Search form

Apocalipsis 19

1Jadya juatsu tuque bacanucacuare umadaque barepaju quiqueyaju etsuri jebuda tsehue:

“¡Aleluya!

¡Pureama mique ecuana aya, Yusu!

Miquemi Ecuana Cuatsashaquique.

Miquemi Ecuana Inajacamerequique.

Dyaque jida taa mique.

Sumiya mique ecuanara.

Miquemi dutya casa tsehueque, Yusu ecuanara muiyaque.

2Miquemi cuji juya ama eje buchique inime tsehue.

Mira ecuana yuneri tuyuju eje bucha aya.

Miratu nerecada amerehua epuna decadeca aridaque tuja biji eque anihuaque.

Miratu nerecaturahua tumeque epuju aniya cuanaque, tunara Yusu merequi cuanaque iyehua tibu”, jadya tunajatu Yusu acuare.

3Tume tuna jadya junucacuare:

“¡Aleluya!

¡Pureama mique ecuana aya, Yusu!

Tumeque epu tereyaque huani juyaquetu terenime ama”, jadya tunajatu Yusu acuare.

4Tume beta tunca pushi earacana Yusu mui juya cuanaque, tumebaedya pushi bape bape butsequinie cuanaque tuna chichucata juatsu huipuchitanacuare yahuaju cuita. Tume tunajatu Yusu tuja eaniqui cacuatsashati ishuju aniyaque muicuare.

—¡Jadidya paju! ¡Aleluya! ¡Pureama mique ecuana aya, Yusu! —jadya tuna Yusuja yacuaju jerucuare.

5Tumetu bacataqui jucuare Yusuja eaniqui cacuatsashati ishu eque etsuri jadya juyaju:

“Dutya mique merequi cuanarami pureama aya, Yusu.

Dutya achaacha cuanara, ecapajiti esiri cuanarami pureama aya.

Dutya micue yacuaju huipuchitana ishu aya cuanarami pureama aya”.

UHUISHA BUCHA IYETAE ATAHUAQUE tuja cuana tsehue caradatibuqueque

6Tumebaedya tuque bacacuare jetiama ecuita cuana quisaratiyaju, ena sicacada tuuuya bucha, tiritiyaju enara piyeyaju juya bucha. Jadya tuna jucuare:

“¡Aleluya!

¡Pureama mique ecuana aya, Yusu!

Miquemi enaruqui jutibunehua, Ecuana Cuatsashaquique.

Miquemi Yusu Dutya Iyaquique, ecuanara muiyaque.

Necapureamaturatira.

Pureama nejura.

‘Dyaque jida, casada jadya taa mique’ jadya neara.

7Dyaque jida ecuana, mira ecuana naruya tibu.

Pureama ecuana juya, mira ayaque baatsu.

Amenatu huecaca juetihua ‘UHUISHA BUCHA IYETAE ATAHUAQUE caquemitiyaque’ bacani.

Juetihuatu huecaca tuque tuja cuana tsehue cajacatinuca ishuque ama.

Micue cuanaque tuna ecabajejeti quihuatiya miaqueja judiru ishu, epuna tuja yahuique juya tsehue cajipeti ishu ecabajejeti bucha.

8Micue cuanaque tuna jutumeretahua ejutuqui jida pajadaque, tiquida, caquemitiyaque ejuta bucha”, jadya tunajatu acuare.

9Tume Yusu tsahuaquira jadya acuare:

—Huenecue jadya: “Pureama paju UHUISHA BUCHA IYETAE ATAHUAja casitati ishuque chine juyaju cuejatahua cuanaque”. Riyaque quisarati tu Yusu equeque cuitadya, —jadya tura acuare.

10Tume tuque tuja yacuaju chichucata juatsu muicuare. Tume tura jadya acuare:

—¡Muiume ique! ¡Yusu peadya camadya muicue! Ique Yusu merequique nucadya. Ique, mique, umae cuana jadya buchique Jesús queja ecatyati cuanaque, tuaqueja nimee jujacahuaque ama, —jadya tura acuare.

Yuneri cuitadya Jesús queja ecatyati cuanaque, Yusu equeque cuitadya quisarati cuejaqui cuanaque tuna Jesúsja Espiritura tsumeya tuque cacuejamereti ishu.

Cahuayu paja dyaque eque junabuqueque

11Jadya juatsu tuque bacuare barepa epacashatana. Tumetu cahuayu paja ejitaju jucuare. Tuque dyaque eque junayaque tu TUYU, YUNERIQUE bacani. Jadya tujatu ebacani, tuyu narubuque, catibuque jadya jubuque tibu. 12Cahuayu paja dyaque eque jeyajatu yatuca tiquida jucuare, etiqui jujuya bucha. Tuja iyucaju tu anihua jetiama puja cuana, tuque ecuarique adebataqui juishuque. Ebacani ehuene juhuaquetu tura camadya adebaya. 13Tura ejutuqui jutuyaquetu jucuare ami tsehue epude. Tuja ebacanitu YUSUJA QUISARATI. 14Yusuja cuanaque jetiama cati ishu ecabajejeti cuanaratu tupujudya acuare. Ejutuqui jida pajada, asicadama tsehue tuna ecajututi jucuare. Cahuayu paja cuana dyaque eque tuna jecuare. 15Cahuayu paja dyaque equejatu ecuatsaju anicuare quiyeti ishuque cuerudaque, tume tsehuedya Yusu adeba bae cuanaque sacuabare ishu. Tuja casa aniya tsehue tujatu narubuque. Uhuisha naruqui cuanaratu cuatsashaya muida tsehue uhuisha cuejataquima cuanaque; jadidyatu tura cuatsashabuque muida tsehue tuque muibacarama juya cuanaque. Uva caca tapapashatsu mere puji cuanara etisiu bucha, jadya tuna tura nerecaturabuque cuejataquima cuanaque. Jadya tuna Yusura abuque Dutya Casa Tsehuera. 16Tuja unaju, etsacaju jadya tu ehuene jeeque ebacani CACUATSASHATI PUJI CUANA CUATSASHAQUIQUE, ECUARI CUANAJA ECUARI DYAQUE ARIDAQUE jadya.

17Jadya juatsu tuque banucacuare Yusu tsahuaquique ijetiju netiyaju. Quiquecuare tujatu dutya upati jamani bucha cuanaque barepa juque:

—Nejecue. Necaradaticue Yusura earaqui bajejeyaque ara ishu. 18Ejetsunue ama tunajatu majutere ishuque jucuare huaraji cuana, sudaru cuana cuatsashaqui cuanaque, sudaru casada cuanaque, cahuayu cuana, cahuayu isaaniqui cuanaque. Dutya maju ishuque ebacua, amena cuanaque, ecuita metsequi, metsema cuanaque. Nejecue. Nearanacue tume emaju cuanaque, —jadyatu jucuare Yusu tsahuaquique.

19Tume tuque bacuare Mapisi Ebari Jiuque, huaraji cuana Yusu muiba baecua cuanaque, tuna jiteque catiya cuanaque jadya. Dutya tume cuanaque tuna casitaticuare cati ishu, cahuayu paja dyaque equeque, tuja sudaru cuana jadya tsehue cati ishu. 20Tumetu Mapisi Ebari Jiuque, tumeque pusha pusha aridaque Mapisi Ebari Jiuja yacuaju inimeradya jutidya ai aqui juhuaque jadya risitanacuare. Tumeque pusha pusha aridaquetu junenicuare, turapa Yusu equeque cuitadya quisarati cuejaya jadya; tume taa jadique ama. Mapisi Ebari Jiuque, quisarati pusha pusha cuejaquique ecatsetu chacha iyemaque asufre tsehue etiqui jujuyaju ijehuetanacuare. 21Peya cuanatu iyecuare cahuayu paja dyaque equera tuja ecuatsaju quiyeti ishuque beta eque jacua tsehue. Dutya jamani cuanatu pana jeque jucuare tuhua emaju cuanaque aratsu.

Yusuja Quisarati

© 2012, Wycliffe Bible Translators, Inc. All rights reserved. More Info | Version Index