Search form

MANEUTNYI 39

Vinī-i Chehen Alāha Kūönṙô

(Man 28.1-14)

1Vī tövai cha-a inyut tölingūṅ, tököinyö nganāvö mat, laturë inrē, nö inyut mineukṙen ngam töhet chūök, vī töhet inyut Aròn inrē; sā tinöölô Môsös tö ngam Mā Tēv. 2Vī efòt anga-aṅ tö humlum, tölingūṅ, tököinyö nganāvö mat, laturë, tövai hilā inrē. 3Röm nuk humlum cha-a nö ahööyö ngaich vī-i u nö lōt, nö vītu nö im tölingūṅ, im tököinyö nganāvö mat, laturë, tövai hilā inrē, vahiṙen tömilichngen vahī. 4Vītö nup elṙanôṙö e cha-a nö taphen höö: taptukūö anū-ö nö i nup tö nët taseū u. 5Ane inrē öp tömilichngen kinpātö sörplis, töhapālöng nö in e, nö sörplis e, nöng hĕng nö tö sā vinī-i e; nö humlum, tölingūṅ, tököinyö nganāvö mat, laturë, tövai hilā inrē; sā tinöölô Môsös tö ngam Mā Tēv.

6Ngaich cha-a inrē nö vī ònik ihong, lömhötvö nö el nup inlaphöt humlum, ka-īpö tö tösā kin-īpö kinlong minkahngö, sā minë-eny yik kūön Israĕl. 7Ngaich anga-aṅ nö vī-i u nö elranôṙö ngam efòt, nö ihong inköpkölōn tö yik kūön Israĕl; sā tinöölô Môsös tö ngam Mā Tēv.

Vinī-ī Lanak Elngòh

(Man 28.15-30)

8Ngaich anga-aṅ nö vī lanak elngòh, tömilichngen vinī-i, sā vinī-i öp efòt; nö humlum, tölingūṅ, tököinyö nganāvö mat, laturë, tövai hilā inrē. 9Fën mirëṙö angū-ö, vī ngam lanak elngòh cha-a nö hachāpö; ṙôktāk eltī (22 centimetre) öp rôta e, ṙôktāk eltī (22 centimetre) inrē öp ṙôktāk e nö hachāpö. 10Ngaich cha-a nö fën mitöökö hatöökti tö ihong nö in e: hĕng mitöökö sātis, tôpas, karpöngköl inrē im raneh mitöökö. 11Im innët mitöökö, hĕng safir, hĕng inrē taimön. 12Im linūöi mitöökö, hĕng chasin, hĕng akēt, hĕng inrē emetis. 13Im finën mitöökö, hĕng peril, hĕng ònik, hĕng inrē yaspis: el nup humlum anū-ö nö halaphötvö nö ip mitöököre. 14Ngaich nuk ihong nö nët sīön nö sā minë-eny yik kūön Israĕl, nuk minë-eny cha; sā nup tö ka-īpö ip kinlong minkahangö, keuheūtlöre anū-ö nö kö i minë-eny cha, yip tö nët sīön miyöngö. 15Ngaich vītö sayōk cha-a nö im lanak sā tökuvaha, nö tötkatĕhka humlum nö chuvīṙi-ël. 16Ngaich nëtö vahī cha-a tö humlum inlap, nët inrē humlum töchuvī-ël; ngaich vītö minë tö nët töchuvī-ël i minë tö nët nang ngam lanak elngòh. 17Ngaich inrē cha-a nö vīhöt minë tö nët töchuvī-ël humlum sayōk, nö i minë tö nët töchuvī-ël i nuk nang ngam lanak elngòh. 18Ane inrē cha-a vītö nuk tö nët inlap, i nup tö nët töchuvī-ël i minë tahëng nang e, ngaich vīlö u nö elranôṙö ngam efòt, nö lā kūö. 19Nëtö vahī cha-a tö humlum töchuvī-ël, ngaich vīten u nö i nup tö nët nang ngam lanak elngòh, ip taseū e, öp lā im efòt nö lā ël. 20Ngaich cha-a inrē nö nëtö vahī tö hulum töchuvī-ël, ngaich vīten u i nup tö nët elranôṙö ngam efòt lā ël, nö lā kūö e, röpta ip tanaptökūö e, i kui öp tömilichngen vinī-i tökupātö sörplis ngam efòt. 21Ngaich cha-a nö nyëktö ngam lanak elngòh i nup töchuvī-ël in e nö i nup töchuvī-ël im efòt nö aṅtī tö lēs tölingūṅ, pòn hōtö e nö kui öp tömilichngen kinpātö sörplis ngam efòt hòṅ ngam lanak elngòh inrē nö öt tayōla nö im efòt sā tinöölô Môsös tö ngam Mā Tēv.

Vī-i Mihëṅṙö Chehen Alaha Kūönṙô

(Man 28.31-43)

22Ngaich anga-aṅ nö vī tökiröng inyut ngam efòt, tö tökupātö, höng tölingūṅ nyöre; 23Mëngö ellōn ngam tökiröng inyut, sā manëngö vët inyut kumyung, holtö nyanëkngöre nö havīṙi im tömëngö in e, pòn sōtu angū-ö nö takaich. 24Ngaich cha-a nö vītö ṙòng anār i kui kinhôi ngam tökiröng inyut tö tölingūṅ, tököinyö mat, laturë, tövai hilā inrē. 25Vī kungkrū cha-a inrē tötkatĕhka humlum, ngaich vītö nup kungkrū i hôi nup ṙòng anār i kui nup kinhôi ngam tökiröng inyut nö vinngö, i hôi nup ṙòng anār; 26Hĕng kungkrū hĕng inrē ṙòng anār, hĕng kungkrū hĕng inrē ṙòng anār, i kui nup kinhôi ngam tökiröng inyut nö vinngö, nö ip mineukṙen lā tuhēt; sā tinöölô Môsös tö ngam Mā Tēv.

27Vī inyut Āròn cha-a inrē tö tövai hilā tökupātö, inyut yik kikōnyö kūön ò inrē, 28Vī tövai hilā inrē nö sapīöv, tövai hilā inrē nö yanöṅtö kui, pachūma inrē töngënö kalröön nö tövai hilā. 29Tövai hilā inrē sörplis, tölingūṅ, tököinyö nganāvö mat, laturë, vahī chamôktö mirun; sā tinöölô Môsös tö ngam Mā Tēv.

30Ngaich cha-a nö vī tömitāk im töhet sapīöv tö tötkatĕhka humlum, ngaich kūich nö i mat e, sā kin-īpö mat kinlong minkahngö, TÖHET NÖ IM MĀ TĒV. 31Ngaich cha-a nö kapòk tö lēs nö in e tö tölingūṅ, nö inköpngö e nö im sapīöv lā tulöng; sā tinöölô Môsös tö ngam Mā Tēv.

Kinheūten Minë La-en

(Man 35.10-19)

32Möl nö keuheūten minë la-en ngam inrūkui ngam rūkui inmūlö; ngaich yik kūön Israĕl nö keuheūten nö asā tinöölô Môsös tö ngam Mā Tēv, ngatī cha-a. 33Ngaich kētö ök inrūkui cha-a nö in Môsös, tök rūkui inmūlö, ṙòkhöre nup chehen e inrē nup kinvòk e, savaich e, kinrān e, machööḵlö e, tö nup löp e inrē; 34Tök kinṙulkui e inrē uk kūön sīṅp töhangāvö mat, tök uk kapëông inrē kinṙulkui, tök innyatlö inrē ranangkūö: 35Tök kasòng ngam tökô-en inmeuktö, tö nuk kaneun e, tök anūichö miṙēlōn inrē; 36Tök mīs, ṙòkhöre nuk chehen e, tö nuk töhet ròtī inrē: 37Tök töhet chūök rööntö manyaṅk, tö nuk ëāṅvö e, nuk ëāṅvö tö halēntu nö haṙākö, nup chehen u inrē, tavī-i ëāṅvö inrē; 38Ök humlum tahāklö, incham tavī-i inrē, tötahūsa lōpān, innyatkūö inkūp ngam rūkui inmūlö; 39Tök mās tahāklö ök mās inrē tö sā mat inhāṅl ël e, nuk kaneun e, tö nuk chehen e nö ṙòkhöre, tök sanöich, rööntö e inrē; 40Nup ranang ök elmilūkö tökilölhaka, machööḵlö e, löp e inrē, tök innyatngö ngam lökhöt elmilūkö, nuk tökuvaha e, tö nuk tumnôkö e inrē, ṙòkhöre inrē nup chehetī i la-en ngam inrūkui, chehetī inrē i la-en ngam rūkui inmūlö; 41Nup inyut mineukṙen el ngam töhet chūök tövāyö vinī-i, nuk töhet inyut Āròn inrē nö Kūönṙô, nuk inyut yik kikōnyö kūön ò inrē, nö meukṙen nö el chūök Kūönṙô. 42Sā tinöölô Môsös tö ngam Mā Tēv anū-ö nö ṙòkhöre, ngati tī yik kūön Israĕl tö nuk la-en. 43Meuk nuk la-en ngaich Môsös nö ṙòkhöre, ngaich meūkö cha nö keuheūten tö e; sā Chöngö ngam Mā Tēv, ngatī tī cha-a: ngaich hakôlò u ang Môsös.

Nicobarese Bible

© 2014 Bible Society of India

More Info | Version Index