Search form

LA-EN LĒVĪ 7

Tökētu Kūö Fālen

1Ngih ön inrē chöngö i tökētu kūö fālen: tölngö töhet an angū-ö. 2Ip chūök cha nö ṙatnyö likeun töföngö tökētu in e cha-a min nö ṙatnyö likeun ngam tökētu kūön fālen: ngaich kichënyö mahām min anga-aṅ nö el öp tahāklö nö vintakūö. 3Ngaich anga-aṅ min nö kētö nup tösangöö ò nö ṙòkhöre: ap tösangöö lamrit, tösangöö hanum ellōn ò inrē, 4Nup tönët elkilpong, tö nup ayū in u inrē nup i ṙat, töp tö-angūö inrē in öp alip, holtö nup elkilpong, nö kē-ĕyö min tö ò. 5Ngaich föngö u min ngam Kūönṙô el ngam tahāklö nö tökētu lökten i kūö tameūyö nö i ngam Mā Tēv: tökētu an angū-ö kūö fālen. 6Ṙòkhöre yip kikōnyö aṅ in yip Kūönṙô nö kāḵa e min: kāḵa min angū-ö nö el öp töhet chūök: tölngö töhet an angū-ö. 7Sā ngam tökētu kūö tökööl, ngatī ngam tökētu kūö fālen: höng hēngö chöngö nun anū-ö: öp Kūönṙô vamī inlām tökööl tö e, anga-aṅ tölööṙu tö e. 8Öp Kūönṙô kamëtö töföngö tökētu tö töng tarīka, anga-aṅ Kūönṙô min tö lumnööṙu töp uk ngam töföngö tökētu, ngam tökētu tö ò. 9Ṙòkhöre nup nyā-aṅ tökētu nup tökahūlö nö el chūök kinṙul, ṙòkhöre nup tövī-i nö el törah kunrālö, el törah kinṙūlö inrē, nö lumnööṙö ngam Kūönṙô ngam kamëtö e. 10Ṙòkhöre nup nyā-aṅ tökētu, tökalūöchö tö tavī-i hēk tönyô, lumnööṙö yip kūön Āròn nö ṙòkhöre, nö holkūöre.

Inlāmö Tökētu

11Ngih ön inrē chöngö nö i inlāmö tökētu, töp töhĕng tak kamë-eti nö i ngam Mā Tēv; 12Yĕn kētö e anga-aṅ nö nöinyö, ngaich anga-aṅ min nö kētö e nö holtö töt-aföhlöng pikoh kalūöchö tö tavī-i, töt-aföhlöng vēför inrē sôhò tö tavī-i, pikoh inrē tökalūöchö tö tavī-i, töfaṙëcha atra töhamākö. 13Holtö pikoh tī min anga-aṅ öp tö-aföhlöng ròtī nö kētö ngam kahëtöre im inlāmö nö nöinyö. 14Kökahëngö kahëti min anga-aṅ i nup tökētu nö tö hachônglöng tökētu nö im Mā Tēv; lumnööṙö ngam Kūönṙô min angū-ö ngam kumcheny mahām ngam tökētu inlāmö. 15Ngaich ngam alaha ngam tökētu tö ò im inlāmö tökētu nö nöinyö, kāḵa min ip sakāmö hē ò nö kēten ò; ötṙāka alaha anga-aṅ tö ò nö söllö peuheū. 16Yē ngam tökētu pöri nö minkahngö öp töchūöku kinlēḵngô, hēk yĕn tökētu nö kanahanglōn, ngaich kāḵa anga-aṅ min im sakāmö hē ò nö kētö ngam kahëtöre: ngaich im huṙöich nö kāḵa öp chööḵṙen. 17Yē ngam chööḵṙen ngam alaha pöri ngam tökētu nö ōtren im linūöi sumkam ngaich haṙāpi angū-ö nö i kūö tameūyö. 18Yĕn kāḵa im linūöi sumkam nup alaha ngam tökētu tö ò im lanāmö tökētu, öt hō-ovö min angū-ö, ötrēhĕn min nö kaheuktu nö in ò ngam kamëtö e: sinòkkūö min angū-ö, ngaich öp tarik kamāḵa e min nö keun tököölre.

19Ngaich öp alaha tö sūöhtöre nö i tökuvīö nö öt kāḵa min; haṙāpi min angū-ö tö tameūyö. Ngaich öp alaha, öp töhet nö kāḵa min. 20Öp tarik kamāḵ alaha ngam tökētu nö inlāmö, nö lamöö i ngam Tēv, nö töṙònghöichṙen nö kuvīö, anga-aṅ min tarik törökiṙen nö i yip tarik ò. 21Yĕn hĕng tak min lamūölkö tökuvīö, nup tökuvīö i tarik, hēk i töṙeūla hēk inup tökuvīö sinòkkūö, nö kāḵ alaha öp tökētu nö inlāmö, öp lamöö im Mā Tēv, rökiṙen min öp tarik anga-aṅ nö i yip tarik ò.

22Ngaich ngam Mā Tēv nö vë-ekūö Môsös, nö ngö ṙô, 23Vë-ekūö yip kūön Israĕl, ngö ṙô, Hö-ö yin kāḵ tösangöö kōiny nuā, tösangöö sīṅp hēk tösangöö pököre. 24Tösangöö öp kanahngenre nö kapah inrē, tösangöö öp töteūchö tö holre, i nup la-en tahëng nup anū-ö nö kēkaṙen: uh pöri yī-ö kāḵa e. 25Öp töng kamāḵ ta-öng öp töṙeūla, öp kahëtö tarik nö im Mā Tēv nö lökten i kūö tameūyö, öp tarik kamāḵa e rökiṙen min nö i yip tarik ò. 26Hö-ö yin inrē min kahā-av tö mahām, pòrô nö mahām hayöm hēk töṙeūla, el nup töng patī yīö. 27Öp töng kamāḵ mahām, anga-aṅ min tarik törökiṙen nö i yip tarik ò.

28Ngaich ngam Mā Tēv nö ngö ṙô, nö vë-ekūö Môsöss, 29Vë-ekūö yip kūön Israĕl, ngö ṙô,Ngòh kamëtö tökētu tö aṅ ip inlāmö tökētu tö ò nö i ngam Mā Tēv kēḵ töp kahëtöre min anga-aṅ nö im Mā Tēv aṅ ip tökētu tö ò inlāmö: 30Hakôtö tīre anga-aṅ min nö kētö nup tökētu nö i ngam Mā Tēv nö lökten i kūö tameūyö; öp tösangöö holtö öp elngòh nö kētu min tö ò, hòṅ ngam elngòh nö kuvāyö nö i kūö ngam Mā Tēv nö tökētu nö kuvāyö. 31Ngaich öp Kūönṙô min nö föng öp tösangöö nö el öp tahāklö: öp elngòh pöri min lumnööṙö Āròn tö yip kūön ò kikōnyö inrē. 32Ngaich öp lā hāmö kël min nö kētu tö yīö ip Kūönṙô nö töhatāyö nö tökētu aṅ i nup tökētu tö yīö, tökētu nö inlām. 33Anga-aṅ öp aṅ i yip kikōnyö kūön Āròn öp kamëtöp mahām öp tökētu inlām, töp tösangöö inrē, tölumnööṙu, min töp lā hāmö kël nö minchööḵö ò. 34Pò ngam elngòh tökuvāyö ngam kël inrē töhatāyö nö kē-ĕ tö chu i yip kūön Israĕl aṅ i nup tökētu tö cha, tökētu inlāmö, ngaich kētu anū-ö nö in Āròn öp Kūönṙô nö minchööḵö cha nö örheūheu nö aṅ in yip kūön Israĕl. 35Angū-ö ön ngih töhachāmö minchööḵö Āròn, töhachāmö minchööḵö yip kikōnyö kūön ò inrē, aṅ i nup tökētu nö i ngam Mā Tēv nö lökten i kūö tameūyö, ip sakāmö hē ò nö kēten u nö mineukṙen ngam Mā Tēv nö el chūök Kūönṙô; 36Nö hachöngten ngam Mā Tēv nö kētu nö in cha tö yip kūön Israĕl, ik sakāmö hē ò nö hacham alaha cha, lumnööṙö cha an nö tö-örheūheu i tumköl chap cha.

37Ngih ön chöngö im töföngö tökētu, im nyā-aṅ tökētu, im tökētu inrē kūö tökööl, im tökētu kūö fālen, ane inrē im inhetlö, im tökētu inrē kūö inlāmö; 38Ngam tinöölô Môsös tö ngam Mā Tēv i kui ap rôngö Sināi, ik sakāmö hē ò nö tölṙô yik kūön Israĕl nö kētö nup kahëtö cha nö el tönyaṅlnyi i Sināi.

Nicobarese Bible

© 2014 Bible Society of India

More Info | Version Index