Search form

LA-EN LĒVĪ 22

Hanëtö I Minë Tökētu

1Ngaich ngam Mā Tēv nö vë-ekūö Môsös, nö ngö ṙô, 2Vë-ekūö Āròn tö yip kikōnyö kūön ò, hòṅ cha nö haköhngenre tö nup töhet aṅ in yip kūön Israĕl, nup ahetlö cha nö in Chu, hòṅ cha inrē nö öt hachōichngö ngam töhet minë-eny Chu: Chū-ö Chin Mā Tēv. 3Ngö ṙô tö cha, Öp aṅ i yip kūön meh i tumkölchap meh, öp yamihtöre nö i nup töhet, nup tö ahetlöngö nö im Mā Tēv tö yip kūön Israĕl, tö-aṅhav alaha tö kinvīöṙö, anga-aṅ min tarik törökiṙen nö i kūö Chu: Chū-ö Chin Mā Tēv. 4Öp tarik aṅ in yip kūön Āròn töyeūnyuvö, hēk töṙööchö alaha; öt nyā minë töhet min anga-aṅ, hanöng saha ò nö lööken. Öp lamūölkö tökuvīö tö kūö kupah, hēk öp tarik famöthöre. 5Hēk öp lamūölkö töṙeūla, öp lökngen ò nö kuvīö, hēk öp tarik lamūölkö kinvīöṙö nup töng sitih kinvīöṙö ò; 6Kuvīö min öp tarik anga-aṅ lamūölkö tökuvīö nö söl harap, öt nyā nup töhet min anga-aṅ yĕn öl nö vōk alahare tö mak. 7Yĕn meutti ngam tavūöi, ngaich het anga-aṅ; ngaich unôich anga-aṅ min nö nyā nup aṅ i töhet, pò e nö nyā-aṅkūö ò. 8Öp kanahngenre nö kapah hēk töchaṙus tö kūö töṙeūla, un kāḵ anga-aṅ nö hachōichngöre tö ò: Chū-ö Chin Mā Tēv. 9Lökten yin haköp ngam chöngö Chu, hòṅ yīö öt keun tökööl e, ngaich kapah in e, yē cha nö hachōichngö e: Chū-ö Chin Mā Tēv maha-etlen cha.

10Öt aṅ tahëngu min nyamā ngam aṅ i töhet: öt nyā ngam aṅ i töhet öp tarik öp Kūönṙô, öp törahëichtaṙen nö iyöng hēk öp töhaṙāyö kūönkūö; 11Yē öp Kūönṙô pöri nö havah tarik, nö ṙai tö rupīö ò, nyā-aṅ e an anga-aṅ; yip töfötnyu inrē nö i patī ò, nyā ngam nyā-aṅkūö ò cha-a min. 12Yē öp kikānö kūön öp Kūönṙô nö pīhövö tö aṅ tahëng, öt nyā-aṅkūö tö nup tökuvāilöng tökētu anga-aṅ aṅ i nup töhet. 13Yē öp kikānö kūön öp Kūönṙô pöri nö tafīösi, hēk tömayūri, rö-övö nö tökūönu, ngaich havan nö i patī öp yöngre kikōnyö, nö sāre ik nyinī-öre, nyā-aṅvkūö anga-aṅ tö nyā-aṅkūö ngam kikōnyö yöngre: hö-ö pöri öp aṅ tahëng nö nyā-aṅ e. 14Yē öp tarik nö nyā-aṅvkūö tö ngam aṅ i töhet nö öt akahtenre, ngaich anga-aṅ nö ṙāḵtö öp tinneui tit nö in e, ngaich kētö ngam töhet nö ip Kūönṙô. 15Uh yin nö hachōichngö ngam töhet aṅ in yip kūön Israĕl, ngam tökētu tö cha nö im Mā Tēv; 16Ngaich vīten cha nö keun tökööl öp tökumtö fālen, yē cha nö nyā-aṅvkūö tö nup aṅ in cha töhet: pò Chu Chū-ö Mā Tēv ma-ahetlen cha.

17Ngaich ngam Mā Tēv nö vë-ekūö Môsös, nö ngö ṙô, 18Vë-ekūö Āròn yip kikōnyö kūön ò inrē, ṙòkhöre inrē yip kūön Israĕl, ngö ṙô tö cha, Öp töng aṅ in Israĕl, yip kamëtö tökētu, yĕn pòrô öng nö kinlēḵngô cha nö tökētu, hēk kanāhanglōn cha nö tökētu, nö kahëtö cha nö im Mā Tēv nö töföngö tökētu; 19Hòṅ yīö öi hōḵovö, lökten öi kētö kōiny tötvāhav alaha, aṅ i kōiny nuā aṅ i kōiny sīṅp hēk aṅ i kōiny pököre. 20Öp tövāhav alaha pöri, anga-aṅ tö un kētu tö yīö; tön öt hōḵovö öp min nö tī yīö. 21Öp kamëtö tökētu nö inlāmö im Mā Tēv nö hateungngö öp kinlēḵngô, hēk öp kanāhanglōn tökētu, aṅ i nup töhĕng mihëṅṙö nö mūl hēk aṅ i nup töhĕng kiteūm, hòṅ öt rahëichyen vah alaha anga-aṅ möl nö töhōḵov; un rahëichyen vah alaha. 22Tö-ōho alaha, tövahav, tökiyöösu, un kētu anū-ö tö yīö nö im Mā Tēv, un rēhĕn nö kētu nö lökten i kūö tameūyö tö cha nö el tahāklö ngam Mā Tēv. 23Öp kōiny nuā hēk öp kōiny sīṅp tösaṙaklöngkūö alaha hēk sīṅp töhāṅtökūö alaha, kô-òren më-eṅ kētö tö ngatī nö i kanāhanglōn tökētu; uh pöri nö i kinlēḵngô, öt hōḵovö an min angū-ö. 24Öp töpanyāichö kulöl hēk tökiröichi kulöl hēk tö lakuk, hēk töfangngöre, un kētu tö yīö nö im Mā Tēv, uh yī-ö rēhĕn öi ngatī kahëti im panam yīö. 25Uh yī-ö rēhĕn kētö nyā-aṅkūö ngam Tēv yīö tö nup aṅ in yip tahëng mihëṅrö tarik, tön in u nup chanôichö cha, aṅhav in nup tö vah: öt hōkovö nup min nö tī yīö.

26Ngaich ngam Mā Tēv nö vë-ekūö Môsös, nö ngö ṙô, 27Yē öp kōiny nuā, hēk sīṅp, hēk pököre, nö rööchnyu, sat sumkam anga-aṅ min nö ip yöngre; löktökūö öp hinëvhöre sakāmö töhōḵovö min anga-aṅ nö tökētu nö im Mā Tēv nö lökten i kūö tameūyö. 28Yē ò nö kan nuā hēk kan nö sīṅp um ṙatnyö likeun ò töp kūön ò inrē nöng hĕng sumkam. 29Yē yīö kētö tökētu nö nöinyö ngam Mā Tēv, kēten e yī-ö hòṅ e nö töhōḵov. 30Nyā-aṅvkūö yī-ö tö e höng im sakāmö; ui ṙahātuvö tö e nö söllö peuheū; Chū-ö Chin Mā Tēv.

31Lökten yin haköp në chöngö Chu, la-evṙen inrē tö u: Chū-ö Chin Mā Tēv. 32Uh yin hachōichngö ngam töhet minë-eny Chu; tön tö hòṅ ahetlöng Chin in yip kūön Israĕl: Chū-ö Chin Mā Tēv ma-ahetlen yīö, 33Kamëḵnyen yīö ṙā-ang öp panam Aikup, Öich Tēv yīö: Chū-ö Chin Mā Tēv.

Nicobarese Bible

© 2014 Bible Society of India

More Info | Version Index