Search form

LA-EN LĒVĪ 6

1Ngaich ngam Mā Tēv nö vë-ekūö Môsös, nö ngö ṙô, 2Yĕn hĕng tak tököölö fālen, lūölken tanôichngen fālen inrē nö im Mā Tēv, michūṙen inrē nö i holre nö ip hayōmkenre, hēk ip kinlēḵngô hēk i unlāyö, hēk hakihten öp holre; 3Hēk ahūlen öp töchatngen, chūökuṙô inrē nö minyôiny-aṅ, in u anū-ö nö ṙòkhöre la-en ngòh tarik, köölö fālen nö in e: 4Ngaich angū-ö min, yē ò nö köölö fālen, ane inrē fāluṙen, ngaich anga-aṅ min nö havan tö öp ulāingöre; hēk taneūngen ò nö lökten i inkihten, hēk öp tökētu hayōmken ò, hēk öp töchatngen ahūlen ò, 5Hēk öp töchatngen ahūlen ò, nö minyôiny-aṅ; hateung ṙôken e min anga-aṅ nö havantö e, Ṙūötö ṙôken öp tinneui lā e min anga-aṅ inrē; ngaich kē-ĕkūö ò min anga-aṅ tö e öp töchëhevṙen, ip sakāmö hē ò nö kôti nö fāluṙen. 6Ngaich anga-aṅ min nö kētö öp kūö fālen ò tökētu nö im Mā Tēv, hĕng nòng kūön sīṅp aṅ i nup tö kiteūmhaka, töt vahavö sā ṙôken öp ṙāi ò tö lōn meh nö tökētu kūö fālen, nö ip Kūönṙô: 7Ngaich ngam kūönṙô min nö havëkö inlām tökööl ò, i kūö ngam Mā Tēv, ngaich aṙēlöngö min anga-aṅ; nö i nup töng sitih kahëken ò nup lökngen ò nö falūṙen.

Tö Nòngre Töföngö Tökētu

8Ngaich ngam Mā Tēv nö vë-ekūö Môsös, nö ngö ṙô, 9Tölṙô Āròn tö yip kikōnyö kūön ò inrē, ngö ṙô, Ngih ön chöngö nö im töföngö tökētu: el ngam tāng öp min nö i kui nup ngòh öp töföngö tökētu nö el ngam tahāklö nö hĕng mitööm söllö peuheū; öp tameūyö inrē el ngam tahāklö nö haköpö hanūṙö kūö. 10Ngaich öp Kūönṙô min nö hayutlöre töp linen inyutre, töp linen inrē töngënö kalröön pachūma hayutlöng min nö i alaha ò; ngaich anga-aṅ min inrē nö kēḵ öp tisum i chūök öp tameūyö nö ṙāpngökūö töp töföngö tökētu el ngam tahāklö, ngaich anga-aṅ min nö hōngtö u nö i kaha ngam tahāklö. 11Ngaich min anga-aṅ nö luhngö nup inyutre, ngaich hayutlöre tö tahëng, ngaich chātngö nup tisum nö el kahôyöm öp elyöngö ip töhet chūök. 12Ngaich öp tameūyö el öp tahāklö nö haköpö hanūṙö kūö nö ël e, sōtuṙen nö nyangngö; kaheuk peuheū min inrē öp Kūönṙô nö föngtö kūö ngòh nö ël e: ngaich hatöök nup töföngö tökētū min anga-aṅ nö ël e nö ṙātu, ngaich ël e nö föng tösangöö tökētu nö inlāmö. 13Haköpö min ngam tameūyö nöng iṙūöhö hanūṙö kūö nö el ngam tahāklö; sōtuṙen nö nyangngö.

Nyā-aṅkūö Tökētu

14Ngaich ngih inrē chöngö ip nyā-aṅ tökētu: kētö e min yip kikōnyö kūön Āròn nö i kūö ngam Mā Tēv, i kūö ngam tahāklö. 15Ngaich anga-aṅ min nö kēḵ öp töhĕng mi-el tī-i, aṅ im töfaṙëcha atra nyā-aṅ tökētu, aṅ ip tavī-i in e inrē ṙòkhöre nup tötahūsa lōpān nup i kui öp nyā-aṅ tökētu, föngö min angū-ö nö el öp tahāklö nö tötahūsa kumchik, nö sā inköpkölōn, nö im Mā Tēv. 16Ngaich nup chööḵṙen e min nö nyā-aṅ tö Āròn tö yip kūön ò inrē kikōnyö; nyā-aṅ min angū-ö ip töhet chūök nö öt holtö tö-aföhlöng: el milūkö öp rūkui manūlö cha-a min nö nyā-aṅ e. 17Öt kahūlö min angū-ö nö holtö inföhlö. Kētö e chin nö minchööḵ-ö cha aṅ i nup tökētu nö in chu nö lökten i kūö tameūyö; töhet an sā öp tökētu kūö tökööl, sā öp tökētu kūö fālen inrē. 18Ṙòkhöre kūö yip kikōnyö kūön Āròn nö nyā-aṅ e min. Lumnööṙö cha örheūheu i tumkölchap cha, nö aṅ i nup tökētu aṅ im Mā Tēv nö lökten i kūö tameūyö: het öp min töng lamūölkö u.

19Ngaich ngam Mā Tēv nö vë-ekūö Môsös, nö ngö ṙô, 20Tökētu ön ngih aṅ in Āròn tö yip kikōnyö kūön ò inrē, ngam kahëtö cha min nö i ngam Mā Tēv ip sakāmö hē ò nö hachāmö; ngam sinömö i töhĕng efā öp töfaṙëcha atra nyā-aṅ tökētu nö örheūheu, ròngti angū-ö tö peuheū, ròngtī inrē tö harap. 21El törah kunrālö min angū-ö nö vī-i nö holtö tavī-i; yē e nö sumlöng, kēhĕt e më-eṅ: kētö ngam nyā-aṅ më-eṅ tökētu ngam tökahūlö nö tötahūsa kumchik im Mā Tēv. 22Ngaich öp kūönṙô tö hachāmö min ṙënngen ò aṅ i yip kikōnyö kūön ò nö kētö e: lökten im tö-örheūheu chöngö angū-ö min nö keuheūtngöre nö haṙāpi nö im Mā Tēv. 23Ṙòkhöre inrē nup nyā-aṅ tökētu aṅ i Kūönṙô nö haṙāpi min nö keuheūtngöre: öt nyā-aṅ min angū-ö.

Tökētu Kūö Tökööl

24Ngaich ngam Mā Tēv nö vë-ekūö Môsös, nö ngö ṙô, 25Vë-ekūö Āròn tö yip kikōnyö kūön ò inrē, ngö ṙô, Angū-ö ön ngih chöngö im tökētu kūö tökööl: im chūök ngam töföngö tökētu nö ṙatnyu likeun ngam tökētu kūö tökööl min nö ṙatnyu likeun i kūö ngam Mā Tēv: tölngö töhet an angū-ö. 26Öp Kūönṙô kamëtö e, nö kūö tökööl, kāḵa e min: ip töhet chūök min angū-ö nö kāḵa, elmilūkö ngam rūkui manūlö. 27Öp töng sūöhtöre nö im alaha het mīnö: ngaich yē ngam mahām nö kichenytu, el ngam töhet chūök. 28Öp tanīöyö pöri chūök e nö sūmö likūkiyö min: pò e yĕn sūmö nö el mās tēksi ngaich kehngö nö i kaha e, ngaich söichi tö mak, 29Ṙòkhöre kūö yip kikōnyö aṅ in yip Kūönṙô nö kāḵa e min: tölngö töhet an angū-ö. 30Öt kāḵ-a min öp tökētu kūö tökööl, öp tökēhĕtvö mahām nö el ngam rūkui manūlö el ngam töhet chūök, nö vanī inlām tökööl: föngö an min angū-ö nö i kūö tameūyö.

Nicobarese Bible

© 2014 Bible Society of India

More Info | Version Index