Search form

LEVITIKAS 9

Aaron Nih Raithawinak A Pekchanh

1Ni riat ni ah Moses nih Aaron le a fapa hna le Israel upa hna kha a auh hna i 2Aaron sinah, “Cawtum no pakhat in sual thawinak caah, cun khangh thawinak caah tuukawng pakhat, dotla veve, la hna law, Bawipa hmaiah thawi hna. 3Cun Israel mi hna sinah, ‘Sual thawinak caah meheh tum pakhat le, khangh thawinak caah cawfa pakhat le tuufa pakhat, kum khat veve a si i dotla veve a simi le, 4daihnak thawinak hna caah cawtum pakhat le tuukawng pakhat la hna law, Bawipa hmaiah thawi hna, cun chiti he cawhmi changvut thawinak zong; zeitintiah nihin ah Bawipa cu nannih sinah a lang lai,’ tiah ti hna,” tiah a ti. 5Cun Moses nih nawl a pekmi cu tonnak thlam hmaiah an hun hruai hna i aa pummi nih an dihlak in an hun naih i Bawipa hmaiah an dir. 6Cun Moses nih, “Mah hihi Bawipa nih tuah awkah nawl an pekmi hna cu a si; cun Bawipa sunparnak cu nannih sinah a lang lai,” tiah a ti. 7Cun Moses nih Aaron sinah, “Biakòheng cu hei naih law, na sual thawinak le na khangh thawinak cu thawi hna, cun nangmah le mi hna caah remnak ser tuah; cun mi hna thawinak cu rak pu law, an caah remnak ser tuah, Bawipa nawl peknak bang khan,” tiah a ti.

8Cu caah Aaron nih biakòheng cu a hei naih i sual thawinak cawfa kha a thah, mah cucu amah caah a si. 9Cun Aaron fapa hna nih a thi kha a sinah an rak put i thi chungah cun a kutdong a hnim i biakòheng ki ah cun a neh i thi cu biakòheng hram ah cun a thlet; 10sihmanhsehlaw sual thawinak sa i a thau le a kal hna le a thin tuamtu hna cu Bawipa nih Moses nawl a pek bang khan, biakòheng cungah a khangh. 11A sa le a phaw cu mei in riahhmun lengah a khangh hna.

12Cun, khangh thawinak cu a thah i Aaron fapa hna nih a thi cu an pek i biakòheng cu a velchum in a theh. 13Cun khangh thawinak sa cu a zamzam in a lu he an hun pek i biakòheng cungah a khangh hna. 14Cun a chungril le a ke kha a òawl hna i khangh thawinak he biakòheng cungah a khangh hna.

15Cun mizapi thawinak cu a pek; sual thawinak meheh, mizapi ca i a simi cu, a lak i a thah i sualnak caah a thawi, sual thawinak hmasa bik bang khan a tuah. 16Cun khangh thawinak kha a pek i a phunglam ning in a thawi. 17Cun changvut thawinak kha a pek; pei khat in a lak i zinglei khangh thawinak hleiah biakòheng cungah a khangh.

18Cawtum le tuukawng zong kha a thah hna, mah cucu mi zapi ca i daihnak thawinak an si. Aaron fapa hna nih a thi cu an pek i biakòheng cu a velchum in a theh. 19Cun cawtum thau le tuutum thau le, a thaumi mei le, chungril tuamtu le, kal hna le, thin tuamtu cu an pek i 20an thau cu an ii cungah an chiah hna i an thau cu biakòheng cungah a khangh, 21sihmanhsehlaw an ii le a orhlei phei cu Bawipa hmai i hninh thawinak caah Aaron nih a hninh hna, Moses nawlpek bangin.

22Cun Aaron nih mi zapi leiah cun a kut a hler hna i thluachuah a pek hna. Cun sual thawinak le khangh thawinak le daihnak thawinak hna a thawi dih in a rung òum. 23Cun Moses le Aaron cu tonnak thlam chungah an lut i an hung chuah tikah mi zapi kha thluachuahnak an pek hna i, Bawipa sunparnak cu mi vialte sinah cun a lang. 24Cun Bawipa hmaika in mei a hung chuak i biakòheng cung i khangh thawinak le thau cu a kangh hna; cun mi vialte nih khan an hmuh tikah an au i an bawk.

Hakha Common Language Bible

© Bible Society of Myanmar 2006

More Info | Version Index