Search form

LA-EN LĒVĪ 19

Chöngö Īm Hanëtö Tö Ngam Inkāha Fālen

1Ngaich ngam Mā Tēv nö vë-ekūö Môsös, nö ngö ṙô, 2Vë-ekūö yip ṙôngö kūön Israĕl nö ṙòkhöre, ngö ṙô tö cha, Het yin min: pò Chu Chū-ö Tēv yīö töhet öich Mā Tēv. 3Kö pa-ekūö yin min tö kikānö yöngre, kikōnyö yöngre inrē, ane inrē haköp në töhet sakāmö Chu: Chū-ö Chin Tēv yīö Öich Mā Tēv. 4Uh yin havöötökūöre i insātēv ui vī vët nö insātēv yīö: Chū-ö Chin Tēv yīö Öich Mā Tēv.

5Yē yīö kētö inlām tökētu im Mā Tēv, kētö e yī-ö hòṅ yīö hōḵovö. 6Nyā-aṅyö min angū-ö im sakāmö yīö kētö e huṙöich inrē, ngaich yĕn tö-ōtrevö nö söl im linūöi sumkam, föngi min angū-ö nö i kūö tameūyö. 7Ngaich yē e nö nyāka el ngam linūöi sumkam, töchōich angū-ö; öt hōḵovö an min angū-ö: 8Yip nyamā-aṅ e min kö keun tököölre, pò ò nö hachōichngö ngam töhet aṅ im Tēv: ngaich anga-aṅ min tarik nö rökiṙen nö ṙā-ang i yip tarik ò.

9Yē yīö uvòhlö nup taneūchre im panam, ui keuheūtlöre tī uvòhlö nup lā nang ngam taṙeūḵ meh, um rēhĕn hamūl nup pintu-en yip mahamūl 10Um hamūl pintu-en yip mahamūl el panô-òṅ vāin meh; ṙāḵngö u më-eṅ lumnöörö yāich lumnööṙö aṅ tahëng inrē: Chū-ö Chin Tēv meh Öich Mā Tēv.

11Uh yin ulāyö; uh rēhĕn öi michūḵṙen, ui minyôiny in höö. 12Ui chūöku ṙô inrē i minë-eny Chu öi minyôiny, öp lökten meh hachōichngö minë-eny ngam Tēv meh: Chū-ö Chin Mā Tēv.

13Uh man hakihten holre, uh rēhĕn ulāingen ò: un köp nö in meh nö hĕng mitööm nö söllö peuheū nup raneushö yip töhaṙāyö nö kūönkūö meh. 14Um rūttö öt inkôlò i töthang, um rēhĕn ṙāḵtö kinvē-ĕre i tötmeuk, pa-ekūö pöri më-eṅ tö ngam Tēv meh: Chū-ö Chin Mā Tēv meh.

15Uh man tī tö tötchip im inkaha fālen: uh man atölten yāich, um rēhĕn milēḵṙen töp tarik tökirööngö chöngö: im chanīpen pöri öm akah fālen ngam holre. 16Uh man havöt inrē sā sumlô nyā-aṅ i vē tarik meh: um rēhĕn sökhak lā-al i mahām öp hol meh: Chū-ö Chin Mā Tēv.

17Uh man kunyāṅha ellōn ip makalaha meh: lahëḵ man vëkö öp holre, uh pöri öm keun tökööl tö pòkūö ò. 18Uh man havāhalre, um lanīnuvö i yip kūön yip tarik meh, hāngenlōn pöri më-eṅ tö holre sāre tö re, Chū-ö Chin Mā Tēv.

19Haköp në chöngö Chu yin min, Un höökiṙen nup nuā meh nö ṙōlkangen mahakūön tö kūön: um nëtkangen taheūchti tö kulöl el öp taṙeūḵ meh: um rēhĕn hayūtöre töp tö nët kangen kinpātö hilā nö katēhĕmat.

20Öp ṙamôlngöre nö i kikānö nö i lōn alaha, nö in öp kikānö töhakövö, öp tömikāhayö töp tö hòṅ pīhövö, öl pöri nö havaha ṙinānyi, ötrēhĕn nö kētu ṙinānyi; sācha min chā-a; öt kumpaha chā-a, pôm kikānö nö töhakövö. 21Ngaich ngam kikōnyö min nö kētö tökētu kūö tökööl nö im Mā Tēv, nö i kūö inkūp ngam rūkui manūlö, hĕngnòng öp kūön sīṅp tökētu kūö tökööl. 22Ngaich ngam Kūönṙô min nö vī inlām tökööl ò nö aṅtī tö ngam kūön sīṅp tökētu kūö tökööl nö i kūö ngam Mā Tēv kūö ök tökööl ò ök lahūölken ò: ngaich möl anga-aṅ min nö aṙēlöng tökööl tö ök lahūölken ò tökööl.

23Hē yīö min yih ip panam, ngaich ṙōl mihënṙö taheūichti tö chōn nö nyā-aṅkūö, ngaich kaheuk nup ṙòng min yī-ö nö sā töttunyīnyi, lūöi samyeūheu min anū-ö nö sā töttunyīnyi nö in yīö, öt nyā-aṅ min angū-ö. 24Im finënö samyeūheu pöri ṙòkhöre nup ṙòng min nö töhet, nö tökētu nöinyö ngam Mā Tēv. 25Im tinneūyö samyeūheu yī-ö min nyā nup ṙòng u hòṅ u min nö ṙūölöre ṙôken nö in yīö: Chu-ö Chin Tēv yīö, Öich Mā Tēv.

26Uh yin kāḵ nup tö mahāmu: ui rēhĕn kēken milūönö, uh rēhĕn chòng alaha. 27Ui chuvīngö lā taseū lā kuire, um rēhĕn kamöpngö lā taseū sanôi ngam samā meh. 28Um ṙatnyö alahare nö lālö kupah, um rēhĕn vītö mirun alahare: Chū-ö Chin Mā Tēv.

29Un hachōichi ngam kūön meh kikānö nö vītuṙen nö inyihköre; hòṅ ngam panam min nö öt höng mi-inyihkö kikānöre, ngaich tööḵlö min ngam panam tö ötlanöökö. 30Haköp në töhet sakāmö Chu yin, milēḵṙen töm töhet chūök Chū-ö Chin Mā Tēv.

31Ui havöötökūöre in cha yip mameuk ma-alaha, un rēhĕn i yip tömilūönö; un chöhö cha-a tö yīö, öi hòṅ hachōichngöre tö tī cha: Chū-ö Chin Tēv meh Öich Mā Tēv meh.

32Söklöre man i kūö öp töpakū-uv kui, milēḵṙen inrē tö tököiny tarik, pa-ekūö inrē tö ngam Tēv meh: Chū-ö Chin Mā Tēv meh.

33Yē öp aṅ tahëng nö rahëichtaṙen nö iyöng in meh im panam meh, un hayëḵe tö meh.

34Öp aṅ tahëng tö rahëchtaṙen nö iyöng in meh sā töfötnyu anga-aṅ nö i patī nö in meh, hāngenlōn më-eṅ tö ò sāre töre; pò yīö misi i panam Aikup öi aṅ tahëng, Chū-ö Chin Tēv meh Öich Mā Tēv.

35Ui michūḵṙen i inkaha fālen, i kinlah rôta, i kinlah lumngan, i nyanūmö inrē. 36Töt hachūḵuiṙen kinlah lumngan nun anū-ö nö in yīö Öich Mā Tēv kamëḵnyen yīö ṙā-ang ap panam Aikup. 37Haköpkö në chöngö Chu yin nö ṙòkhöre, ṙòkhöre inrē në inkaha fālen aṅ in Chu, la-evṙen tö u: Chū-ö Chin Mā Tēv.

Nicobarese Bible

© 2014 Bible Society of India

More Info | Version Index