Search form

MANEUTNYI 35

Chöngö Kīnëken Ngam Anôilö

1Ngaich Môsös nö hamūl yik ṙôngö kūön Israĕl nö ṙòkhöre, ngaich ngö ṙô tö cha, Në nun ṙô në hachöngten ngam Mā Tēv, nö kahëken yīö. 2Tafūöl sumkam min la-en nö kēkaṙen, im sinātö pöri sakāmö töhet angū-ö sakāmö nö in meh, anôilö nö haneūheu tö hayīchö i ngam Mā Tēv: kumpaha min öp kamëken la-en hē e. 3Keuheūtngöre chūök elyöngö yīö öt tōttökūö tameūyö yī-ö öi el anôilö.

Nup Tökētu Im Töhët Inrūkui

(Man 25.1-9)

4Ngaich Môsös nö vë-ekūö yik ṙôngö kūön Israĕl nö ṙòkhöre, nö ngö ṙô, Angū-ö ön ngih hachöngten ngam Mā Tēv, nö ngö ṙô, 5Kēḵ in re yin tö tökētu im Mā Tēv: öp töng hōḵolōn, hökngen ò nö kētö e, nö tökētu nö i ngam Mā Tēv; humlum, rupīö, mās inrē; 6Tölingūṅ, tököinyö nganāvö mat, laturë, tövai hilā, sanôi pököre inrē; 7Uk kōiny kūön sīṅp töhangāvö mat, uk kapëông, sittim chōn inrē; 8Tavī-i ëāṅvö, tötahūsa hol tavī-i incham, tinhuslö lōpān inrē; 9Ònik ihong, ihong inrē tö haṙākö ip efòt, ip lanak elngòh inrē.

Lanënën Ngam Inrūkui Ngam Mā Tēv

(Man 39.32-43)

10Kö yihtöre yip yēḵ tarik in yīö yip tö-akahaṙa ellōn, nö vī nup töhōtuṙen tö ngam Mā Tēv; 11Ngam rūkui inmūlö ngam rūkui e, tö ngam kinṙul tö kui e inrē, kinvòk kūö e, machööḵlö, löp e inrē; 12Ngam kasòng, nup kaneun e inrē, ngam anūichö miṙēlōn, tö ngam ranangkūö inrē; 13Ngam mīs, nup kaneun e inrē, ṙòkhöre nup chehen e, töhet ròtī inrē; 14Ngam chūök rööntö manyaṅk inrē nö chūök ëāṅvö, nup chehen e, nup ëāṅvö e, tavī-i ëāṅvö inrē; 15Tö ngam tahāklö lōpān, nup kaneun e, ngam tavī-i incham, tötahūsa lōpān, innyat kūö inkūp inrē im inkūp ngam rūkui inmūlö; 16Ngam tahāklö töföngö tökētu, töp tö sā mat inhāṅl mās e, kaneun e, nup chehen e, ngam chūök sanöich öp lā kūö e inrē; 17Nup ranangkūö ngam el milūkö, nup machööḵlö e, nup löp u, öp ranangkūö inkūp ngam el milūkö, 18Nup tumnôkö ngam rūkui inmūlö, nup tumnôkö ngam el milūkö, tö nup tökuvaha u inrē; 19Nup tö vāyö vinī-i inyut, hē el mineukṙen el ngam töhet chūök, nup töhet inyut Āròn öp Kūönṙô, nup inyut yip kikōnyö kūön ò, nö el chūök Kūönṙô.

Kumtö Nup Kahëtöre Tarik

V. 20-29

20Ngaich ṙòkhöre yip ṙôngö kūön Israĕl nö kiröönngöre, nö ṙā-ang i kūö Môsös. 21Ngaich cha-a nö yihtöre, ṙòkhöre yip töharuhka ellōn, ṙòkhöre yip tövīhötvö ellōn nö hōḵ, ngaich kētö nup tökētu nö i ngam Mā Tēv, nö i la-en ngam rūkui inmūlö, i nup la-en e inrē nö ṙòkhöre, i nup töhet inyut inrē. 22Yihtöre cha-a ngaich, hĕnghöre kikōnyö kikānö inrē, sā tumtak i yip tö hōḵ-olōn, ngaich kētö pin, kinlöl nang, kinlong, merkul, ṙòkhöre humlum yanöṅtö; ṙòkhöre yip tarik nö kētö humlum nö tökētu nö im Mā Tēv. 23Ṙòkhöre inrē tarik, yip tö aṅhaṅv in tö tölingūṅ, tököinyö nganāvö mat, laturë, tövai hilā, sanôi pököre, uk kōiny sīṅp töhangāvö mat, uk kapëông, nö kētu tö cha. 24Ṙòkhöre yip kamëtö rupīö mās inrē nö tökētu nö kumtö u nö i ngam Mā Tēv: ṙòkhöre tarik tö aṅhav-in tö sittim chōn tö vanīten nö ip la-en e, nö kēten u. 25Ṙòkhöre yik kikānö tö akahaṙa ellōn nö aṅtī tö kuntīre nö kupāt ngaich kētö nuk kupātre cha-a, tölingūṅ, tököinyö nganāvö mat, laturë, hilā inrē tövai. 26Ṙòkhöre inrē yik kikānö tö haruhlöng alaha tö ellōnre nö i mikah nö kupāt sanôi pököre. 27Ngaich yik mākūö inrē nö kētö ònik ihong, ihong inrē töhaṙākö, nö ip efòt, lanak elngòh inrē; 28Tötahūsa, tavī-i inrē; tavī-i ëāṅvö, tavī-i incham inrē, lōpān inrē tinhuslö. 29Ngaich yik kūön Israĕl nö kētö kanahanglōn tökētu nö i ngam Mā Tēv; ṙòkhöre kikōnyö kikānö inrē, yip tö vīhötvö ellōn nö hēk nö kētö nup mi-im la-en, nup ahōtö ngam Mā Tēv nö vī-i nö lökten eltī Môsös.

Tösalōhen Vamīrūkui Ngam Mā

(Man 31.1-11)

30Ngaich ngö ṙô Môsös tö yik kūön Israĕl, Yĕh meuk, minë-enyu ṙô an ngam Mā Tēv nö havëken Pisalël öp kikōnyö kūön Urī, ök kikōnyö kūön Hör, aṅ i miyöngö Yūtā; 31Ngaich anga-aṅ nö hatööḵlen ò tö ma-alaha aṅ im Tēv, i mikah, mikah elmat, inkaha i tökeuheūttöre mihëṅṙö inrē tövī-i; 32Ane inrē vī insā nup tömilichngen la-en, vinī-i humlum, rupīö, mās inrē, 33I ṙinatö ihong tö vīhötvö, i kin-īpö chōn inrē, i vinī-i nup tö ṙōl mihëṅṙô tömilichngen vinī-i. 34Ngaich anga-aṅ nö vīhöt ellōn ò pòn hōten ò nö haköphöti, anga-aṅ, Oholiāp inrē, öp kikōnyö kūön Ahisamak, aṅ i miyöngö Tën.

35Acha-a hatööḵlö ellōn ò tö mikah, nö vī tökeuheūttöre mihëṅrö vinī-i, kam-ip, tömilichngen vinī-i inrē, chamôktö mirun, i laturë, i tövai hilā inrē, in yip kumpāt, in cha inrē yip vamī insā tömilichngen vinī-i.

Nicobarese Bible

© 2014 Bible Society of India

More Info | Version Index