Search form

NAMBAR 15

Pekchanhnak Kong Phungbia

1Bawipa nih Moses cu, 2“Israel mi hna sinah hi bangin va chim tuah, Nannih nih nan umhnawh laimi ram nannih kan pekmi hna nan phak tik le, 3Bawipa sinah tuurun in siseh, cawrun in siseh, mei in pekchanhnak maw, khangh pekchanhnak maw, raithawinak maw, biakamnak tlinternak maw, mah lungtho tein pekchanhnak caah maw, a caan khiahmi nan puai hna ah maw, Bawipa sinah rimthaw nan ser tikah, 4cu tikah Bawipa sinah a pekchanhnak a petu paoh nih changvut pekchanhnak i changvut dip ephah cheu hra cheu khat, chiti hin cheu li cheu khat he cawhmi kha a pek lai; 5cun khangh thawinak ah siseh, raithawinak ah siseh, tuufa pakhat cio caah mitsur hang hin cheu li cheu khat na timh lai, cucu thlet thawinak caah a si. 6Cun tuukawng a si ahcun, changvut thawinak caah changvut dip ephah cheu hra cheu hnih, chiti hin cheu thum cheu khat he cawhmi cu na timh lai i 7thlet thawinak caah cun mitsur hang hin cheu thum cheu khat na pek lai, Bawipa caah rimthaw a si lai. 8Cun khangh thawinak caah siseh, biakam tlinternak ca i raithawinak caah siseh, Bawipa sin i daihnak thawinak hna caah siseh cawtum na timh tikah, 9cu tikah cu cawtum he cun changvut thawinak changvut dip ephah cheu hra cheu thum, chiti hin cheu he cawhmi cu, na pekchanh lai i, 10thlet thawinak caah mitsur hang hin cheu, mei in pekchanhnak caah, na pek lai, Bawipa caah rimthaw a si lai.

11“Hi bangin cawtum siseh, tuukawng siseh, tuufa a pa siseh, meheh fa siseh, pakhat cio caah tuah a si lai. 12Nan timhmi hna an tam an tlawmning in, cu bantukin an tam an tlawmning in nan tuah lai. 13Mei in thawinak, Bawipa sin i rimthaw cu, pekchanh tikah, mah miphun a si taktakmi vialte nih hi thil hna hi, hi bangin an tuah lai. 14Cun khual pakhatkhat nih an tlawn hna ah siseh, nan tefa chin tiangin mi pakhatkhat nan sinah a um ah siseh, cu pa nih cun mei in thawinak, Bawipa sin i rimthaw cu, pekchanh a duh ahcun nanmah tuah bangin a tuah ve lai. 15Hi mibu chungah, nannih caah le nannih an pemmi hna khual caah nawlbia pakhat a si lai, nan tefa chin tiangin a dong lo nawlbia a si lai. Bawipa hmaiah mipem zong cu nanmah bantuk an si ve lai. 16Nanmah le nan sin i a ummi phundang mi hna caah phungbia aa khat phunglam aa khat a si lai,” tiah a chimh.

17Bawipa nih Moses cu a chawnh i, 18“Israel mi sinah hitin va chim tuah, nannih kan kalpi hnanak ram chungah nan luh tikah, 19cun cu ram rawl nan ei tikah, Bawipa sinah pekchanhnak nan tuah lai. 20Nan hmuh hmasa bikmi fang chungin pekchanhnak caah changreu hlum khat nan pek lai; phuhri chung i pekchanhmi bantukin nan pek lai. 21Nan hmuh hmasa bikmi fang chungin nan techin fapar tiangin Bawipa sinah pekchanhnak nan tuah lai.

22“Sihmanhsehlaw nan palh i Bawipa nih Moses sinah a chimmi nawlbia vialte, 23Bawipa nih nawlbia an pek ni hna thawk khan nan tefa chin tiang ca in Bawipa nih Moses in nawl an pekmi vialte hna cu nan ulh lo i 24mibu nih hngalh loin tuah sual a si ahcun, a pummi vialte nih khangh thawinak, Bawipa sin i rimthaw caah cawtum no pakhat nan pek lai; a phunglam ningin a changvut thawinak le a thlet thawinak he, cun meheh a pa pakhat sual thawinak caah nan pek lai. 25Palhnak a si ca i Bawipa sinah mei in thawinak le Bawipa hmaiah an sual thawinak, an palhnak caah an rak put cang caah, tlangbawi nih Israel mibu ningpi caah cun remnak a ser lai i ngaihthiam an si lai. 26Cun Israel mi cu an bu ningin ngaihthiam an si lai, anmah lak i a pemmi khual zong, zeicahtiah cu palhnak ah cun an zapi in an i tel dih.

27“Mi pakhatkhat nih hngalh loin a sual sual ahcun, sual thawinak caah meheh a nu kum khat a timi a pekchanh lai. 28Cun tlangbawi nih, palhnak a tuahmi caah khan Bawipa hmaiah remnak a ser lai; cu pa nih hngalh loin a sual tikah remnak a serpiak lai i ngaihthiam a si lai. 29Hngalh loin palhnak a tuahmi caah phungbia pakhat lawnglawng nan ngei lai, amah cu Israel mi taktak a si ah siseh, an lak i a pemmi khual a si ah siseh. 30Sihmanhsehlaw ahohmanh nih, Israel mi taktak a si ah siseh, mipem a si ah siseh, lungpuam in sualnak a tuah ahcun, Bawipa kha a thangchiat a si, cu pa cu a mi hna lakin hlonh a si lai. 31Bawipa bia kha a nautat caah le a nawlbia kha a buar caah cu pa cu hlonh hrimhrim a si lai; a òhat lonak cu amah cungah a si lai,” tiah a ti.

Sabbath Buarmi Thahnak

32Israel mi hna cu ramlak ah an um lioah khan sabbath ni ah thing a khawmmi pakhat an hmuh. 33Cun thing a khawmh lio a hmutu hna nih khan Moses le Aaron le a pummi vialte sinah khan an ratpi. 34Thong ah an thlak, zeicahtiah a cungah zeidah tuah awk a si lai ti kha a fiang rih lo. 35Cun Bawipa nih Moses cu a chawnh i, “Mipa cu thah a si lai; a pummi vialte nih riahhmun lengah lung in an cheh lai,” tiah a ti. 36Cun a pummi vialte nih riahhmun lengah an chuahpi i Bawipa nih Moses nawl a pek bangin lung in thi lakin an cheh.

Puantlang Hmum

37Bawipa nih Moses cu a chawnh i, 38“Israel mi hna sinah hi bangin va chim law, an puan ki ah a hmumbor serter hna, an tefa chin tiangin, cun a ki kip i a hmumbor cu la dum in thlaih hna seh; 39cun nannih nih hmumbor kha nan zoh lai i Bawipa nawlbia vialte kha tuah awkah nan hngalh òhan lai, i sum loin zulh nan duh tawnmi nanmah nan lung duhnak le mit duhnak kha nan zul ti lai lo. 40Cucaah nannih nih ka nawlbia vialte cu nan hngalh camcin lai i nan tuah lai i nan Pathian sinah nan thiang lai. 41Nan Pathian si awkah Izipt ram in an chuahpitu hna Bawipa nan Pathian cu ka si: keimah cu Bawipa nan Pathian ka si,” tiah a ti.

Hakha Common Language Bible

© Bible Society of Myanmar 2006

More Info | Version Index