Search form

MATTHAI 27

Jesuh Cu Pilat Hmaiah An Chuahpi

(Mar 15.1; Luk 23.1-2; Jhn 18.28-32)

1Zingkate ah tlangbawi upa pawl vialte hna le Judah upa hna cu an i pum i Jesuh thahnak ding khua kha an khang. 2Cikcin in an khih i an hei kalpi i Mangki bawi Pilat sinah khan an pek.

Judas Thihnak

(Lam 1.18-19; Zek 11.12-13)

3Jesuh a leitu Judas nih khan Jesuh cu thah awkah sual an phawt ti kha a hngalh tikah a sualnak kha aa ngaihchih i ngun tangka sawm thum kha aa lak i tlangbawi upa pawl le Judah upa hna kha a va pek òhan hna. 4“A sual lomi thihnak ka phakter kha ka sual,” tiah a ti. Sihmanhsehlaw annih nih cun an rak thawh i, “Cucu kan zeidah a poi? Nangmah nih naa tuahnak in vaa tuah ko,” tiah an rak leh. 5Judas nih tangka cu hmunthiang chungah khan a vun hlonh i a kaltak; cun a chuak i a vaa awk.

6Tlangbawi upa hna nih cun tangka cu an char i, “Hi tangka hi thisen man tangka a si, cucaah Biakinn Tangka chiahnak i chiah ve cu kan Phung he aa ralchanh,” tiah a ti. 7An i ceih dih hnuah tangka cu Um Sertu Lo timi cawknak ah khan an hman i cu lo cu ramdang mi hna thlan mual ah a cang. 8Cu nih cun Thisen Lo timi sullam kha a fianter i cu hmun cu nihin ni tiang hin Thisen Lo ti cun auh a si. 9Cuticun profet Jeremiah nih a rak chimmi kha a hung tling. A chimmi cu: “Israel mi hna nih, cu pa man cu cu zat in si seh, tiah an khiahmi ngun tangka sawm thum kha an i lak i 10um sertu lo cawknak ah khan, Bawipa nih a ka fial bangin, an hman,” ti hi a si.

Pilat Nih Jesuh Bia A Hal

(Mar 15.2-5; Luk 23.3-5; Jhn 18.33-38)

11Mangki bawi hmaiah cun Jesuh cu a dir i mangki bawipa nih cun, “Judah siangpahrang cu na si maw? tiah a hal. “Na chim ko cu ta,” tiah Jesuh nih a leh. 12Tlangbawi upa pawl le Judah upa hna nih sual an puhmi tu cu zeihmanh a let hna lo. 13Cucaah Pilat nih cun a thawh i, “Sual an in puhmi vialte hi na thei lo maw?” tiah a ti. 14Sihmanhsehlaw Jesuh nih bia kaa khat hmanh a let duh lo i mangki bawipa cu a khuaruah a har ngaingai.

Jesuh Thah Awk Bia An Khiah

(Mar 15.6-15; Luk 23.13-25; Jhn 18.39§19.16)

15Lanhtak Puai caan ah hin Mangki bawipa nih cun, mi zapi nih chuak seh ti an duhmi thongtla pakhat kha a chuahpiak tawn hna. 16Cu caan ah cun thongtla pakhat, zapi nih an hngalh ngaimi a um i a min cu Jesuh Bar-Abbas a si. 17Cucaah mi zapi cu an hun i pumh tikah khan Pilat nih cun, “Jesuh Bar-Abbas le Jesuh Messiah ah hin, aho deuh hi dah in chuahpiak hna ning law nan duh?” tiah a hal hna. 18Pilat nih khan Jesuh ka kut chung i an ka pek hi an nahchuah caah a si ti kha fiang tein a hngalh.

19Pilat cu biaceihnak khaan chung i a òhut lioah khan a nupi nih bia a hun cah i, “Kha mipa, sualnak zeihmanh a tuah lomi kha zei ti hmanh in rak ti hlah; zeicahtiah zahan ah ka mang in kha pa ruangah khan sifahnak tampi ka in,” tiah a ti.

20Tlangbawi upa pawl le upa hna nih khan mizapi cu Pilat kha, Bar-Abbas kan thlahpiak, tiah nan hal lai i Jesuh kha that, tiah nan ti lai, tiah an lem khawh hna. 21Sihmanhsehlaw mangki bawipa nih cun, “Hi hna pahnih lakah hin, aho hi dah kan thlahpiak seh, ti nan ka duh?” tiah a hal hna. Annih nih Bar-Abbas tiah an leh. 22Cun Pilat nih cun, “Khrih timi Jesuh cu zeitindah ka tuah kun lai?” tiah a hal hna. Annih nih, “Vailam ah khenh chih ko,” tiah an leh. 23Sihmanhsehlaw Pilat nih cun, “Zei sualnak dah a tuah?” tiah a vun hal hna. Cu tikah fak piin an au ciammam i, “Vailam ah khenhchih ko,” an ti. 24Pilat nih cu ti i ti lengmang cu zeihmanh san a tlai ti lo i mizapi nih hnahnawhnak lam an chuahter lai ti kha a hmuh tikah, ti kha aa lak i mizapi hmaiah cun a kut aa òawl i, “Hi misual lopa thihnak kong ah hin kei cu ka thiang, nanmah tuahmi a si,” tiah a ti. 25Mizapi nih cun an dihlak in, “Hi pa thahnak ruang i dantatnak cu kanmah le kan tefa hna cungah tlung ko seh,” an ti. 26Cu tikah Pilat nih Bar-Abbas cu a thlahpiak hna i Jesuh cu fung in a tukter hna i vailam thing i thir in khenh awkah a pek hna.

Ralkap Nih Jesuh An Cawhdeh

(Mar 15.16-20; Jhn 19.2-3)

27Cun Pilat ralkap pawl nih khan Jesuh cu mangki bawi innpi chungah khan an luhpi i an kampani dihlak in an kulh. 28A puan kha an phoih i puan sen an aih. 29Cun hling nge in bawi luchin kha an phiar i a lu ah an chinh. A orhlei kut ah fung an putter. Cun a hmaiah an kun i an cawhdeh i, “Judah Siangpahrang cu saupi nung ko seh,” tiah an au; 30cil an chak i fung cu an chuh i a lu ah khan an tuk nak. 31An cawhdeh dih hnuah puan sen kha an phoih i amah puan kha an aihter òhan i vailamtahnak i khenh chih dingah an chuahpi.

Jesuh Thing Ah An Khenhchih

(Mar 15.21-32; Luk 23.26-43; Jhn 19.17-27)

32Cun lam ah khan Sairin khuami Simon kha an ton i a vailam tahnak thing kha hramhram in an putter. 33Golgotha an timi hmun kha an va phan i (Golgotha ti a sullam cu Lu Ruh Hmun tinak a si), 34mitsur hang, hnitkha he cawhmi, kha an pek; a vun teh i a ding duh lo.

35Vailam ah cun an khenh chih i a thilpuan kha phe ah an i kah i an i òhen. 36Cun an òhu i an cawngh. 37A lu cungah cun sual an phawtnak bia an òialmi kha an benh. Cu bia cu: “Hihi Jesuh, Judah Siangpahrang cu a si,” ti hi a si. 38Cun Jesuh sinah cun mifir pahnih an tah ve hna; pakhat a orhlei ah pakhat a kehlei ah.

39Cun aa chawkmi paoh nih khan an lu an thinhnawh i an bia-eng in, 40“Biakinnpi hmanh pei ka òheh lai i ni thum ah ka sak òhan dih lai, na rak ti kha. Pathian Fapa na si ahcun nangmah cu i khamh kun ngat. Vailamtahnak cung khan ta, na rung òum kun,” an ti. 41Cu bantuk òhiamòhiam cun tlangbawi upa hna le Phungbia cawnpiaktu saya hna le upa hna nih khan an cawhdeh ve i 42“Midang cu a khamh òung hna, amah vial aa khamh kho òung lo. Israel Siangpahrang cu a si kun lo maw? Vailam tahnak cung khan atu te ah hin rung òum seh law pei kan zumh hnga cu. 43Pathian kha aa bochan i Pathian Fapa ka si a ti. Pathian nih a khamh le khamh lo kan zoh fam lai ta!” an ti. 44A sin i mifir an tah vemi hna hmanh nih khan cu bantuk cun an nihsawh ve.

Jesuh Thihnak

(Mar 15.33-41; Luk 23.44-49; Jhn 19.28-30)

45Chun in zanlei suimilam pathum tiang cu ram cu a dihlak in muihnak nih a khuh i 46suimilam pathum tluk ah khin Jesuh cu a au i, ”Eli, Eli, lema sabakthani,“ a ti, a sullam cu, “Ka Pathian, ka Pathian, zeicahdah na ka kaltak,” ti a si. 47Cu ka i a dirmi a cheukhat nih khan an theih i, “Elijah a auh cuh,” an ti. 48Pakhatpa cu khulrang in a va tli i puanchia kha aa lak i mitsur hang ah a hnim i fung par ah a òemh i dawpter a hun zalh. 49Sihmanhsehlaw a dang nih khan, “Um rih, amah kha khamh awkah Elijah cu a rat le rat lo kan zoh rih lai,” an ti. 50Jesuh cu fak piin a au òhan i a cat colh.

51Khi tikah Biakinn chung puanzar kha a lu in a taw tiang aa cheu. Vawlei kha aa hnin, lung kha an i cheu i 52thlan kha an i hung; Pathian mi a rak thi ciami tampi kha an tho òhan. 53Thlan khan an chuak i Jesuh cu thihnak in a thawh òhan hnuah Khua Thiang chungah khan an lut i mi tampi nih an rak hmuh hna.

54Jesuh a cawngtu ral bawi le a sin i a ummi ralkap hna nih khan lihnin le thil dang a ummi vialte kha an hmuh tikah an thla a hlauh hna i, “Hi mi hi Pathian Fapa a si hrimhrim ko,” an ti. 55Galilee ram mi Jesuh a rak zul tawnmi hna le a rak bawm tawntu nu tampi nih khan a langin an cuanh. 56Cu hna lakah cun Mary Magdalin, Jeim le Josef nu Mary le Zebedi fapa hna i an nu kha an i tel.

Jesuh Vuinak

(Mar 15.42-47; Luk 23.50-56; Jhn 19.38-42)

57Zanlei sang a si tikah khin Arimathea khua mirumpa pakhat a ra phan. A min cu Josef a si i amah zong cu Jesuh zultu pakhat a si ve. 58Pilat sinah khan a vung lut i Jesuh ruak kha a hal. Pilat nih Jesuh ruak cu Josef kha pe u, tiah a ti hna. 59Cucaah Josef nih cun a lak i khiangrang puan tharte in a tuam i 60amah thlan ca i lungkua ah a cawhmi thlan tharte ah cun a vui. Cun lung nganpi kha thlan khar ah cun a khar i a kal. 61Mary Magdalin le Mary dang pakhat kha, cuka ah cun, thlan lei hoih khan an òhu.

Thlan Cawngtu Hna

62A thaizing ah, (cucu Cawnningani a hun changtu ni ah khan) tlangbawi upa pawl kha le Farasi mi hna nih khan Pilat kha an va ton i, 63“Bawipa, hi milihchim pa nih hin a nun lioah, ‘Ni thum hnuah thawhter ka si òhan lai,’ a rak ti kha kan hngalh. 64Cucaah cun thlan kha ni thum tiang òha tein cawng hna seh; cu ti a si lo ahcun, a zultu hna nih khan an va kal riangmang lai i a ruak kha an va fir lai i, thihnak in thawhter a si cang, tiah mi kha an chimh ko hna lai i a donghnak i a kan hlennak hi a hmasa i a kan hlennak nakkhan a chia deuh sual lai,” an ti. 65Pilat nih cun, “Ralvengtu nan ngeih ko hna kha ta. Va kal u law a him khawh chung him in va tuah ko ngat u,” tiah a ti hna. 66Cucaah an va kal i thlan cu him tein an cawnghter hna; lung kha ca an khenh i ralvengtu pawl kha, run veng u, an ti hna.

Hakha Common Language Bible

© Bible Society of Myanmar 2006

More Info | Version Index