Search form

1 Corintios 12

Yusuja Espiritura tuque mere ishu peadya peadya casa tyabarecuareque

1Micuanara ecue quirica cuadishachine patya micuanara bacadurachine Yusuja Espirituja casara casa tyayaque. Iyacua micuana cuejaya, micuanaja pana adeba aishu, micuana ecue eatsehuequi cuanaque. 2Caadebatiyadya micuana eje bucha anie icuene juhuaque. Jesús queja catyatima jarira tuque micuana ai cueya cueya ea cuanaque muihua. Cuji cuita juatsu tuque micuana ai cueya cueya ea cuanaque yusu jadya ahua. Micuanara muihua cuanara micuana ni ai buchique bamerehua ama; anama tuna. Ijahue atahua tibu tuque micuana muihua. 3Yusuja Espiritura bacue ecuana eisarau. Eje uma tuna juya: “Eratu quisarati aya Yusuja Espiritura cuejahuaque”, jadya tuna jubahue. Cuejaya micuana era eje bucha adebae ecuana eauque Yusuja Espíritu tsehueque, jadya ama juatsu aijama jadique. Yusuja Espirituja casa eque quisaratiya cuanaratu Jesúsja ishu jidama quisarati aya ama. Eje bucha ijillahuanae ni tunajatu Jesús ama. Tuja Espirituja casa eque quisaratiya cuanara cuita camadyatu quisarati aya: “Jesús tu Ique Cuatsashaquique” jadya. Yusuja Espíritu tsehue ama cuanaratu quisarati aya ama riyaque. Jadya adebataquietu ejeque Yusuja Espíritu eque quisaratiyaque, tuque eque ama quisaratiyaque jadya.

4Arepa bape bape casa Yusu mere ishu aniya ama bucha, peadya camadyatu aniya Etyaquique. Tuquetu Yusuja Espíritu. 5Arepa bape bape casa eque Yusu mere ishuque aniya ama bucha, peadya Ecuana Cuatsashaquique camadya tuque ecuana mereya. 6Arepa bape bape eque Yusu ecuanaju mere juya ama bucha, tumeque Yusu camadyadyatu mere juya ecuana peadya peadyaju.

7Peadya peadya cama tuja cuanaquetu Yusuja Espiritura tyaya casa Yusu cameremereti ishu. Jadya tyae tura ecuana aya, ecuana tuja biji eque ani ishu catsahuatibare ishu.

8Umaetu Yusuja Espiritura tyaya yunerique pana adeba aishu, tura cuitadya adebameretsu peya cuana cuejamere ishu. Peya cuanatu tyaya casa tuja quisarati jida ejitaju cueja, pana adebamere aishu. 9Peya cuanatu riyaque Espiritura casa tyaya eje bucha ataquima buchique quejeneti anitsu cuita camadya aishuque. Peya cuana tujatu casa tyaya ujejeda cuanaque chacha amere ishu. 10Umae cuanatu tyaya casa ni ejeque ecuitaja tuja tacaja ai ataquimaque aishu. Peya cuanatu casa tyaya Yusuja quisarati cueja ishu. Peya cuanatu tyaya casa ejeque Yusuja Espíritu eque mere juyaque, ejeque tuja casa equedya jutidya mere juyaque jadique adeba ishu. Peya cuana tujatu casa tyaya bape bape yana cuana eque quisarati ishu. Peya cuanatu casa tyaya ejeque yana eque quisarati ahuaque yatseja yana eque pana cueja aishu. Jadya tyae tura ecuana aya casa tuja Espíritu eque tuque mere ishu. 11Arepa bape bape meree Yusu ataquique aniya ama bucha, peadya Espiritura camadya ecuana tyaya casa jadya ishu. Turadya ecuana tyaya casa tuque cuitadya eje bucha cameremereticara juya eque ecuanaja Yusu mere ishu.

Yuhua cama ecuana cuita pidya buchique

12Peadya camadya tuque ecuanaja ecuita, arepa bape bape bucucu ishu cuanaque aniya ama bucha. Dutya ecuanaja ecuitaju bucucuyaratu peadya camadya ecuanaja ecuita yutaneya. Jadya ecuana Cristoja cuanaque. Yusura ecuana baya peadya camadya bucha tuatsehue, arepa ecuana umada paju ama bucha, arepa ecuanaja tuque bape bape meree aishuque aniya ama bucha. 13Dutya ecuana iyacuanetanahua tumeque Yusuja Espíritu eque, Jesús tsehue yuhuacama juishu. Dutya ecuana Jesús queja nimee tere juatsu, Yusura ecuana cuita pidya camadya baya. Israelita cuanatu Jesús queja catyatihua; tumebaedyatu juhua israelita ama cuanaque. Tsujema mere juya cuanaque tuna Jesús queja catyatihua; tumebaedya catyatihuadya etsujequi jiteque mere juya cuanaque. Bape bape ecuana juya ama bucha, peadya Espíritu eque ecuana Yusura casaturaya.

14Ecuitaju bucucutereyaque yuhua camaque inime tupuqui neara; jadya adebae tuque micuana eau. Ecuanaja ecuita tu peadya camadya ama; umada tujatu bucucu ishuque aniya. Dutya bape bape bucucuyaquetu dutya tupu meree juya, dutya ecuitaju jida ishu. 15Ehuachi, emetucu jadya tu peadya ecuita juque camadya, arepa beta tupu bucucue ama juya ama bucha. Arepa ehuachira quisarati eau ama bucha: “Eje bucha juatsu ique emetucu bucha bucucue ama juya; riyaque ecuita juque ama tucue ique”, jujacaya amadyatu tuhuaque. 16Ijaca, yatuca jadya tatse tumeque ecuita juque cuinetse, arepa beta tupu bucucue ama juya ama bucha. Arepa ijaca jadya ejuu ama bucha: “Eje bucha juatsu ique yatuca bucha capetati ishuque ama; jutaquiju riyaque ecuita juque ama ique”, tuhuaquetu jujacaya amadya. 17Ita taa ecuanaja dutya ecuita peadya camadya ejuu. Dutya ecuanaja ecuita ni yatuca tere ejuu, eje bucha quijacabacatie jatsu ecuana ejuu. Dutya ecuanaja ecuita ni ijaca cani ejuu, eje bucha jirue tuque ecuana ai eau. 18Yusuratu dutya ecuanaja ecuitaju bucucuyaque dutya tupu ama iyahua. Ecuanaja ecuita cueyaneyaquetu Yusura iyabarehua bape bape bucucubare ishu cuanaque, tura eje bucha bucucushamerecara aya eque bucucubare ishu. 19Ecuanaja ecuita ni peadya camadya ejuu, tume taa tuque ecuanaja ecuita neri ama ejuu. 20Yusuratu iyahua bape bape bucucu ishu tsehue; tucuanaradyatu cuita pidya camadya amereya. Tumebaedya arepa ecuana jetiama paju ama bucha, peadya Ecuana Cuatsashaqui queja camadya ecuana catyatihua.

21Ecuanaja ecuitaju bucucuya cuanaquetu dutya tupu bucucue juya ecuanaja ecuitaju jida ishu. Emetucu aijamaque juatsu tuque ecuana einau ama yatuca tsehue petayaque. Huachimaque juatsu ecuana eajeu ama eju ecuana cuacara juyaju. Dutya tume cuanamaque, tuque ecuanaja ecuita ebucucuu ama jida. Tumebaedya ecuana yurameta catsahuati jutaqui. 22Ita taa ecuanaja ecuita inime tupuqui neanucara. Aniya tuque ecuanaja casadama buchique. Jadya ama buchatu dyaque saretanaya; tume cuanamaque ecuana emajuuju. 23Aniya tuque ecuanaja ecuitaju ai jida piji buchique ama. Jadya ama bucha tuque ecuana jida naruya, peneya, bajejeya jadya ecuana aya. Bisuya ecuana ejeque ecuanaja ecuita ramama cabatitsu. Jadya ama bucha ecuana jida naruya; ramajacaya ama ecuanara. 24Ecuanaja ecuita juque dyaque jida pijique tuque ecuana dyaque cuita ama bajejeya. Yusuratu ecuanaja ecuita iyahua, ecuanaja ecuitaju casadamaque, bisutadaque jadya jida piji tsehue jutu ishu. 25Yusura tuque ecuanaja ecuita iyahua dutya ecuita ecuanaja bucucutere ishu yuta ecuitaja jida ishu, ai aijama juatsu ama. Tumebaedya ecuana anitaqui tumeque inime tsehue, peya cuana tsahua ishu. 26Dutya ecuitaju tuque ecuanaja uje jutiya aiju ecuitaju ujeda juyaju. Ai bahue baatsutu ecuitadya sumitanaya. Tumebaedya, Jesús queja catyatihuaque ni canerecatiya, dutya ecuana peya inime juya tuque jiteque. Ejera ni tuja ishu jida quisarati aya, dutya ecuana pureama juya, tumeque muitaya baatsu.

27Dutya ecuana Jesucristo queja catyatihua cuanaque ecuana Yusura Jesús tsehue cuita pidya camadya baya. Jesucristoja ecuita buchique ecuana. 28Jadya equetu Yusura dutya tuja cuanaque casa tyahua peya cuana tsehue catsahuatibare ishu, Jesús queja nimeedya jutidya juaje ishu. Icuene cuitatu aniya Cristora cuitadya tura ejitaju ahuaque cueja ishu cuadishahuaque. Tuequedyatu aniya Cristoja quisarati cueja juya cuanaque. Tuequedyatu aniya Cristoja quisarati bahuitya juya cuanaque, peya cuanaja pana adeba aishu cuejaqui cuanaque. Umaetu aniya Yusuja casa eque ni ejeque ecuitaja ataquimaque au juya cuanaque. Aniyatu ujejeda cuanaque chachane juya cuanaque. Umaejatu aniya casa peya cuana tsahua ishu. Umaejatu aniya casa peya cuana naru, cuatsasha jadya aishu. Aniyatu peya yana eque quisaratiya cuanaque. Jadyatu Yusura tyahua casa tuja cuanaque yurameta catsahuati dyaque jida aishu. 29Dutya ama ecuana Cristoja cuita ecuadishaque. Dutya ama ecuana Yusuja quisarati cueja ishuque. Dutya ama ecuana Yusuja quisarati bahuitya ishuque. Dutyaja ama tuque ecuanaja casa aniya Yusuja casa tsehue ni ejeque ecuitaja ataquique ama aishu. 30Dutyaja ama tuque ecuanaja casa aniya ujejeda cuanaque chachane ishu. Dutya ama ecuana yana bape eque quisaratiya. Dutya ama ecuana bahue ecuanaja yana eque yana bape eque cuejahuaque pana cueja aishu. Jadya eque ecuana Yusura tyahua bape bape eque tuque cameremereti ishu. 31Jadya ama bucha eje buchadya catyamereticara casa nejucue Yusu queja, Jesús queja catyatihua cuanaja dyaque jida judadi ishu.

Yusuja Quisarati

© 2012, Wycliffe Bible Translators, Inc. All rights reserved. More Info | Version Index