Search form

LEVITIKAS 1

Khangh Thawinak Kong

1Bawipa nih Moses cu a kawh i tonnak thlam chungin a chawnh i hi bangin a ti: 2“Israel mi hna sinah cun chim law, annih sinah: Nannih lakah ahohmanh nih Bawipa sinah pekchanhnak nan tuah tikah saòil pekchanhnak cu cawrun chungin siseh, tuurun chungin siseh, nan rak put lai, ti hna.

3“A pekchanhnak cu cawrun chungin khangh thawinak a si ahcun, a tum do a tlami kha pek a si lai; Bawipa hmaiah amah cu cohlan a si nakhnga tonnak thlam innka ah cun a pek lai; 4amah nih khangh thawinak sa a lu cungah cun a kut a chiah lai i amah caah remnak tuahnak caah cohlanpiak a si lai. 5Cun Bawipa hmaiah cawtum kha a thah lai i Aaron fapa hna, tlangbawi hna nih khan, sa thi cu an pek lai i, tonnak thlam innka i a ummi biakòheng kha a velchum in an theh lai. 6Cun khangh thawinak sa cu a phaw a hawh lai i a can cikcek lai; 7cun tlangbawi Aaron fapa hna nih cun biakòheng cungah cun mei an kau lai i a ningcang tein mei cungah cun thing an chiah lai; 8cun Aaron fapa hna tlangbawi hna nih cun biakòheng cung mei cung thing cungah cun sazam hna cu, a lu le a thau cu a ningcang tein an chiah hna lai; 9sihmanhsehlaw a chungril hna le a ke hna cu ti in an òawl hna lai. Cun tlangbawi nih a dihlak in khangh thawinak caah biakòheng cungah a khangh lai; mei in thawinak, Bawipa caah rimthaw a si lai.

10“Khangh thawinak ca i a pekchanhmi cu tuurun chungin siseh, meheh run chungin siseh a si ahcun, a tum dotla a si lai; 11cun Bawipa hmaiah a ummi biakòheng chaklei kamah a thah lai i Aaron fapa hna tlangbawi hna nih khan a thi cu biakòheng kha a velchum in an theh lai. 12Cun a can cikcek lai, a lu he a thau he, cun tlangbawi nih biakòheng cung mei cung thing cungah cun a ningcang tein a chiah hna lai; 13sihmanhsehlaw a chungril le a ke hna cu ti in a òawl hna lai. Cun tlangbawi nih a dihlak te cun a pek lai i biakòheng cungah a khangh lai; khangh thawinak, mei in thawinak, Bawipa caah rimthaw a si lai.

14Bawipa sin i a pekchanhmi cu vate khangh thawinak a si ahcun, a pekchanhmi òhuro si hna seh laileng no si hna seh a rak put hna lai. 15Cun tlangbawi nih biakòheng ah a rak put lai i a lu cu cat lak in a merh lai i biakòheng cungah a khangh lai; cun a thi cu biakòheng sirah cun a thlor lai; 16cun a cok cu a hmul he a lak lai i biakòheng pawng i nichuahlei kam vutcam chiahnak hmun ah cun a hlonh lai; 17a thlaki a thlongh hna lai, sihmanhsehlaw a pum cu a cheu lai lo. Cun tlangbawi nih biakòheng cungah cun, mei cung thing cungah cun a khangh lai; mah cucu khangh thawinak, mei in thawinak, Bawipa caah rimthaw cu a si.

Hakha Common Language Bible

© Bible Society of Myanmar 2006

More Info | Version Index