Search form

Hebrơ 5

1Dâng lĕ kôranh jan brah dŭt kuŏng jêng bunuyh i Kôranh Brah nơm kơih bơh phung bunuyh i blao khât, gay ma sơm ntang phung ƀon lan ta năp măt Kôranh Brah. Păng i nây sơm nhhơr ndơ, ndrel ma sơm jan brah ma Kôranh Brah, gay ma dăn Kôranh Brah yô̆ mâu hôm kơp nau tih.* 2Kôranh jan brah dŭt kuŏng i nây păng rdja, hôm jan tih kơt phung ƀon lan đŏng, kơt ndri păng geh nuih n'hâm mleh blao yô̆ bunuyh i jan tih, bunuyh i rluk mâl mâu ôh gĭt ndơ ueh ndơ djơh.* 3Tă bơh nau rdja jan tih i nây, dâng păng iăt ma nhhơr ndơ jan brah, gay ma Kôranh Brah yô̆ nau tih săk păng nơm, nđâp ma nau tih phung ƀon lan đŏng.*

4Mâu geh ôh du huê dơi n'hao êng săk păng nơm jêng kôranh jan brah dŭt kuŏng, Kôranh Brah nơm dơm kơih, kơt Păng lĕ kơih đŏng ma Arôn kăl e nơh jêng kôranh jan brah dŭt kuŏng.* 5Kơt ndri đŏng Brah Krist Păng mâu ôh n'hao êng săk Păng nơm jêng kôranh jan brah dŭt kuŏng+ , Kôranh Brah nơm kơih Păng. Kôranh Brah lah ma Păng:

‘May dja Kon Gâp nơm,

Nar dja Gâp ăn bu gĭt, Gâp Bơ̆ May ngăn’ .*

6Kôranh Brah lah jât ma Păng ta trong êng kơt nđa:

‘May jêng bunuyh jan brah ƀaƀơ n'ho ro

Kơt kađăch Mĭlkisađek i bunuyh jan brah đŏng+ .*

7Nôk Brah Yêsu gŭ rêh ta neh ntu dja nơh, Păng nter mbơh sơm ma Kôranh Brah hô ngăn nđâp ma lôh dak măt, dăn Kôranh Brah i dơi rklaih Păng bơh nau khât. Jêh ri Kôranh Brah iăt nau Păng dăn nây, yorlah Păng yơk Kôranh Brah, nđâp ma iăt jan tâng nau Kôranh Brah de đă.* 8Jêh ri bol lah Păng i Kon Kôranh Brah nơm kađôi lĕ, Păng hôm e nti iăt nau Kôranh Brah đă, tă bơh nau jêr jŏt Păng nơm+ . 9Tât ma Păng lĕ jan lôch lĕ phiao ndơ Kôranh Brah đă ma Păng+ , Păng jêng tơm nau rklaih n'ho ro bơh nau tê̆ dôih ăn ma dâng lĕ bunuyh i iăt nau Păng, 10nđâp ma Kôranh Brah kơih Păng jêng kôranh jan brah dŭt kuŏng kơt tâng ntil kađăch Mĭlkisađek jan bunuyh jan brah đŏng.*

Nau iăt, ndrel ma nau nsrôyh

11Gâp hôm geh ŏk nau ŭch mbơh nkoch ma nau i nây, yơn ma jêr ngăn ma mbơh nkoch, yorlah khân ay may iăt jŏ ngăn vât.* 12Di lah khân ay may lĕ jan nơm nti, tih ma hôm iăt ma bu nti khân ay may nau Kôranh Brah i nchô ma ntơm tâm ban ma bunuyh i mhe sât nsing. Khân ay may tâm ban ma oh bê i blao nhêt dơm ma dak toh, ê hŏ ôh blao sông sa ma ndơ dăng. 13Bu moh i hôm ŭch dơm ma dak toh, păng i nây ê hŏ ôh vât ma ndơ jan sŏng, yorlah păng hôm e oh bê dơm. 14Yơn ma ndơ sông sa dăng prăp ăn ma bu ranh, geh nau khlay lah nau nti jru, di ma bunuyh i lĕ vay gĭt moh ndơ ueh ndơ djơh dơm.

Nau Kôranh Brah Ngơi Nau Tâm Rnglăp Mhe

© Wycliffe Bible Translators, Inc. All rights reserved.

More Info | Version Index