkūö. 9Tap nup tö taneui me-eṅ min inrūkui nöng anū-ö nyöre, ane inrē nup tö tafūöl ranangkūö nöng anū-ö nyöre, ngaich hachap tö kūö ngam rūkui. 10Taneui anāi vahī min me-eṅ tö chūök kūö yanòh i taseū öp töhĕng ranangkūö öp lā uk takô im tanapkūö, taneui anāi chūök kūö yanòh i taseū öp ranangkūö ngam lā uk takô im innëtö tanapkūö.

11Taneui anāi vahī min me-eṅ tö mās kinvòkkūö, ngaich kavòktö kūö nup kinvòk nö el nup chūök yanòhkūö, ngaich taptö ngam rūkui nö in höö, hòṅ e nöng hĕng. 12Ngaich öp tö kalöla tö ōtre ranangkūö ngam rūkui, öp tö ōtre tö ròngti im rūkui, kilölhak min nö lā rit ngam inrūkui: 13Ngam tö hĕng sumkôngö im tö hĕng lā, ane inrē ngam tö hĕng sumkôngö im tahëng lā, ngam tö ōtren nö i rôta minë ranangkūö ngam rūkui, kilölhaka min nö i kaha ngam inrūkui lā muh inrē, nö hanyatngö e. 14Ngaich me-eṅ min inrē vī kinṙul tö kui ngam rūkui tö uk kōiny sīṅp nö hangāvö mat, ranup tö kui e inrē nö lā tulöng tö uk kapëông.

15Ngaich me-eṅ min inrē vī savaich ngam inrūkui tö sittim chōn nö ansökö. 16Söm sumkôngö (4 Mitör) min rôta öp tö hĕng savaich hĕng sumkôngö (99 Sentimitör) ròngti ṙôktāk öp tö hĕng savaich. 17Nëtö inheūṅngö min öp tö hĕng savaich, asonghötvö kūö nö in höö: ngati tī me-eṅ min vī nup savaich ngam inrūkui nö ṙòkhöre. 18Vī nup savaich ngam inrūkui min me-eṅ, nët anāi savaich ngam lòhngö nö kū-ö tö lòhngö. 19Fën anāi vahī min me-eṅ tö rupīö löp rööntö nup tö nët anāi savaich, nët löp i röön tö öp tö hĕng savaich nö chūök nup tö nët inheūṅngö ò, nët löp inrē i röön tö öp tahëng savaich nö chūök nup tö nët inheūṅngö ò. 20Im innët lā kaha ngam inrūkui, nö lā kapā, nët anāi savaich; 21Nup rupīö inrē löp u fën anāi; nët inrē löp i rööntö tö hĕng savaich, nët inrē löp i rööntö öp tahëng savaich. 22Lā rit ngam inrūkui lā sūng vī savaich me-eṅ min nö tafūöl. 23Vī savaich me-eṅ min inrē nët i minë sinkeukngö rit ngam inrūkui. 24Ngaich anū-ö min inrē nö hachāpö nö lā taṙeūḵ, ngaich ngatī inlahen min anū-ö nö ṙòkhöre söl lātulöng nö pōktöre kūö: ngaich anū-ö min nö kö chehen u nyöre; anū-ö min mi-i minë tö nët sinkeukngö. 25Hëvhöre min nup savaich, tö nup löp u min inrē rupīö, tafūölsīön nup löp i rööntö tö hĕng savaich, nët löp inrē i rööntö öp tahëng savaich.

26Vī kinrān pömchö tö sittim chōn: taneui i nup savaich ip tö hĕng lā kaha ngam inrūkui. 27Taneui nup kinrān nup savaich im tahëng lā kaha ngam inrūkui, taneui nup kinrān nup savaich i kaha ngam inrūkui, nö i ngam lā rit e lā sūng. 28Ngaich ngam lā ṙat kinrān ellōn minë savaich nö tufunnyukūö min. 29Ngaich me-eṅ min lūöp nup savaich tö humlum, vī chanit u inrē tö humlum i kaha nup kinrān: lūöp nup kinrān me-eṅ inrē tö humlum. 30Ngaich me-eṅ min asöklö ngam inrūkui sā inmeukhö mat meh i kui ngam rôngö.

31Vī ranangkūö pömchö inrē tö tö vai hilā tölingūṅ, tö köinyö nganāvö mat, laturë inrē: vī-i u me-eṅ min nö aṅ mat tö kërup nö vahī yip tö milichngen huneū-en tarik: 32Ngaich me-eṅ min seūlö u i nup tö fën machööḵlö sittim chōn tö lūöpö tö humlum, humlum min inrē nup kinvòkkūö u, i nup tö fën rupīö löp. 33Ngaich me-eṅ min seūlö ngam ranagkūö nö i nup kinvòk, ngaich in e kēhöt ngam kasòng minkahngö kanô-en el ngam ranangkūö: ngaich ngam ranangkūö min nö haköhngen meh tö ngam töhet chūök nö i hôi ngam tölngö töhet. 34Ngaich me-eṅ min ṙātö ngam anūichö miṙēlōn i kui ngam kasòng ngam tökô-en inmeuktö el ngam tölngö töhet chūök. 35Ngaich ṙātö ngam mīs min me-eṅ lā uk öp ranang kūö, ngam chūök rööntö manyaṅk inrē ranghö öp mīs nö i kaha ngam inrūkui nö lā lòhngö; ngaich ṙātö ngam mis me-eṅ min nö lā kapā.

36Vī innyatngö ngam inkūp ngam rūkui pömchö, tö tövai hilā, tölingūṅ, tököinyö nganāvö mat, laturë inrē, nö vahīṙen yip chamôktö mirun tö ta-īö. 37Taneūyö vahī pömchö tö machööḵlö sittim chōn chūök nup innyatngö, lūöpö u tö humlum; humlum min nup kinvòk kūö u: ane inrē min me-eṅ taneūyö vahī tö löp u tö mās.

Nicobarese Bible

© 2014 Bible Society of India

More Info | Version Index