Search form

GENESIS 18

Isak Chuahnak Biakamnak

(Heb 13.2)

1Bawipa cu Abraham sinah Mamre i thingzarh hna lakah khan a lang. Chun ni lin lai i Abraham cu a thlam innka i a òhut lioah khan, 2khua a hei zoh i mipa pathum an dir ko kha a hmuh hna. A hmuh hna le cangka a va tli i a va don hna. A khuk aa bil i, 3“Bawipa, Ka inn ah tang ta loin kei santlailo pa hi, ka lanhtak sawh hlah. 4Ti in cahpiak hna ning law nan ke i òawl u law thing toiah hin i din ta u. 5Rawl tlawmpal tein in serpiak hna ning law ei ta u law cun nan bat a dam in nan lan te lai. Ka inn nan ra phan cang òung i rawl ei ta lo cu ka sia a herh,” a ti. Annih nih, “A òha ko, na chim bantuk cun tuah ko,” tiah an leh.

6Abraham cu khulrang in thlam chungah khan a vung lut i Sarah cu a thawh i, “Khulrang in changvut na ngeihmi lak i a òha bik kha pawng sawm thum in i lak law nawng law changreu ah ser tuah,” a ti. 7Cun cawrun leiah khan a va tli i a thau milmialmi cawfa pakhat kha a va tlaih i a salpa pakhat kha a pek i zokzok in a rak can i chumh awkah a rak timh. 8Cawhnuk thawhpat le cawhnuk hring le sa kha a hunh hna i an ei lioah cun thingkung tangin a dirhnawh hna.

9Cun annih nih, “Na nupi Sarah tah khuazei ah dah a si?” an ti. “Thlam chungah khin a um ko,” tiah a leh hna. 10A lengtu hna pakhat nih cun aa thawh i, “Na nupi Sarah nih kumvoi atu tikah hin fapa a hrin lai i cu tikah cun ka ra òhan te lai,” a ti. Sarah nih cun a hnulei innka khan a ngaih ko hna. 11Abraham le Sarah cu an tar ngaingai cang i Sarah cu nuphung hmanh a hngal ti lo. 12Cucaah Sarah cu a ni i, “Atu cu fa ngei dingah ka tar tuk cang, cu lunglawmhnak cu ka hmu ngai hnga maw? Cu pinah ka va zong a tar fawn,” a ti. 13Cun Bawipa nih Abraham cu a thawh i, “Zeicahdah Sarah nih a nih i, ‘Hi tluk i ka tar hnuah hin fa cu ka ngei kho ngai hnga maw?’ a ti? 14Bawipa caah hin zei thil paoh hi a har tukmi a um maw? A caan a tlin tikah kumvoi atu tikah hin na sinah ka ra òhan lai i Sarah nih fapa a hrin lai,” a ti. 15Sarah cu a thin a phang i, ka ni lo, tiah aa pheh. Anih nih, “Na ni ko, na ni hrimhrim ko,” tiah a ti.

Abraham Nih Sodom Khua Caah Thla A Cam

16Mi cu an i thawh i Sodom khua a langhnak hmun ah khan an kal i Abraham zong cu anmah thlahpah ah an sinah a kal ve. 17Cun Bawipa nih amah le amah cu aa thawh i, “Ka thil tuah laimi hi Abraham cu chim loin ka um kho lo. 18A tefa hna cu a ngan i a òhawngmi miphun ah an cang lai i vawlei cung miphun vialte hna nih hin Abraham thluachuahnak ka pekmi bantuk kha kan pe ve tiah an ka hal lai. 19A hmaanmi le a dingmi thil tuah hi ka nawlbia zulh a si ti kha a fale le a hnu i a ra laimi a tefa hna kha a cawnpiaknak hna hnga, amah cu ka thim cang. Cun bia kaa kammi vialte kha ka tuahpiak lai,” tiah a ti. 20Cun Bawipa nih cun, “Sodom le Gomorrah khua hi an thang a chia ngaingai ko i an sualnak cu a ngan ngaingai ko. 21Cucaah kan theihmi thawng hi a hmaan maw hmaanlo ti hngalh awkah ka vung kal hrimhrim lai. A si taktak le si taktak lo kha ka vung hliah lai,” a ti.

22Cun mi kha an i thawh i Sodom leiah cun an kal, sihmanhsehlaw Bawipa cu Abraham sinah khan a taang. 23Abraham nih Bawipa cu a hei naih i, “A sual lomi cu a sualmi hna sinah na thah chih taktak ko hna lai maw? 24Khuapi chungah khan a sual lomi sawm nga um hna seh law na hrawh òhiamòhiam ko lai maw? Sawm nga khamh awkah khan an khua cu na zuah hnga lo maw? 25A sual lomi cu a sualmi hna sinah khan na that bal hna lai lo. Cucu a si kho lo. Nangmah nih cucu na tuah bal ding a si lo. Cu ti a si ahcun, a sual lomi cu a sualmi bantukin pei dantat an si ve kun hnga cu. Cucu a si kho lo. Vawlei cung dihlak bia a ceihtu Dingthlu Lairel nih cun ding tein pei a ceih lai cu,” a ti. 26Bawipa nih cun a leh i, “Sodom khua chung i a sual lomi minung sawm nga ka hmuh hna ahcun, cu sawm nga ruangah cun khua cu a ningpi in ka zuah lai,” tiah a ti.

27Abraham nih khan a hun i thawh òhan i, “Kei cu leidip le vutcam si ko hmanh ning law, Bawipa, nangmah cu ngamh ngaiin kan chawnh hi ka ngaithiam ko. 28Sawm nga si loin sawm li le panga um hna seh law tah zeitindah a si hnga? Panga in an tlawm ruangah cun khua cu na hrawh dih ko hnga maw?” a ti. Bawipa nih cun, “A sual lomi sawm li le panga ka hmuh hna ahcun khua cu ka hrawk lai lo,” a ti. 29Abraham nih cun aa thawh òhan i, “Sawm li lawng um hna seh law tah?” a ti. Anih nih, “Sawm li an um ahcun ka hrawk lai lo,” a ti ve. 30Cun Abraham nih cun aa thawh òhan i, “Bawipa, ka cungah na thin hung sawh hlah. Ka chim rih ko lai. Sawm thum lawng um hna seh law tah?” a ti. Anih nih, “Sawm thum ka hmuh hna ahcun ka hrawk hna lai lo,” a ti. 31Abraham nih cun aa thawh òhan i, “Bawipa, na sinah ngamh ngaiin bia ka chim lengmang hi ka ngaithiam ko. Kul lawng um hna seh law tah?” tiah a ti. Anih nih, “Kul ka hmuh hna ahcun ka hrawk lai lo,” a ti. 32Cun Abraham nih cun, “Bawipa, na thinhung hlah, voi khat in ka chim ko rih lai. Pahra lawng um hna seh law tah?” a ti. Cun anih nih, “Pahra an um ahcun ka hrawk lai lo,” a ti. 33Abraham he bia an i ruah dih cun, Bawipa cu a kal i Abraham zong cu inn ah a òin.

Hakha Common Language Bible

© Bible Society of Myanmar 2006

More Info | Version Index