Search form

San Juan 9

1Jesús ti'hua lane, ixim'ma anuli cal fo'. Cal xans ma lipajnta afo'. 2Ts'ilihuequi Jesús icuis'e'me, timiyi:

―Momxi, ¿te qui'ipa lipajnta afo'? ¿Naitsi iƚque ts'ijunac'? ¿Te maƚque cal fo' o qui'ailli', qui'máma'?

3Jesús italai'e'mola', timila':

―Nij naitsi ts'ijunac', ni cal fo' ni qui'ailli' qui'máma'. Ipajnta afo' cal xans, toƚta'a ȽanDios timuc'i'mola' lan xanuc' al cueca' lipepaxi. Jiƚpe licuerpo cal fo' ti'i'ma al cueca'. 4Micoƚi litine aƚ'e'me loxpic'epa ȽanDios, iƚque Ƚalummepa. Tijouƚa' timufc'oƚa' aimi'iya maƚ'eyacu lanic'. 5Ma capa'a fa'a li'a ƚamats' iya' Nepalc'o'.

6Lijoupa licuapa toƚta'a Jesús, itsuƚof'ipa ƚamats', ilanc'eco'ma ƚitsulu' ƚaquixitsqui. Iƚque ƚixitsqui imet'ƚi'ipa li'u' cal fo'. 7Timi cal fo':

―To'huaƚa' jipu'hua lin'nuhua' cuftine Siloé. Iƚpiya tapajtsi lo'u'.

Iƚe lipuftine Siloé tuhuaƚquemma: Ummempa.

Cal fo' i'hua'ma, epajtsi li'u'. Lipainamma, tehuetsalenghua. 8Nomana' lan huejnca jouc'a locuenaye xanuc', iƚne li'ipa iximpá mixa'hue quitomí, iƚne tipalaic'oyoƚtsi, ticuayi:

―¿Te maƚca'a cal xans nocutshuaipa, noxa'huepa? ¿Te qui'ipa?

9Hualca ticuayi:

―Maƚca'a cal xans.

Locuenaye ticuayi:

―A'i. A'i iƚque, ma le'a ti'onƚcospa.

Cal xans timila':

―Ma' iya'.

10Timiyi:

―¿Te qui'e'empo'? ¡Ma' ixaƚconapo' lo'u'!

11Timila':

―Cal xans cuftine Jesús, i'epa ƚixitsqui. Iƚque ƚixitsqui aƚmet'ƚi'ipa lai'u'. Alummepa lin'nuhua' Siloé. Aƚmipa: “Jiƚpiya tapajtsi lo'u'”. Ai'hua'ma, nepajtsi lai'u', itsiya exilinamma lai'u', cahuetsalenghua.

12Icuis'e'me, timiyi:

―¿Pe copa'a iƚque cal xans?

Timila':

―Aicaixina'.

13Iƚque cal fo' joupa ixaƚconapa ileco'me petsi lomana' lan xanuc' fariseo. 14Litine Jesús li'e'ma ƚixitsqui, lixaƚ'mena'ma li'u' cal fo', iƚe litine conxajya. 15Lam fariseo aiquetenƚcocola' iƚe li'epa Jesús litine conxajya. Icuis'e'me cal xans, timiyi:

―¿Te qui'ipo'? Itsiya tahuetsalenghua. ¿Te qui'e'empo' lo'u'?

Cal xans timila':

―Iƚque aƚmet'ƚi'ipa ƚixitsqui lai'u', ai'hua'ma nepajtsi lai'u', itsiya cahuetsalenghua, exilinamma lai'u'.

16Hualca lam fariseo nomana' jiƚnu'hua ines'me:

―ȽanDios a'i cummaic' iƚque cal xans Jesús. Iƚiya litine conxajya tetets'i, ti'ay canic'.

Locuenaye tinesyi:

―Ja'ni a'ijc'a xans, ¿te co'iya mi'eya toƚta'a al cueca'?

Enaj'moƚtsi onƚca, aiqui'i'ma anuli liƚpicuejma'. Timana' pe aiquetenƚcocola' lo'epa Jesús, timana' locuenaye icuaitsi quiƚpic'a lo'epa.

17Icuis'econa'me cal xans ƚixaƚconapa li'u'. Timiyi:

―Iƚque ƚixaƚ'menapo' lo'u', ima', ¿te cofnesya iƚque?

Cal xans timila':

―Iya' cacua aprofeta.

18Lan xanuc' judío ticuayi:

―A'ij ƚinca locuapa iƚque cal xans lonespa: “Laipajnta ninfo'”. Lipajnta ailopa'a quicuana, ac'a li'u', toƚta'a tehuetsalenghua itsiya.

Ijoc'i'me ticuaiyunca qui'ailli' qui'máma' cal xans ƚixaƚconapa li'u'. 19Icuis'em'mola', timila':

―¿Te ma' al ƚinca iƚque oƚ'hua? ¿Ma ipajnta afo'? Itsiya tehuetsale. ¿Te qui'ipa?

20Qui'ailli' qui'máma' italai'enca, timinnila':

―Aƚsina' iƚque aƚ'hua. Aƚsina' ipajnta afo'. 21Itsiya tehuetsalenghua. A'i caƚsina' te qui'ipa. Ni aicaƚsina' naitsi nixaƚ'menapa li'u'. Iƚque joupa itojpa. Titalai'eƚa' iƚque quituca'.

22Toƚta'a linespa qui'ailli' qui'máma' cal xans. Timiyoƚtsi: “¿Te caƚ'eyaconga' lan xanuc' judío?” Iƚniya joupa inefopá, ixpic'epá, icuapá: “Cal xans, ja'ni tinesla': Jesús iƚque aCristo, iƚque cal xans lihuescuf'me petsi lalafot'ƚeyopoƚtsi. Tijouƚa' aimalapi'iconayacu lane mitsufaiconaya. Aimaƚmajnconayacu anuli.” 23Toƚiya ticuayi: “Iƚque joupa itojpa. Titalai'eƚa' quituca'.”

24Lan xanuc' judío ijoc'icona'me cal xans ƚixaƚconapa li'u'. Timiyi:

―ȽanDios tiquimf'ehuo'. Lu'itsonga' al ƚinca. Illanc' limetsaijma cal xans Jesús. Aƚsina' titay cajunac'.

25Timila':

―Iya' aicaixina' ja'ni titay cajunac'. Aixina' iya' li'ipa ninfo', itsiya cahuetsalenghua. Iƚiya ƚinca aixina'.

26Iƚne icuis'e'me, timiyi:

―¿Te qui'e'epo'? ¿Te qui'ipa lixaƚ'menapo' lo'u'?

27Cal xans italai'e'mola', timila':

―Joupa nu'ipolhuo', aicoƚcueca. ¿Te ts'oƚpic'a cu'itsolhuo'? ¿Te aga imanc' oƚpic'a tunlihuej'me?

28Ixtulenca. Imilojpá cataiqui'. Timiyi:

―Ima' ƚinca mihuequi iƚque cal xans Jesús. Illanc' a'i. Illanc' lihuejyi Moisés. 29Aƚsina' ȽanDios ipalaic'opa Moisés. Iƚque cal xans Jesús aicaƚsina' pe qui'huayomma.

30Italai'e'mola' cal xans timila':

―¡Xinƚa'! Iƚque cal xans aƚsaƚ'menapa lai'u'. Itsiya imanc' toƚcuayi: “Aicaƚsina' pe qui'huayomma”. 31Aƚsina' ȽanDios aimiquimf'ela' petsi ixcay lo'epa. Aimitoc'iyacola'. Cal xans noxpaic'epa ȽanDios, ja'ni ti'eƚa' loxpic'epa, iƚque cal xans ƚinca ȽanDios tiquimf'e, titoc'i. 32Jifa'a li'a ƚamats' anuli cal xans ja'ni lipajnta afo', ni anulemma aicaƚsina' quixaƚ'menni li'u'. 33Iya' cacua: ȽanDios ummepa iƚque Jesús. Ja'ni a'i, ailopa'a co'eya.

34Iƚniya italai'e'me, timiyi cal xans:

―Litine lopajncota ima' otaic' lojunac'. ¡Itsiya opic'a aƚmuc'itsonga' illanc'!

Ihuescufna'me pe lefot'ƚeyoƚtsi. Timiyi:

―To'huanƚa'. Aimotsufaiconno jifa'a lajut'ƚ.

35Jesús icuej'ma ihuescufimpa pe lefot'ƚeyoƚtsi. Ehuepa, ixinnapa, timi:

―Ima', ¿te ma to'huaiyinge iƚque cal Xans Ƚiximpa cal profeta?

36Cal xans timi:

―Mai'ailli', lu'iƚa' naitsi iƚque. Tijouƚa' ca'huaiyijm'ma.

37Jesús timi:

―Joupa oximpa. Tipalaic'ohuo'. Ma' iya'. Iya' iƚque cal Xans Ƚiximpa cal profeta.

38Cal xans timi:

―Mai'ailli', ca'huaiyijnhuo'.

Exc'onƚingai'ma. 39Jesús timi:

―Aicuaicoco'ma fa'a li'a ƚamats' ti'i'ma tenaj'moƚtsi lan xanuc'. Lan fohue tehuetsalena'me. Iƚne nahuetsalepá ti'e'e'mola' afohue.

40Lam fariseo nomana' jiƚpe pe lopa'a Jesús icuej'me lines'ma. Iƚniya icuis'e'me, timiyi:

―¿Te ma illanc' jouc'a ninc'ifohue?

41Timila':

―Ja'ni unc'ifohue aimitac'uim'molhuo' cajunac'. Ma moƚcuayi: “Aƚsinyi”, aimiƚonc'enyacolhuo' loƚjunac'.