Search form

Mateo 26

Jesús ujeu baqui cuanara tuque inamere ishu inime bajejecuareque

(Mr 14.1-2; Lc 22.1-2; Jn 11.45-53)

1Jadya cueja amena aatsu tura ecuana tura mepehua cuanaque cuejanucacuare:

2—Micuana micuana bahuedya metajudya tibene Pascua chine juyaque. Riyaque chine ishudya ique ujeu baqui juya cuanara inamereya curusuju tatamere ishu, —jadya tura ecuana acuare.

3Jesúsra ecuana isaraya jarijutu pae cuanaja huaraji cuanara, israelita cuana emuiba cuanara jadya inime tupucuare eje bucha iyemere Jesús aishuque. Casitaticuare tuna Caifás pae dyaque muidaja etareju. 4Tuhua tunajatu Jesús iye ishu, tseta inamere aishu inime bajejecuare. 5—Neinamerera ama Pascua chine ishu cuita, ecuita cuana ecapuritishau tibu, —jadya tuna jucuare.

Epunara Jesúsja iyucaju etseri ijimedaque juracuareque

(Mr 14.3-9; Jn 12.1-8)

6Jesústu Betaniaju jucuare Simónja etareju. Icuenetu tumeque ecuita erami ririshaqui ujeje tsehue jucuare. Jadya tibudya tunajatu “Leproso” jadya isarae acuare. 7Chineju araarayajutu Jesús epunara jipeticuare botilla caca alabastro eaque ina jadya. Tumeque botilla cacatu etseri ijimeda tsehue ejequeshaque jucuare, dyaque tsuje aridaque. Jesús mesaju juaniyajutu epunara etseri ijimedaque tuja iyucaju juraticuare. 8Epunara jadya aya baatsu ecuana Jesúsra mepehua cuanaque cahuaiticuare.

—Nepetacue tura etseri dyaque tsuje aridaque ijehueneyaju. Ni aishu buchiquetu jida ama jadya ijehuenetsu. 9Catyati ni tu aquena juhua etseri ijimedaque, umada tujatu chipiru inaquena juhua. Jetiamatu nerecada cuanaque etsahuauque chipiru inatsu, —jadya ecuana jucuare ecuana cama.

10Ecuana quisaratiyaju bacatsu ecuana Jesúsra ecuana acuare:

—¿Eje bucha juatsu jatsu tuque micuana tumeque quisarati tsehue aya? Tura ique jadya ahuaquetu dyaque jidaque. 11Micuana ducutu jujacaya amadya nerecada cuanaque, ique bacue aijama. Ique micuana tsehue junenisiriya ama. 12Tura ecue ecuitaju etseri ijimedaque jurahuaquetu ique iyetahuaju papata ishuque, tura jadya ahua. 13Pusha amadya micuana cuejaya. Riyaque epunara jadya ahuaque tuna dutya yahuaju bahue jubuque, eju ecue quisarati jidaque cuejatanayaju, ecuita cuanaja tuque adeba ishu, —jadya tura ecuana acuare.

Judasra Jesús inamere ishu inime bajejecuareque

(Mr 14.10-11; Lc 22.3-6)

14Tumetu Judas Iscariote, Jesúsra mepehuaque, cuacuare pae cuanaja huaraji cuana queja. Junatitsu tujatu ecana isaranaticuare:

15—¿Eje uma micuanara tsujetyaya, era micuana Jesús inamereyaju? —jadya tujatu ecana bacaduraticuare.

—Quimisha tunca chipiru.

—Eratu aya tumeque, —jadya tujatu ecana acuare.

16Tumeque huecaca equeratu Judasra Jesús eje bucha inamere aishuque sarecuare.

Jesúsra Pascua earaqui tura mepehua cuana tsehue aracuareque

(Mr 14.12-21; Lc 22.7-18; Jn 13.21-30)

17Jueticuaretu icueneque huecaca Pascua chine ecuanaja pan levaduramaque ara bahueque huecaca. Tumeque huecaca tuque ecuana Jesús jipetitsu bacaduracuare:

—¿Ejumi bajejemerecara aya riyaque chineju Pascua ishu araara ishu? —jadya tuque ecuana aticuare.

18Tura ecuana quemitsacuare:

—Jerusalénju nebajejeticue. Eisaradya tuque ecue ecuita tuja etareju araara ishu. Necuacue. Necuejaticuedya tumeque ecuita: “Ecuana Bahuityaquiquetu jeya. Amena patu ura japadama tuque iyetayaque. Junaya patu micue etareju Pascua juyaque chineju araarara tura mepehua cuana tsehue”. Jadya necuejaticue, —jadya tura ecuana amerecuare.

19Jesúsra cuatsashahua equedya ecuana jucuare. Tuhuadya tuque ecuana bajejecuare Pascua juyaque chineju ara ishuque.

20Amena apunahuajutu Jesús ecuana tura mepehua cuana tsehue mesaju anibutecuare. 21Araarayara ecuana Jesúsra isaracuare:

—Peadyara micuanara ique ujeu baqui cuana queja inamereya, —jadya tura ecuana acuare.

22Jadya ayaju ecuana peya inime jucuare. Peadya peadyara tuque ecuana bacadurabarecuare:

—¿Era ni taa, Ecuana Cuatsashaquique? —jadya tuque ecuana abarecuare dutyara.

23—Eatsehue peadya pejaju araarayara pan mullayara inamereya. 24Bérutu Yusu equeque quisarati cueja puji cuanara huenecuare ecuita jidama cuanara ique iyebuqueque. Tunaja quisarati ehuene equedyatu juya. ¡Dyaque nerecadatu jubuque ique ujeu baqui cuana queja inamerequi juyaque! Dyaque jida taa tu tumeque ecuita ecuaquera ejitaju aquena ama juhua, —jadya tura ecuana acuare.

25Jadya bacatsutu Judas tuque inamerequi juyara acuare:

—Ique Cuatsashaquique, ¿era ni taa mi jadya amereya?

—Jejee, mira quisarati aya equedya, —jadyatu Jesúsra acuare.

Ecuana Cuatsashaquique majucuareque adeba ishu araarataquique

(Mr 14.22-25; Lc 22.19-23; 1 Co 11.23-26)

26Araarayaquetu Jesúsra pan inacuare. Pan inatsu tujatu

—Yusurupai mique aya, Tata, —jadya Yusu acuare.

Yusurupai jadya aatsu tujatu pan cuesicuare. Cuesitsu tura ecuana tuatsehue anibareya cuanaque tyabarecuare.

—Nearacue. Riyaque pan rique ecue ecuita, —jadya tura ecuana acuare.

27Tuequedya tujatu canecu juque uva nacaca esasanashaque inanucacuare. Canecu inatsu,

—Yusurupai mique aya, Tata, —jadyatu Yusu acuare.

Yusurupai aatsu tura ecuana sadatsu inamerebarecuare.

—Neijicue jeeque canecu juque uva nacaca esasanashaque. 28Riyaque rique ecue ami, micuana jiteque quijehuetiyaque. Jetiama tuna eaqueja catyatibuque, tunaja jucha cuana tillatana ishu. Ique ecue ami quijehuetitsu majuhuajutu Yusura iyaya iyacuaque inime tuaqueja judiru ishuque. Ique majuhuaju piisitu riyaque inime yunerinetanaya. 29Riyaque micuana cuejaya. Ni eje tupu tuque riyaque yahuaju Pascua chine micuana tsehue anucaya ama; ijinucanime ama tuque ecue uva nacaca esasanashaque. Jadya ama buchatu tumeque huecaca, era dutya naruyaque huecaca juetihuaju piisi tuque ijibuque micuana tsehue iyacuaque eijiqui, —jadya tura ecuana acuare.

Jesúsra Pedro “Adebaya ama tuque era” jadya juyaque cuejacuareque

(Mr 14.26-31; Lc 22.31-34; Jn 13.36-38)

30Chineju araara amena juatsu tuque ecuana Yusu pureama aishuque jeru acuare. Jeru amena juatsu ecuana cuacuare uhua cuemusu “Olivo Acui Quini” bacaniju. 31Tuhua ecuana Jesúsra isaranucacuare:

—Riyaque meta micuanara era ijahue ahua bucha cabatitsu jacatillaya. Yusuja quisarati tu ehuene: “Tuna aquereniquiquetu iyetanabuque. Dutya tura aquerenihua cuanaque tuna tsapetanabuque, uhuisha cuana naruquique iyetanahuaju etsapetanau bucha”. 32Emajuque netitsuranucatsu icuenetadya cuaya Galileaju, tuhua micuana tsehue catsurutinuca ishu, —jadya ecuana Jesúsra acuare.

33Jadya juyajutu Pedrora acuare:

—Arepa dutyara jacatillaya ama bucha, ecuemi jacanime ama, —jadya tujatu acuare.

34—Pusha amadya mique aya. Riyaque meta, tacure quiquehuiemi catehuati quimisha juya. “Adebaya ama tuque era”, jadya aquimisha mira aya, —jadyatu Jesúsra Pedro acuare.

35—¡A, aijama! Mique adebaya ama jiu junime ama ique. Miatsehue iyepeedya datse tunara paa. “Tujaque ama ique” jadya junime ama ique, —jadyatu Pedrora Jesús acuare.

—Mique adebaya ama jiu junime ama ique, —jadya tuque ecuana abarecuare, Pedrora aya baedya.

Jesús Etataque tsehue Getsemaníju quisaraticuareque

(Mr 14.32-42; Lc 22.39-46)

36Tumetu Jesús junaticuare ecuana tura mepehua cuana tsehue Getsemaní bacani emajacaju. Tuhua junatitsu tura ecuana anaticuare:

—Rehuadya neanibutecue, ique ecue Etata tsehue quisaratiya tupu.

37Jadya juatsu tujatu dujucuare Pedro, Zebedeoja ebacuaque ecatse jadya. Cuacuare tuna ecuana japada cuita ama. Dyaque peya inime, niju huenanada, eje buchadya jucara jadyatu cabatiajecuare.

38—Dyaque peya inime taa cabatiya. Idutaqui ama jipenee cuita taa rique baya. Rehuadya neanicue. Ecabati nejucue. Netahuiume, —jadyatu Jesúsra acuare Pedro, Santiago, Juan jadya.

39Jadya tuna aatsutu Jesús cuacuare eje japa cuita amadya. Cuaatsutu chichucata junaticuare, yahua queja huipuchitana. Jadya juatsutu Yusu tsehue quisaraticuare:

—Tata, riya ique nerecada jutaquique tu ai patseda buchique. Canerecatitaquique ama juatsu taa ecanerecatiu ama. Ebacau datse mique era, ique canerecati ishu ama. Jadya ama bucha ecue biji eque ama paju. Micue biji eque paju, —jadyatu Jesúsra acuare tuja Etataque.

40Jadya juatsutu cuanucacuare quimisha tura dujuhua cuana queja. Cuaatsu tujatu ecana tahuijarabareyaju baticuare. Isaranaticuaretu Pedro:

—¿Eje bucha eatsehue ecabati jupee jutaqui ama micuana yaratupu cuana cabatihua, ni peadya ura cuana? 41Necabaticue. Netahuiume. Nebacabacacue Yusu queja, micuana Satanásra ique jacamerecara ayaju, micuanaja idu ishu. Micuanaja tacatu aijama casa Ijahuara cajuchatishacara ayaju casada juishu, arepa micuanara jacacarama aya ama bucha, —jadya tuna Jesúsra acuare.

42Cuabeta ishutu Jesús cuacuare tuque cuahuaju nucadya, Yusu tsehue quisaratira:

—Tata, canerecatitaquique ama juatsu taa ique ataya bae eatau ama. Jadya ama bucha ecue biji eque ama paju. Micue biji eque paju, —jadya ati beta tujatu acuare.

43Jadya juatsutu cuanucacuare tura quimisha dujuhua cuana queja. Cuanucatsu tujatu ecana tahuijarabareyaju batinucacuare. Busataqui ama cuita tunajatu yatuca bacuare tahuicara juatsu. 44Tuna shanatsutu cuaquimisha ishu cuanucacuare Yusu tsehue quisaratira. Tuque quisaratihua baedyatu quisaratitinucacuare. 45Jadya juatsutu cuanucacuare tura dujuhua cuana queja.

—¿Canajaraya jari cuitadya micuana? ¿Tahuiya jari cuitadya ni taa micuana? Amenatu ura juetihua IQUE ECUITA tunara jucha arida cuana queja inamereyaque. 46Nenetitsuracue. Nedirura. Amenatu jehua ique ujeu cuana queja inamerequi juyaque, —jadya tuna Jesúsra acuare.

Jesús erisique dujutanacuareque

(Mr 14.43-50; Lc 22.47-53; Jn 18.2-11)

47Jesús quisaratiya jarijutu Judas junaticuare, tura mepehuaquedya datse. Ecuita jetiama tsehuetu cuacuare. Cuchiru tsehue, acui tsehue jadya tuna junaticuare. Pae cuanaja huaraji cuanara, israelita cuana emuiba cuanara jadya tuna cuadishacuare. 48Junatima jariradya tuna Judasra cuejanaticuare: “Era dyahuanatiyaque, tudya tume. Risitsu, nedujucue”, jadyapa tujatu ecana junatimaradya anaticuare. 49Junatitsu tujatu Jesús jipeticuare:

—Banuchi, Ebahuityaquique.

Jadya aatsu tujatu Jesús dyahuanaticuare. 50Tura jadya ayajutu Jesúsra isaracuare jadya:

—Acuedya mira ai acara aya eque, era mepehuaque, —jadyatu Jesúsra acuare.

Jesús dyahuahua baatsutu Judas tsehue cuahua cuanara jipetitsu inaticuare.

51Jesúsra mepehuaratu cuchiru baeque baina juque juputsu pae dyaque muidaque merequique ijaca pejucuare.

52—Cuchiru tsehue icuenecara aume. Ishacue micue cuchiru bainaju. Miratu adebayadya quisarati: “Cuchiru tsehue quiyetiyaquetu cuchiru tsehuedya iyetabuque” jadique. 53Sareya ama tuque era micue ique icuene ishu. Eratu Etata ebacaudya peadya tunca beta earacana cuare barepaju Yusu tsahuaqui cuanaque ique icuenena ishu. Masadamadya tujatu ecana ecuadishau. Jadya ama bucha bacaya ama tuque era. 54Ehuenedya tu Yusuja quisarati ique nerecada judadiyaque. ¿Eje bucha judadie jatsutu ejuu, jadya judadi ishuque era barepa juque etsahuaqui cuana ique tsahuana ishu bacahuaju? —jadyatu Jesúsra acuare ecuita ijaca pejuquique.

55Tuequedya tujatu isaracuare ecuita cuana jetiamaque:

—Micuana micuana jehua cuchiru tsehue, acui tsehue jadya ique inara, chiri puji inara ejeu bucha. Anichinedya tuque micuanaja emajaca ejudya jutidya ique ina ishu cuchiruma, acuima. Dutya huecaca taa ique Yusuja etareju Yusuja quisarati bahuitya juchine. ¿Tume micuanara eje bucha juatsu inachine ama tuhua? 56Riya ique atayaqueri juya Yusu equeque quisarati cuejaqui cuanara cuejacuareque, Yusuja quisaratiju ehuene bae cuitadya, —jadya tuna Jesúsra acuare.

Tuque quisaratiya tsunumeedya ecuana Jesúsra mepehua cuanaque huanaterecuare. Jacacuare ecuana Jesús.

Jesús israelita cuanaja huaraji arida cuana ecasitati ducu dujutanacuareque

(Mr 14.53-65; Lc 22.54-55, 63-71; Jn 18.12-14, 19-24)

57Jesús inaqui cuanaratu Jesús dujucuare Caifás, pae dyaque muidaja etareju. Tuhuatu ecasitati jucuare cacuatsashati bahuityaqui cuanaque, tumebaedya israelita cuana emuiba cuanaque. 58Tumetu Pedrora tunara Jesús dujuyaju japa tupuaje acuare. Cuacuaretu pae dyaque muidaja etare tsecue tupu. Etare tsecue junatitsutu sudaru cuana tsehue aninaticuare, eje bucha tuna Jesús ayaque petacara aatsu.

59Huaraji cuana tuhua ecasitati jucuare cuanaratu tyacara acuare Roma juque huaraji, tuque iyemere ishu. 60Jadya ama bucha tunajatu dadicuare ama eje bucha eque jidama cueja ishu. Jetiama tuhua jucuare cuanaratu pusha pusha tsehue jidamapa ejuu jadya acuare. Daditaqui ama tunajatu bacuare dutyara tupu tuque jidama ejuque. Eje uma quisaratiyaju baca jadya aatsu tatse beta netitsuranucacuare quisarati ishu.

61—Yatseratu Jesús jadya quisaratiyaju bacachine: “Eratu Yusuja etare rihuishatsu puririsha jadya aatsu, quimisha huecacaju enityatsuranucau”, jadyari juchine, —jadyatu ecuita ecatse jucuare.

62Tatse jadya juyaju bacatsutu pae dyaque muidaque netitsuracuare. Turatu Jesús bacaduracuare:

—Bacahuadyami ecatse micue ishu quisaratiyaju. ¿Caquemitsatiya ama cuitadya mique? ¿Jadidyami quisaratichine, jadya ama ni taa?

63Jesústu caquemitsaticuare ama. Yudijidyatu pae dyaque muidara bacaduranucacuare:

—Yusu aniyara mique quisaratiyaque bacayaque adebatsu, tuyudya cacuejaticue. ¿Midyami Mesías, Yusuja Ebacuaque, aijama ni taa?

64—Jejee, Mesiasdya ique; Yusuja Ebacuaque ique. Tumebaedya mique cuejaya. Ejeque huecaca micuanara ique babuque Yusuja jida eque amaca eaniqui muidaju aniyaju. Tumebaedya micuanara babuque barepa huani ducu eque junanucayaju, —jadyatu Jesúsra acuare.

65Jadya quisaratiyaju bacatsutu pae dyaque muidaque cahuaiticuare. Cahuaititsutu una cachajaticuare, dyaque cuita ecahuaitique ejitaju juishu.

—Riyaque ecuitarari Yusu cahuaitishaya tuja quisarati tsehue. Sareya ama tuque ecuana peyaja riyaque jidama juchineque cueja ishu. Micuanaratu bacahuadya tura quisarati jidamaque ayaju. 66¿Eje bucha micuana amerecara aya? ¿Iyemerecara, iyemerecarama ni taa? —jadya tujatu acuare peya huaraji cuana.

—Jucha metse tuque. Pamajudya, —jadya tuna caquemitsaticuare.

67Jadya aatsu tunajatu ebutsequiniju ecuedira acuare. Miricuare tunara. Peya cuanaratu bahuapajacuare.

68—Yuneridya ni mi Mesías, Yusuja Emepeque, caadebaticue. ¿Aira taa mi bahuapajahua? —jadya tunajatu ijahue ayaquedya jutidya acuare.

Pedrora “Adebaya ama tuque era” jadya acuareque

(Mr 14.66-72; Lc 22.56-62; Jn 18.15-18, 25-27)

69Jadya juya tsunumeetu Pedro etare tsecue juanicuare. Juaniyajutu epuna mere pujira jipeticuare.

—Miquemi Jesús Galileaju tsehue junenihuaquedya, —jadyatu Pedro epunara acuare.

70Pedrotu dutya tuhua cuanaja ijacaju catehuaticuare.

—¡Aijama, mama! ¡Adebaya ama tuque era! ¿Ejeque cuana taa tuquemi jadya aya? —jadyatu Pedro caquemitsaticuare.

71Tuequedyatu etare tsecue enubitaquiju netidirunucacuare. Tuhua junetiyajutu peya epuna mere pujira banucacuare. Baatsu tujatu anucacuare:

—Riyaque ecuita ri Jesús Nazaretju tsehue junenihuaquedya, —jadya tujatu acuare tuhua cuanaque.

72—¡Aijama, mama! ¡Adebaya ama tuque era! Yusu bahue ique yuneri quisaratiya, —jadyatu Pedrora acuare.

73Yaratupu juatsutu tuhua cuanara jipeticuare.

—Yuneri cuitadyami mique Jesús tsehue junenihuaquedya. Micue quisarati tu Galileaju aniya cuanaja quisarati cuitadya, —jadya tunajatu Pedro acuare.

74Tunara jadya ayajutu Pedro caquemitsaticuare:

—¡Aijama! ¡Adebaya ama tuque tumeque ecuita! Yusu bahue ique yuneri quisaratiya. Ique yuneri ama juyaque juatsu, Yusura panerecatura, —jadya tuna Pedrora acuare.

Tuque jadya quisaratiyaju cuitatu tacure quiquecuare. 75Jadya juyajutu Pedro huecatanacuare. Caadebaticuaretu Jesúsra jadya cuejachineque: “Tacure quiquehuie mira tehua quimisha aya. ‘Adebaya ama tuque era’ jadya mira aquimisha aya”. Jadique adebatsutu Pedro tsajaja cuinana juatsu paa ebari jucuare.

Yusuja Quisarati

© 2012, Wycliffe Bible Translators, Inc. All rights reserved. More Info | Version Index