Search form

MANEUTNYI 36

1La-evṙen nap min nā Pisalël nā Oholiāp, ṙòkhöre inrē tarik tö-akahaṙa ellōn, yip tökēhötvö ellōn tö ngam Mā Tēv tö mikah, mikah elmat inrē nö huveū-en nö vī nup la-en nö ṙòkhöre el ngam töhet chūök, nö sā inchöngten u tö ngam Mā Tēv.

Ṙōlmihëṅ Ṙö Kahëtī Tarik

2Ngaich havëten Pisalël ang Môsös Oholiāp inrē, ṙòkhöre inrē tarik tö-akahaṙa ellōn yip tökēhötvö ellōn tö ngam Mā Tēv tö mikah, ṙòkhöre yip maharuhkö ellōnre nö yihtöre nö im la-en nö vī-i e. 3Ngaich in Môsös cha-a nö kēḵ nuk tökētu nö ṙòkhöre, nuk kahëtö yik kūön Israĕl nö i la-en ngam töhet chūök, nö vī-i u. Ngaich hēk cha-a nö kētö nup kanahanglōn tökētu nö in ò öt hĕng hang pumheū-euṅ. 4Ngaich ṙòkhöre yik tö-akaha tarik, yik töla-evṙen tö nuk la-en el ngam töhet chūök, nö yih nö ṙā-ang i nuk vahīṙenre; 5Ngaich vë-ekūö Môsös cha-a, nö ngö ṙô, Yahlö ṙôken tī yin vē tarik nö kētö tövī-i la-en, ngam tövī-i hachöngten ngam Mā Tēv. 6Ngaich kētö Chöngö ang Môsös, ngaich cha-a nö hōten e nö ahangnyu nö keuheūtngöre chūök nö el ngam elyöngö, nö ngö ṙô, Un tariku un rēhĕn kikānö tö hēk nö la-evṙen nö i nup tökētu el ngam töhet chūök. Tahaiṙen ngaich yik tarik nö kē-ĕti. 7Pò nuk in cha chehen nö ngaich nö kô-òre nö i nuk la-en nö ṙòkhöre tövī-i, yahlö ṙôken inrē.

Vi-nīlö Inrūkui Ngam Mā Tēv

(Man 26.1-7)

8Ṙòkhöre inrē yik tarik tö akahaṙa ellōn in cha yik tö vahī-envö nö sömö vahī tö hilā ranangngökūö ngam rūkui inmūlö; tö tövai hilā, tölingūṅ tököinyö nganāvö mat, laturë, nö aṅ mat tö kërup vahīṙen tömilichngen vahī anū-ö. 9Ngih tö hĕng hilā ranangkūö nët anāi hëvhöre sumkôngö rôta, fën sumkôngö ṙôktāk ngih tö hĕng hilā ranangkūö: höng hēngö kinlaha ṙôkö nup hilā ranangkūö.

10Taptu nup tö taneui hilā ranangkūö nö in höö tö ò: ane inrē nup tahëng tö taneui hilā ranangkūö taptu nö in höö tö ò. 11Ngaich anga-aṅ nö vī chūök yanòhkūö tö tölingūṅ nö i taseū ngam tö hĕng hilā ranangkūö nö lā uk ngam raneh tanaptö kūö: ngati tī anga-aṅ nö vī nö i taseū ngam hilā ranangkūö ngam lamā uk takô im innëtö tanaptö kūö. 12Taneui anāi vahī anga-aṅ i tö hĕng hilā ranangkūö tö chūökkūö yanòh, taneui anāi vahī inrē anga-aṅ nö i taseū ngam hilā ranangkūö im innëtö tanaptö kūö: kamlö minë chūökkūö yanòh nö in höö. 13Ane inrē anga-aṅ taneui anāi vahī tö humlum kinvòk, ngaich taptö kūö minë hilā ranangkūö nö in höö tö minë kinvòk; höng hĕng ngaich ngam rūkui inmūlö.

14Ngaich inrē anga-aṅ nö vī ranangkūö ngam rūkui i kui ngam rūkui inmūlö tö sanôi pököre; kahuk sīön nup ranangkūö tövī-i tö ò. 15Lūöi anāi sumkôngö öp tö hĕng ranangkūö; höng hēngö kinlaha minë tö kuhuk sīön ranangkūö. 16Ane inrē anga-aṅ hatapkūö nup tö taneui ranangkūö tö höö, ane inrē hatapkūö nup tö tafūöl ranangkūö tö höö. 17Ane inrē anga-aṅ taneui anāi vahī tö chūökkūö yanòh nö i taseū öp ranangkūö öp lā uk takô ip tanaptö kūö, ane inrē taneui anāi vahī anga-aṅ tö chūökkūö yanòh i taseū öp ranangkūö öp lā uk takô im innëtö tanapkūö. 18Ane inrē anga-aṅ taneui anāi vahī tö mās kinvòk nö tanaptö kūö ngam rūkui nö in höö pò e nö hōtu nö hĕng. 19Ane inrē anga-aṅ vī uk kōiny sīṅp töhangāvö mat nö kinṙultö kui ngam rūkui, lā tulöng inrē ök uk kapëông kinṙultö kui.

20Ngaich vī nuk savaich ngam rūkui inmūlö anga-aṅ tö sittim chōn, nö asökö. 21Söm sumkôngö rôta tö hĕng savaich hĕng sumkôngö ròngti inrē tö hĕng savaich. 22Kö anëtö inheūngkūö öp tö hĕng savaich, ngaich kuṙōlhötvö kūö nö in höö: ngati tī anga-aṅ nö vī nuk savaich ök rūkui inmūlö nö ṙòkhöre. 23Vī nuk savaich ök rūkui inmūlö anga-aṅ; lā lòhngö, nö kū-ö tö lòhngö nët anāi savaich: 24Fën anāi vahī anga-aṅ tö rupīö löp nö i rööntö minë tö nët anāi savaich, nët löp i rööntö öp tö hĕng savaich chūök nup tö nët tö-aheūngö in e, nët inrē löp i rööntö öp tahëng savaich nö chūökkūö nup tö nët tö-aheūngö in e. 25Im innët lā kaha ngam rūkui inmūlö, lā kapā, nët anāi vahī anga-aṅ tö savaich 26Tö nup rupīö löp u fën anāi; nët löp i rööntö öp tö hĕng savaich, ane inrē nët löp i rööntö öp tahëng savaich. 27Vī savaich anga-aṅ inrē tafūöl lamā rit ngam rūkui inmūlö nö kū-ö tö la sūng. 28Vī savaich anga-aṅ inrē nët nö mī-i sinkeukngö ngam rūkui inmūlö, nö lā rit. 29Ngaich anū-ö nö hachāpö röönti, ngaich ngatī anū-ö nö söl lā tulöng nö hĕngö chūökkūö töp töchuvī-ël; ngati tī anga-aṅ tö u nyöre; i minë tö nët sinkeukngö. 30Ngaich hëvhöre nuk umuh savaich, tö nuk rupīö löp u, tafūöl sīön, kö kö anëtö löp ngih tö hĕng savaich nö i rööntö re.

31Ngaich vī kinrān u anga-aṅ tö sittim chōn; taneui i nup savaich tö hĕng lā im rūkui inmūlö, 32Taneui inrē kinrān nup savaich im tahëng lā kaha ngam inrūkui, taneui inrē nup kinrān ngam rūkui inmūlö nö lā rit kū-ö tö lā sūng. 33Ngaich anga-aṅ inrē nö vī öp lā ṙat kinrān nö tufuni nö ellōn nup savaich löktökūö im tö hĕng manā-angkūö söl im tahëng. 34Ngaich lūöp nuk savaich anga-aṅ tö humlum ngaich vī nuk töchuvī-ël chanit nö humlum nö chūök nuk kinrān, lūöp nuk kinrān inrē humlum.

35Vī rananglö anga-aṅ inrē tö tölingūṅ, tökööinyö nganāvö mat, laturë, tövai hilā inrē: aṅ mat tö kërup vahīṙen tömilichngen vahī. 36Fënö vahī anga-aṅ inrē tö sittim chōn machööḵlö, lūöpö anū-ö tö humlum: humlum nup kinvòk u; vī rūpīö anga-aṅ inrē, fën, löp u. 37Ane inrē anga-aṅ vī ranangngökūö inkūp ngam rūkui inmūlö tö tölingūṅ, tököinyö nganāvö mat, laturë, tövai hilā inrē, vahīṙen chamôktö mirun; 38Nup tö taneui machööḵlö inrē tö nup kinvòk u: lūöpö nup kui u tö humlum, humlum inrē nuk tachöklö u: mās inrē nuk tö taneui löp u.

Nicobarese Bible

© 2014 Bible Society of India

More Info | Version Index