Search form

KINṘEŪKÖ 9

Innëtö Chinööḵngö

1Ngaich ngam Mā Tēv nö vë-ekūö Môsös nö el inchōn i Sināi, ip raneh chingëṅt ngam innët samyeūheu unôichrit cha nö ṙāḵngö ngam panam Aikup, nö ngö ṙô, 2Hökngen yip kūön Israĕl inrē nö haköpken ngam Chinööḵngö ip hē ṙētak e. 3Im finën sīön sakāmö ngòh chingëṅt, tö harap, yī-ö min haköpken e, ip hē ṙētak e: sā nup chöngö in e nö ṙòkhöre, sā nup töngaich chöngö inrē nö ṙòkhöre, ngatī inlahen yī-ö haköpken e. 4Ngaich Môsös nö vë-ekūö yik kūön Israĕl, nö haköpkö ngam Chinööḵngö 5Im raneh chingëṅt cha-a ngaich nö haköpken ngam Chinööḵngö, im finën sīön sakāmö ngam chingëṅt, töharap, el inchōn Sināi: sā tinöölô Môsös nö ṙòkhöre tö ngam Mā Tēv, ngatī yik kūön Israĕl. 6Ngaich rīkre yik tarik umuh yik tökuvīö tökūö alaha tökapah tarik, lökten cha nö öt haköpken ngam Chinööḵngö im sakāmö angū-ö: ngaich yihtöre cha-a, im sakāmö angū-ö, nö i kūö Môsös, i kūö Āròn inrē: 7Ngaich ngö ṙô yik tarik tö ò Kuvīö in īhö kūö alaha tökapah tarik: lökten öi ngaich ha-uknyöre, öi öt kētö tökētu im Mā Tēv ip hē ṙētak e, nö in yip kūön Israĕl? 8Ngaich ngö ṙô Môsös tö cha, Ngöh yin; hòṅ chu hang chöngö ngam Mā Tēv tö inlahen yīö.

9Ngaich ngam Mā Tēv nö vë-ekūö Môsös, nö ngö ṙô, 10Vë-ekūö yip kūön Israĕl, ngö ṙô, Yĕn Tariku in yīö hēk inrē in yip tumkölchap yīö min tökuvīö tökūö alaha tökapah, hēk inrē marô-òlkūö kinröönngö, sönen anga-aṅ nö haköpkö ngam Chinööḵngö ngam Mā Tēv: 11Im innëtö chingëṅt im finën sīön sakāmö tö harap cha-a min nö haköpkö e; nyā-aṅ e cha-a min nö holkūö tö töt aföhlöng rôtī tö-angūṅövö inrē rōi chōn: 12Uh cha-a min nö ṙāngö chööḵṙen e söl im peuheū, un rēhĕn nö likölngö tangëḵ ò: sā nup chöngö ngam Chinööḵngö nö ṙòkhöre cha-a min nö haköpkö e. 13Öp tarik pöri töt kuvīö, öt kinröönngu inrē, ngaich rö-ö nö haköpkö ngam Chinööḵngö, anga-aṅ min tarik törökiṙen nö ṙā-ang i yip tarik ò: pòn öt kētö ngam tökētu anga-aṅ nö i ngam Mā Tēv im hē ṙētak e, keun tököölre min ngam tarik anga-aṅ. 14Yĕn hĕng tak öp aṅ tahëng tarik min nö iyöng in meh, ngaich haköpkö ngam Chinööḵngö ngam Mā Tēv min; ngaich sā ngam chöngö Chinööḵngö ane inrē sā ngam inchöngten e, ngatī inlahen anga-aṅ: höng hēngö chöngö yī-ö min, töp aṅ tahëng, töp töfötnyu inrē nö im panam.

Sā Mineukö Tameūyö Ngam Taṙul

(Man 40.34-38)

15Im sakāmö ngam inrūkui nö asöklöng ngaich öp taṙul nö hayattö kui ngam inrūkui, ngam rūkui minkahngö kanô-en: ngaich im harap angū-ö nö i kui ngam inrūkui nö sā mineūkö tameūyö, tölngö peuheū. 16Ngatī angū-ö nö örheūheu: hanyattö kui e ngam taṙul, ngaich sā mineūkö tameūyö tö hatööm. 17Ip hē ngam taṙul nö kē-ĕyö nö ṙā-ang i kui ngam rūkui, ngaich unôichrit e yik kūön Israĕl nö kiröönngöre: ip chūök ngam taṙul nö sökngöre, in e yik kūön Israĕl nö iyöngtöre. 18I chöngö ngam Mā Tēv yik kūön Israĕl nö kiröönngöre, ane inrē i chöngö ngam Mā Tēv nö iyöngtöre: sā rô-òten ngam taṙul nö i kui ngam inrūkui höngngöh cha-a nö iyöng. 19Yē ngam taṙul nö ṙōl sumkam nö ngöh nö i kui ngam inrūkui, ngaich yik kūön Israĕl nö haköp chöngö ngam Mā Tēv, nö öt kiröönngöre. 20Hēkpī ngam taṙul nöng haroh tum sumkam nö i kui ngam inrūkui; ngaich sā chöngö ngam Mā Tēv cha-a nöng ngöh nö iyöng, sā chöngö ngam Mā Tēv inrē cha-a nö kiröönngöre. 21Hēkpī inrē ngam taṙul nö löktökūö harap söl peuheū; ngaich yē ngam taṙul im peuheū nö kē-ĕyö, kiröönngöre cha-a ngaich: hēk inrē yĕn inṙūöhen tö sakāmö tö hatööm inrē, kiröönngöre cha-a hē ngam taṙul nö kē-ĕyö. 22Yĕn nët sumkam öre, hēk hĕng chumngëṅtö, hēk hĕng samyeūheu, ngam taṙul nö ngöh nö i kui ngam inrūkui, köp nö i kui e, ngaich yik kūön Israĕl nöng ngöh nö iyöng, öt kiröönngöre inrē: yē e pöri nö kē-ĕyö, ngaich kiröönngöre cha-a. 23I chöngö ngam Mā Tēv cha-a nö iyöng, i chöngö ngam Mā Tēv inrē cha-a nö kiröönngöre: haköp chöngö ngam Mā Tēv cha-a ngam chöngö ngam Mā Tēv lamöktö eltī Môsös.

Nicobarese Bible

© 2014 Bible Society of India

More Info | Version Index