Search form

LA-EN LĒVĪ 8

Vinīlen Hē Āròn Tö Yip Kikōnyō Kūön Ò

1Ngaich ngam Mā Tēv nö vë-ekūö Môsös nö ngö ṙô, 2Kē-ĕ Āròn tö yip kikōnyö kūön ò inrē nö hol ò, tö nup inyut, töp tavī-i incham inrē, töp kōiny nuā inrē tökētu kūö tökööl, tö nup tönët nòng kōiny kūön sīṅp, töp kuvôkö tötaföhlöng rôtī; 3Ngaich më-eṅ hamūl yip ṙôngö tarik i kūö inkūp ngam rūkui manūlö. 4Ngaich ngatī ang Môsös sā tinöölô ò tö ngam Mā Tēv; hamūlö ngaich yik ṙôngö tarik nö i kūö inkūp ök rūkui manūlö.

5Ngaich Môsös nö ngö ṙô tö yik ṙôngö tarik, Ngih ön hachöngten ngam Mā Tēv. 6Ngaich Môsös nö kēten Āròn tö yik kikōnyö kūön ò inrē, ngaich söichö cha tö mak. 7Ngaich anga-aṅ nö hayutlen ò tö inyut alaha, ngaich fūmlen ò tö fanūmṙat, ngaich hayutlen ò tök tökiröng inyut, ngaich hūötlö ök efòt nö in ò, ngaich fūmlö ṙat ò tök tömilichngen kinpātö sörplis ök efòt, ngaich ngatngö e nö in ò. 8Ngaich anga-aṅ nö vīlö ök lanak elngòh nö in ò: ngaich im lanak elngòh tī anga-aṅ tök Urim, Tumin (kinlāha minhôiṅyö) inrē. 9Ngaich anga-aṅ nö sumpīövlö ök sapīöv nö i kui ò; ngaich i kui ök sapīöv, lā kui tī anga-aṅ nö vītö ök tömitāk humlum ngam töhet sapīöv; sā tinöölô Môsös, tö ngam Mā Tēv.

10Ngaich Môsös nö kēḵ ök tavī-i incham, ngaich hacham ök rūkui manūlö tö nuk aṅ e inrē ngaich ahetlö u. 11Ngaich sat heuh tī anga-aṅ nö kicheny el ngam tahāklö, ngaich hacham el ngam tahāklö tö nup chehen e inrē, töp chūök sanöich öp rööntö e inrē, nö ahetlö u. 12Ngaich anga-aṅ nö ṙöhtö kui Āròn tök tavī-i incham, hachāman inrē, nö ahetlen ò. 13Ngaich Môsös nö kētö yik kikōnyö kūön Āròn, ngaich hayutlen cha tö inyut alaha, fūmlö fanūmṙat cha inrē, ngaich nyëktö yanöötö kui cha; sā tinöölô Môsös tö ngam Mā Tēv.

14Ngaich anga-aṅ nö kētö ök kōiny nuā tökētu kūö tökööl: ngaich Āròn tö yik kikōnyö kūön ò inrē nö ṙātö eltīre nö i kui ök kōiny nuā tökētu kūö tökööl. 15Ṙatnyö liḵeun ò anga-aṅ ngaich; ngaich kēḵ ök mahām ang Môsös, ngaich lūöptö e nö aṅtī tö kuntīre nö i kui nuk sinrōl ök tahāklö nö vinngö, nö ahetlö ngam tahāklö, ṙöstö ngam mahām inrē nö i rööntö ngam tahāklö, nö ahetlö e nö vītö inlām tökööl e. 16Ngaich anga-aṅ nö kēḵ nuk tösangöö aṅ ellōn, tök tö-angūö ök alip, tö nuk tönët elkilpong, tö nuk ayū u inrē, ngaich Môsös nö föngö e nö el ngam tahāklö. 17Ngam kōiny nuā pöri, töp uk ò, töp alaha ò, töp sôḵ ò, föngi tö ò nö i kūö tameūyö elkahôyö öp elyöngö; sā tinöölô Môsös tö ngam Mā Tēv.

18Ngaich kētö ök kōiny kūön sīṅp anga-aṅ töföngö tökētu: ngaich Āròn tö yik kikōnyö kūön ò inrē nö ṙāḵtö eltīre nö i kui ök kōiny kūön sīṅp. 19Ngaich anga-aṅ nö ṙatnyö likeun ò; ngaich Môsös nö kicheny tö ök mahām nö el ök tahāklö nö vinngö tī. 20Ngaich anga-aṅ nö rök ngam kōiny kūön sīṅp nö pinyënyö; föngngö ök kui ngaich Môsös, tö nuk töpinyënyö, tö nuk tösangöö inrē. 21Söich nuk aṅ ellōn ò anga-aṅ tö nuk kalröön ò inrē nö aṅtī tö mak; föng ngam kōiny sīṅp ngaich ang Môsös nö el ngam tahāklö nö nòngre: töföngö an anga-aṅ tökētu nö tötahūsa kumchik: tökētu an anga-aṅ nö i ngam Mā Tēv nö lökten i kūö tameūyö; sā tinöölô Môsös tö ngam Mā Tēv.

22Kētö ngam tahëng kōiny kūön sīṅp inrē anga-aṅ ngam kōiny kūön sīṅp inhetlö: ngaich Āròn tö yik kikōnyö kūön ò nö ṙāḵtö eltīre nö i kui ök kōiny kūön sīṅp. 23Ṙatnyö likeun ò ngaich anga-aṅ; ngaich Môsös nö kēḵ ök mahām, ngaich sòhtö e nö i rōi nang Āròn lā hāmö i inyöng kuntī ò inrē, i inyöng kunröön ò inrē lā hāmö. 24Ngaich kētö yik kikōnyö anga-aṅ kūön Āròn, ngaich Môsös nö sòhtö nam mahām nö i rōi nang cha lā hāmö, i inyöng kuntī cha inrē lā hāmö; ngaich Môsös inrē nö kichenytö ngam mahām nö el ngam tahāklö nö vinngö tī. 25Kēḵ nup tösangöö ngaich anga-aṅ, tösangöö lamrit inrē, ṙòkhöre inrē nuk tösangöö aṅ ellōn, tök tö-angūö ngam alip inrē, tö nuk tönët elkilpong, tö nuk ayū u inrē, tök lā hāmö kël inrē: 26Hēngö kahë ngaich anga-aṅ tö tötaföhlöng pikoh, hĕng inrē ök pikoh tö tavī-ivö rôtī, hĕng inrē vēför, nö ṙā-ang el ök kuvôkö tötaföhlöng rôtī, ök mī-i kūö ngam Mā Tēv, ngaich ṙāḵten u nö i kui nuk tösangöö, i kui ök lā hāmö kël inrē: 27Ngaich chaptö u anga-aṅ nö ṙòkhöre nö eltī Āròn, eltī yik kikōnyö kūön ò inrē, kuvāyö u ngaich nö i kūö ngam Mā Tēv tökētu nö tökuvāyö. 28Ngaich kē-ĕ u ang Môsös nö ṙā-ang eltī cha, ngaich föngö u nö el ök tahāklö i kui nuk töföngö tökētu: inhetlö nup tötahūsa kumchik: tökētu an angū-ö nö im Tēv nö lökten i kūö tameūyö. 29Ngaich Môsös nö kēḵ ök elngòh, kuvāyö e ngaich nö i kūö ngam Mā Tēv tökētu nö tökuvāyö: minchööḵö Môsös an angū-ö aṅ im kōiny kūön sīṅp inhetlö; sā tinöölô Môsös tö ngam Mā Tēv.

30Ngaich Môsös nö kēḵ nö ik tavī-i incham, ik mahām inrē el ök tahāklö, ngaich kichenytö e nö in Āròn, i mat inyut ò, i kui yik kikōnyö kūön ò inrē, i mat inyut yik kikōnyö kūön ò inrē in ò; ngaich ahetlen Āròn tö nuk inyut ò tö yik kikōnyö kūön ò inrē, tö nuk inyut yik kikōnyö kūön ò inrē in ò.

31Ngaich Môsös nö ngö ṙô tö Āròn tö yik kikōnyö kūön ò inrē, Sun ngam alaha i kūö inkūp ngam rūkui manūlö: kāḵa e in e, nyā minë rôtī inrē minë el ngam kuvôkö tö-ahetlöngö, sā tinöölô chu, ngih tö ngö, Ngaich min Āròn tö yip kūön ò inrē nö nyā-aṅvkūö tö e. 32Ngaich öp tö-ōtren im alaha, im rôtī inrē min nö föngiyö nö i kūö tameūyö. 33Öt kunyī-inyre yī-ö min ṙā-ang i kūö inkūp ngam rūkui manūlö sat hang sumkam, hanöng saha nup sakāmö inhetlö yīö nö keuheūten; pôn sat sumkam min anga-aṅ nö ahetlen yīö. 34Nö sā e ing töngamuh, ngatī ngam Mā Tēv nö chöngu tö e, nö vanī inlām tökööl yīö. 35I kūö inkūp ngam rūkui manūlö min yī-ö höngngöh hatööm sakāmö inrē sat sumkām, haköp chöngö ngam Mā Tēv, hòṅ yīö öt kapah: tön ngatī inchöngten chin. 36Ngaich Āròn tö yik kikōnyö kūön ò inrē nö ngatī i nup inchöngten tö ngam Mā Tēv nö lökten eltī Môsös:

Nicobarese Bible

© 2014 Bible Society of India

More Info | Version Index