Search form

NAMBAR 11

Bawipa Nih Manna le Nimte A Thlak Hna

1Cun mi hna nih cun Bawipa theih ah sifah retheih an innak ruangah khan an zai; mah cucu Bawipa nih a theih tikah a thinhunnak cu a alh i Bawipa mei cu annih lakah a kang i riahhmun kikam i a ummi riahbuk a cheu khat hna cu an kang dih. 2Cu tikah mi nih Moses cu an auh i, Moses nih Bawipa sinah thla a cam i mei cu a dai. 3Cucaah cu ka hmun min cu, Bawipa mei cu annih lakah a kangh caah Taberah ti a si. 4Cun annih lak i phun dang mi he aa cawhmehmi hna cu sa an haw ciammam i Israel mi hna zong cu an òap òhan i, “Sa ei awk hei ngei u si law mu! 5Man lo i Izipt ram i ngasa kan ei le zil le phazeti le purun le piat le vankhawng kha kan hei ngai hna dah; 6sihmanhsehlaw atu cu kan thazang a car dih i hi manna hi dah ti lo cu zeihmanh zoh awk a um lo,” tiah an ti.

7Manna cu koriander mu bantuk a si i a mui cu rili lungvar bantuk a si. 8Mi nih an char hna i rialnak lung in an rial hna, asiloah sum ah an phomh hna i um in an chuan hna i chang ah an ser hna; ei ah hin chiti he rawhmi chang bantuk a si. 9Zan i riahhmun i dap a tlak ah hin manna cu a tla ve.

10Moses nih mi hna cu an innchungkhar cio i an òah i an pale hna an thlam innka i an òah kha a theih i Bawipa thinhunnak cu a alh in a alh i Moses cu a lung a lawm lo. 11Moses nih Bawipa sinah, “Zeicahdah na sal hi òhalo in na ka tuah? Zeicahdah na mit ka tlin lo i hi mi vialte hna phorhrit hi ka cungah na ka khinh? 12Hi mi vialte hi ka rak pawi hna maw? ‘Nau cawnghramtu nih nau hnuktlai lio a cawi bangin na òang ah cawi hna law, an pupa hna sinah pek awkin chiat ka sermi ram ah kalpi hna,’ na ti cu keimah nih maw ka hrin hna? 13Hi mi vialte pek awkah hin khuazei in dah sa cu ka hmuh lai? Zeitintiah an ka òahhnawh i, ‘Kan ei awk caah sa kan pe,’ tiah an ti. 14Hi mi hna hi keimah lawng nih ka pua kho hna lo, mah thil hi ka caah a rit tuk. 15Mahtihin na ka tuah ding a si ahcun, hmakhatte ah ka that ko, na mithmai ah velngeihnak ka hmuh a si ahcun, ka retheihnak kha ka hmuhter hlah,” tiah a ti.

16Cun Bawipa nih Moses sinah cun, “Israel upa hna lakin pa sawm sarih, nangmah nih mi hna cung i upa le bawi an si ti i na hngalhmi cu ka sinah ratpi tuah hna; cun tonnak thlam ah ratpi hna law, khika ah nangmah sinah dirter hna. 17Cun ka rung òum lai i khika ah nangmah he kan i chawn lai; cun nangmah cungah a ummi thlarau cu tlawmpal in ka lak lai i an cungah ka chiah lai i nangmah lawng nih na phorh nakhnga lo, mi hna thil cu an in phorhpi lai. 18Cun mi hna cu, ‘Thaizing caah i thianh u law, sa nan ei lai; zeicahtiah Bawipa theih ah nan òap i, “Aho nih dah ei awk sa a kan pek lai? Izipt ram vial ah khan kan va nuam òung,” ti i nan ti caah. Cucaah Bawipa nih sa an pek hna lai i nan ei lai. 19Ni khat lawng maw, ni hnih lawng maw, ni nga lawng maw, ni hra lawng maw, ni kul lawng maw, nan ei lai lo, 20sihmanhsehlaw thla khat ning piin nan ei lai, nan hnarkua i a chuah i nan ca i fihnung a si tiangin, zeicahtiah nan lak i a ummi Bawipa cu nan hlawt i a hmaiah, “Zeicahhen Izipt ram khan kan rak chuah,” tiin nan òah caah,’ tiah ti hna,” tiah a ti. 21Sihmanhsehlaw Moses nih, “Keimah zong kaa tel venak mi hna hi, ke kal lawngte hmanh sing ruk an si; cun nang nih, ‘Sa ka pek hna lai, thla khat pumte an ei lai,’ tiah na ti. 22Tuu runrun le caw runrun maw an i zat awkah thahpiak an si lai? Asiloah, rili chung nga vialte maw an i zat awkah pumhpiak an si lai?” tiah a ti. 23Cun Bawipa nih Moses sinah cun, “Bawipa kut cu a tawi hlah maw? Nannih ca i ka bia bangin a tlin le tlin lo cu na hmuh ko lai,” tiah a ti.

24Cucaah Moses cu a chuak i Bawipa bia kha, mi cu a chimh hna; cun Israel upa hna chungin sawm sarih kha a pumh hna i thlam velchum ah khan a chiah hna. 25Cu tikah Bawipa cu minmei khan a rung òum i amah cu a chawnh i amah cung i a ummi thlarau kha tlawmpal in a lak i upa sawm sarih cungah khan a chiah; cun thlarau nih annih cungah a um tikah annih nih bia an chim cukmak. Sihmanhsehlaw cu bantuk cun an tuah òhan ti lo.

26Riahhmun ah mi pahnih an rak tang i pakhat cu a min ah Eldad a si i pakhat cu a min ah Medad a si i, annih cungah thlarau kha a um; annih cu minthlakmi lakah khan aa telmi an si ve nain thlam ah khan an kal lo i cucaah riahhmun ah khan bia an chim cuahmah ko. 27Tlangval pakhat nih a va tli i Moses kha, “Eldad le Medad nih riahhmun chungah bia an chim cuahmah ko,” tiah a chimh. 28Nun fapa Joshua, a tlanval lio in Moses rian a òuantu nih khan, “Ka bawipa Moses, thlauh hna,” tiah a ti. 29Sihmanhsehlaw Moses nih anih cu, “Keimah ca lawngin dah ra na ruah hi? Bawipa mi vialte hi profet si dih in, annih cungah Bawipa nih a thlarau chia seh law ka hei tinak lakah cun!” tiah a ti. 30Cun Moses le Israel upa hna cu riahhmun ah an kir.

31Cun Bawipa sinin thli a hrang i rili in nimte kha a ratpi hna i riahhmun pawngah cun a tlakter hna, hika leiah ni khat kal tluk, khika lei ah ni khat kal tluk, riahhmun cu a velchum in, vawlei ah dong hnih tluk chah in a tlakter hna. 32Cun cu ni cu chun nitlak, zan khuadei, cun a thaizing zong, mi cu an tho i nimte cu an char hna; a tlawm bik a charmi nih homer pahra an char i anmah ca cio ah riahhmun a velchum ah cun an car hna. 33Sa cu an ha karlak i a um lioah, an ei dih hlanah mi hna cungah cun Bawipa thinhunnak a alh i, Bawipa nih mi hna cu rai òhalo in a hrem hna. 34Cucaah cu ka hmun min cu Kibroth-hattaavah, tiah ti a si; zeicahtiah khika ah khan sa a hawmi kha an vui hna. 35Kibroth-hattaavah in Hazeroth ah an kal i Hazeroth ah cun an cam.

Hakha Common Language Bible

© Bible Society of Myanmar 2006

More Info | Version Index