Search form

Lucas 12

Ejitaju ecuana jubuque eje buchique

1Tume juyajutu casitaticuare eje uma mil ecuita cuana. Quitushatiya, ecatiiti jadya ecana jucuare. Jesusratu tura mepehua cuanaque isaracuare, ecuita jetiera ama bacayaju.

—Necanaruticue fariseo cuana tsehue. Levadura buchiquetu tunara bahuityaya cuanaque. Jidadya batacara datse tuna juya, ai jidaque ama. 2Dutya ibedaquetu adebataqui judadiya. Dutya etehuaquetu ejitaju judadiya. 3Meta quisaratiyaquetu bacataquidya juya huecadaju. Micuanara etare teritsu cuejayaquetu dutya queja cuejatanabuque, —jadya tujatu ecana acuare.

Yusu camadya mubataquique

(Mt 10.26-31)

4Jesúsra tuna bahuityanucacuare:

—Nemubaume micuana iyecara juya cuanaque. Arepa tunara micuana eiyeu ama bucha, jadya aatsu tunajatu aijama casa micuana nerecatura ishu ni riya piji buchique. 5Cuejaya micuana era, ejeque micuanaja mubataquique. Nemubacue Yusu camadya. Tuja peadya camadyatu casa aniya micuana majuhuaju ijahuaja etiquiju nudya ishu. Tuque camadya nemubacue.

6“Yusuratu naruya dutya ai aniyaque. Upati huiri cuanatu tsujequi cuitaque ama. Pishicaque tu beta peadya chipiru tsuje piji. Jadya ama buchatu Yusura naruya; bahuedya tuna eje bucha juyaque. 7Yusuratu adebaya dutya eje bucha micuana judadiyaque. Turatu adebaya dutya, eje uma micuanaja iyucaju etsaru aniyaque. Jutaquiju bajida nejuume. Pusha ama cuitadya micuana Yusura naruya. Upati huiri cuana naruya bucha, dyaque jida tura micuana narujacaya ama.

Ecuita cuanaja yacuaju “Jesús jaque ique” jadya juya cuanaque

(Mt 10.32-33; 12.32; 10.19-20)

8“Cuejaya micuana era. Ejeque ni ecuita cuanaja yacuaju ‘Jesús jaque ique’ jadya cacuejatiya, era ecue Etata barepajuja yacuaju, tuque tsahuaqui cuanaja yacuaju jadya ‘Ecuique tume’ jadidya abuque. 9Ejeque ni ecuita cuanaja yacuaju ‘Ique Jesús jaque ama’ jadya cacuejatiya, era dyaditu ecue Etata barepajuja yacuaju, tuque tsahuaqui cuanaja yacuaju jadya ‘Ecuique ama tume’ jadidya abuque.

10“Yusuratu IQUE ECUITAja ishu quisarati jidama ayaja jucha cuana eapupashau. Jadya ama bucha tujatu jucha cuana apupashabuque ama tuja Espirituja ishu cuita jidama quisarati aya cuanaja.

11“Dujubuque tunara micuana caradati ishuque etareju huaraji cuana ecasitatiju. Epu naruqui cuanaque, inime bajejequi cuana jadyaja yacuaju micuana dujutanabuque. Huaraji cuanaja yacuaju dujutatsu jidama inime nebaume quicueneti ishu quisarati ishu ni eje bucha cuejae aya tsehue. 12Quisarati ishuque ura juetihuaju Yusuja Espiritura micuana huecashaya micuana eje bucha quisaratie juishu, —jadya tuna Jesúsra acuare.

Eje bucha jidama chipirura eamereuque

13Umada ecuita cuanatu jucuare Jesús tsehue. Peadyaratu jadya acuare Jesús:

—Ebahuityaquique, ecue etatara tuque yatseja majutsu shanacuare dutya tuja ai anicuare cuanaque. Cuejacue ecue eusi; patya tura ique ecue ishu aniyaque, —jadya tujatu Jesús acuare.

14Jesusratu acuare:

—Ique micue tataja ai jucuare cuanaque cajaqueti ishuque cueja ishuque ama, —jadya tujatu acuare.

15Tumebaedyatu Jesus jucuare:

—Nebijiseriume dutya ai aniya cuanaque ni petaya cuanaque. Arepa ecuita dyaque umada chipiru tsehue ama buchatu dyaque jidama inimeju. Ejeque huecaca tujatu majutsu, shanabuquedya dutya tuja ai cuana, —jadyatu Jesúsra acuare.

16Jadya aatsu tuna Jesúsra bahuityacuare jeeque cuatsabiji eque.

—Anicuaretu chipirudaque. Dutya tuja tee cuanaju uhuamerecuare cuanaquetu jida huijacuare. Jetiama tujatu huesamerecuare tuhua euhuaque. 17Chipirudaratu inime tupucuare: “¿Eje bucha ejuu? ¿Eju iyameretaqui ama taa baya ecue teeju era huesamereya cuanaque?” 18Tume tujatu adebacuare eje bucha iyameree aishuque. “Parihuishamere tucue ecue beruque huesamereya cuanaque quiniqui cuanaque. Paamerenuca peya etare dyaque arida cuanaque. Tuhuadya tucue etare iyacua cuanaju paiyamere dutya ecue aniyaque, dutya era huesamereya cuanaque. 19Tume tuque ecue inime juya. Amena ecue aniya umada earaqui eiyaque eje uma mara tupu. Pacanajara ique. Paaraara. Paijiiji. Iyacua pureama paju”, jadyatu chipirudaque jucuare datse. 20Arepa ecuitaja eje uma mara chacha ani ishu cabaticuare ama buchatu jadya ama jucuare. Yusuratu jadya acuare: “Inimema mique. Riyaque apuna cuitadyami majuya. ¿Aija ishu cuana taa tuquemi tume cuanaque iyamerehua?” jadyatu Yusura acuare chipirudaque. Jadya majuetu tumeque ecuita jucuare.

21“Cuejaya micuana era. Jadyatu jubuque tunaja ishu cuita camadya jetiama chipiru, ai jadya caradatiya cuanaque. Arepa tuna dyaque chipiruqui cabatiya ama bucha, tuna Yusura nerecada, aima bucha baya, —jadya tujatu ecana acuare.

Yusura tuja cuanaque narujacayaque ama

(Mt 6.25-34)

22Jadya junuca jadya juatsutu Jesúsra tura mepehua cuanaque bahuityanucacuare:

—Cuejaya micuana era. Netsapeume inime: “¿Ai dyadi rique araya, ijiya? ¿Ai dyadi rique jutuya?” jadya. 23Yusura micuana iyahua tibu, yuneri cuitadya tura micuana tyadadiya micuanaja aijamaque ara ishuque, jutu ishuque jadya. 24Neadebacue upati huiri cuana. Tunaratu inime tsapeya ama tunara sareya tsehue. Tuna tuna cuhuatiya ama ni cahuesatiya ama ara ishuque. Aijama tunaja ni eju tunaja earaqui iya ishuque. Jadya ama bucha tuna Yusura tyaya ara ishuque. Tujaque micuana. Micuana tura micuana dyaque iyuhueda baya, upati huiri cuana bucha ama. Yuneri cuitadya tura micuana tyaya micuanara ara ishuque sareyaque. 25Ni ejeradya jutidyatu tuja maju ishuque ura juetihuaju tuja ani erirunucau ama. 26Ni micuana ataqui baya batu di taa riya pijique, ¿tume tuque micuana eje bucha juatsu inime tsapequi aya peya ai cuana?

27“Micuanajatu tsapetaqui ama inime jutu ishu cuana tsehue. Nebacuedya yachiju shasha cuana eje bucha danee juyaque. Tunaratu jidama ama inime baya jutu ishu cuana tsehue. Mere ecana juya ama chipiru jiteque, ni ecana taritariya. Jadya ama bucha tuna Yusura jida piji amereya. Salomón tu jucuare ecuari dyaque jida tsehue cajututitsu jida piji. Jadya ama bucha shasha cuana yachi juquetu dyaque jida piji, Salomónra ejutuqui dyaque jidaque jutucuare bucha ama. 28Shasha yachi juqueri tsunuda ama juya. Tumeque huecaca camadya tu jida piji; peya huecaca bacue eijehue ejuu etiquiju. Yusura yachi juque shasha cuana dyaque jida piji amereya tibu, yuneridya tura micuana tyayadya micuanara jutu ishu sareyaque. Micuanaratu tura naruyaque ejeneya ama, arepa tuque micuana upati jeta aqui cuanaque, shasha cuana jadya naruyaju baya ama bucha. 29Yusura tura iyahuaque naruya tibu, inime netsapeume: ‘¿Ai dyadi tuque ecuana araya? ¿Ai dyadi tuque ecuana ijiya?’ jadya tsehue. 30Yusu adeba baecua cuanaque tuna tumeque inime tupu tsehuedya jutidya juneniya. Micuana jadya inime tupu tsehue nejuneniume. Micuanaja taa tu aniya Etata Yusu barepa juque, micuanara ai ara ishuque, jutu ishuque jadya sareyaque tyaquique. 31Pana catyati nejucue Yusu queja, tuja micuana naru ishu. Jadya anie ni micuana juya, tume tura micuana tyaya dutya micuanara sareya cuanaque.

Tere baecuaque etsujequi jida quiyatiaje ishuque

(Mt 6.19-21)

32“Arepa micuana eje uma ama, casadama jadya juya ama bucha, bajida nejuume, ecue cuanaque. Micuanaja Tata Yusura micuana mepehua micuana eatsehue jupee huaraji aridaque juishu. 33Catyati neacue micuanaja aniyaque. Tumeque chipiru inayaque nerecada cuanaque netyabarecue. Nequiyatiajecue etsujequi tere baecuaque barepaju. Yusu queja micuana quiyatiajeyaquetu cayuamati baecua. Chiritanaya ama tuque, ni tu yuamaturaya rapara. 34Tupujacaya ama tuque ecuana inime ecuanaja iyuhueda cuanaque quiyatihuaju.

Jesús junanucayaju quihuati ishuque

35-38“Cuejaya micuana riyaque cuatsabiji. Pana adeba neacue. Anicuaretu peadya ecuita chine ishu caquemititayaju cuacuareque. Tuja mere puji cuanatu baecua jucuare ai ura tuque juetinucayaque. ‘Meta patya ni tu juetiya, jadya ama juatsu ni huecacayaju’ jadya tunajatu inime jucuare. Ai ura tuque juetinucayaque baecua tibu tuna ecajututi anicuare. Ude ecana catuchaticuare. Tahuicuare ama ecana. Ecabati tuna anisisacuare. Equihuati tuna anicuare eje tupu tura juetitsu isaraetiyaju masadama etsecue pacasha ishu. Tumetu patrónra tuja mere puji jida cuanaque juetitsu sumietiya ecabati tuque ihua juya cuanaque. Ejeque uradya jutidya tuque juetitsu meta patya, huecacayaju, juetitsu tujatu ecana cuejaetiya mesaju anibute ishu. Ejutuqui jidaque bacue catacati, mere ishuque jutu jadya juatsu tujatu earaqui quinineya.

“Jutaquiju micuana dyadi nequihuaticuedya ecabajejeti ique junanucayaju ishu, mere puji jida cuanaque jucuare bucha, tunaja patrón ihuayaque jucuare bucha. 39Bahue nejucue riyaque. Ni ejeque etare metsequetu bahue ama ejeque ura chiri puji ejutiuque. Junayaque bahueque juatsutu ecabati ejuu, chiri puji etareju chiri ejutiuque naru. 40Micuana dyadi equihuatidya nejucue ique batsa ishu. Muya jutidya micuana eanau, ejeque huecaca ique junanucayaque baecua tibu, —jadya tuna Jesúsra acuare.

Mere puji cuejataquique, cuejataquimaque jadya

(Mt 24.45-51)

41Tumetu Pedrora bacaduracuare:

—Ecuana Cuatsashaquique, ¿jadya cuejae mira ecuana aya, ecuana camadya, dutyadya ni taa?

42Jesusratu quemitsacuare:

—Neihuacue ique, mayuruma jidara tuja patrón iyuhuedaque juetiyaque eihuau bucha. Mere puji yana equedya juyaquetu jida, inimequique. Micuanaja pana adeba aishu micuana cuejaya riyaque. Anicuaretu mayuruma. Tuja patronratu shanacuare tuque juneniya tupu tuja etareju cuanaque naru ishu. “Dutya huecaca ecana ara ishu cuanaque tyacue”, jadya patu tuja patrónra aquenacuare. 43Tumeque mayuruma ni amerehua eque juya, peya cuana ni tu narujacaya ama, dutya pureamatu jubuque tuja patrón juetihuaju. 44Pusha amadya micuana cuejaya. Tura tuja patrónja mere puji cuana jida naruhua tibu, tujatu dutya tuja ai aniya cuanaque narumereya.

45“Mayuruma ni cuejataquima, amerehua eque amadyatu juya. Tura ni jadya inime tupuya: ‘Ecue patróntu juetihuishaya ama. Ecue biji eque paju jari’ jadya. Amena jadya juatsu tujatu peya mere puji cuana nerecaturaya; ijahue ijahue jutidyatu ecana aya. Chine mere, araara, nijuqui arida cuana tsehue, ijiijiya jadya tsehue jutidyatu ecana aniquereya, tuja mere ataqui ama bucha. 46Tumetu tuja patrón juetiya ni tuque quihuatiyaju, ni tuque juetinucayaque ura bahueju. Jadya baetitsutu tuja patrónra catsa catsa, ijehue jadya aetiya tuja etare juque. Riyaque mayurumatu canerecatibuque. Yusu adeba baecua cuanaque canerecatiya bucha canerecatietu jubuque.

47“Mere puji ni yana equedya ama juya, arepa tuque tuja patrónra amereyaque bahue ama bucha, tumetu dyaque nerecada atanabuque. 48Ejeque mere puji ni yana equedya ama juya, tuja patrónra amereyaque baecua juatsu, tumetu dyaque ama nerecaturatanabuque. Jetiama aniya cuanajatu jetiamadya tyataqui peya cuana. Tumebaedya ejera ni pana adeba aya Yusuja biji equeque bahuityataquidya tunajatu peya cuana tunara adebayaque, —jadya tujatu ecana acuare.

(Riyaque cuatsabiji eque tuna Jesúsra bahue amerecara acuare tuque iyuhueda baqui cuanara ihuayaque; tuque iyuhuedama baqui cuanara bacue ihuaya ama jadique.)

Jesúsja inime riyaque yahuaju cuanaque catibuqueque

(Mt 10.34-36)

49Jesúsra tuna bahuityanucacuare:

—Etiqui jujuajeyara dutya jiji asicada cuanaque jadya tirushatsu bajejeajeya buchique ique. Ique jehua riyaque yahuaju jidamaque aputasha, eaqueja catyatiya cuanaque tunaja educuju asicadaque aniyaque tilla jadya aishu. ¡Eatilla jipe ecue Yusura mere amerehuaque ejuu! 50Ique dyaque canerecatitaqui, majutaqui judadiya ique nerecada juyaque atillaya tupu. 51¿Micuanaja ni tu inime juya, ique junahua baatsu dutya inime jidama cuanaque, cati jadya amena terehua bucha? Jadya ama tuque. Ique adeba baecua cuanaque tuna ecue cuana tsehue cahuaititsu catibuque. 52Iyacua equeque tu micuana dyaque ujeu baqui cuanaque micuanaja etareju cuanaquedya. Ita taa nebacue. Peadya etarejutu eaniu ecuita, tuja ehuaneque, ebacujunaque, ebacuaque, ebacuaqueja ehuaneque. Ique adeba baecua cuanaratu ique adebaqui cuanaque ujeu babuque. 53Etataqueratu ebacuaque ujeu babuque; ebacuaquera bacue etataque. Ecuaqueratu ebacujunaque ujeu babuque; ebacujunaquera bacue ecuaque. Yahuiqueja ecuaqueratu ujeu babuque ebacuaque jahuane; ebacuaque jahuanera bacue yahuiqueja ecuaque, —jadya tuna Jesúsra acuare.

Huecaca cuana eje buchiquepa eadebau jadique

(Mt 16.1-4; Mr 8.11-13)

54Jesúsra tuna cuejanucacuare:

—Nei diji equeque huani sehueda netitsuraya baatsu, micuana juya: “Nei tu netihua; iyacuari nei juya”. Tumetu micuanara quisarati ahua equedya juya. 55Beni mara juetihuajutu “Amena nei jujacaya” jadya micuana jubahue. Micuana micuana bahue jida amena beni maraju nei jujacayaque. 56Micuana aniya patyatu Yusura jetiama aya ique tuaquejaque junahuaque adebamere ishuque. Micuanaradya jutidyatu adebaya ama, arepa micuana huecaca cuana eje buchique adeba bahue ama bucha, arepa micuana riyaque yahua juque adeba bahue ama bucha. Micuana micuana jidamaque inime cadujutiya, arepa micuana dyaque inime adebabada cabatiya ama bucha.

Ecuana ujeu baqui cuana tsehue jida jutaquique

(Mt 5.25-26)

57“Micuanara cuitadya neadebacue dyaque jida tuyuque. 58Ejera ni micuana huaraji queja cuejaya, dujucara ni tunara micuana aya, huaraji queja junatimaradya icuene jida inime nebajejecue. Icuenedya ni micuana inime ebajejeu ama, tume tunara micuana edujuu inime bajejequi queja. Dujuhuaju micuana inime bajejequira policía cuana queja edujumereu. Tume tunara micuana etare apudaju eishau. 59Pusha amadya micuana cuejaya. Tuhua tunara micuana enityamereu, huarajira tsujebacayaque tsujetyatillaya tupu, —jadya tuna Jesúsra acuare.

Yusuja Quisarati

© 2012, Wycliffe Bible Translators, Inc. All rights reserved. More Info | Version Index