Search form

EXODUS 11

Fater Thihnak Kong A Chim

1Bawipa nih Moses cu a thawh i, “Faro le Izipt mi hna cungah hin dantatnak pakhat lawnglawng ka tlunter rih lai. Cu hnuah cun an kalter ko hna lai. An kalter hna tikah cun a òhawl in an òhawl hna lai. 2Cun na mi hna kha chim hna law nu nih siseh, pa nih siseh, an innpa cio kha sui hlawn le ngun hlawn hal cio hna seh,” a ti. 3Bawipa nih Izipt mi cu Israel cungah khan hmaizahnak a ngeihter hna. A ngaingai ti ahcun Izipt bawi pawl le mi zapi nih khan Moses cu mingan ngaingai pakhat ah an ruah.

4Moses nih khan Faro cu, “Bawipa nih hitin a ti, ‘Zan òim hrawngah khin Izipt mi hna lakah ka chawk lai i 5Izipt ram chung i fater a simi paohpaoh kha an thi lai, Faro rocotu a bawiòhutdan cung i a òhu dingmi fater thawk in facang rialnak lung i facang a rialmi salnu fater tiang an thi lai. Saòil hna fater vialte zong an thi ve lai. 6Hi hlanah a um bal lo i hmailei zongah a um bal lo ding aihramnak kha Izipt ram chung dihlak ah a tlung lai. 7Sihmanhsehlaw Israel mi hna lakah cun uico nih minung siseh saòil siseh a auh hna thawng hmanh a leng lai lo; cucaah Bawipa nih Izipt mi le Israel mi cu ka thleidan hna kha na hngalh lai,’ a ti,” tiah a ti. 8“Cun na bawi vialte hna hi ka sinah an ra lai i ka hmaiah an kun lai i, ‘Nangmah le na mi hna cu va kal ko u,’ tiah an ti lai. Cu hnuah cun hi ram hin ka chuak lai,” tiah a ti fawn. Cun thinhung ngaiin Moses nih Faro cu a chuahtak.

9Bawipa nih Moses cu a chawnh i, “Izipt ram chungah hin khuaruahharmi thil kha ka tuah chinchin khawh rih hna nakhnga, Faro nih hin na bia kha an ngai lai lo,” a ti. 10Hi khuaruahharmi thil vialte hi Moses le Aaron nih Faro hmaiah khan an ser hna, sihmanhsehlaw Bawipa nih a lung a hahter caah Israel mi kha a ram chung cun a chuahter duh hna lo.

Hakha Common Language Bible

© Bible Society of Myanmar 2006

More Info | Version Index