Search form

NAMBAR 20

Lungpi Chungin Ti A Chuak

(Exo 17.1-7)

1Cun Israel mi hna cu, an bu ningin, thla khatnak thla ah Zin ramlak ah an lut i Kadesh ah an um; cu ka ah Miriam cu a thi i cu ka ah cun an vui.

2Cun cu mibu caah cun ti a um lo i Moses le Aaron cu an pumhhnawh hna. 3Cun mi nih Moses cu bia an chuah i, “Kan unau hna Bawipa hmai i an rak thih ah khan zeicahdik kan rak thih ve ko lo! 4Zeicaahdah Bawipa mibu cu ramlak ah hin na kan luhpi i hika ah hin kanmah he kan saòil he kan thih ko lai? 5Cun zeicaahdah hi hmun òhalo i phakpi awkah Izipt ram in na kan chuahter? Mah hmun hi rawl siseh, theipi siseh, mitsur ruang siseh, taleti siseh a umnak a si lo i din awk ti zong a um fawn lo,” an ti. 6Cun Moses le Aaron cu aa pummi bu sin cun tonnak thlam innka ah an kal i an bawk. Cun Bawipa sunparnak cu an sinah a lang i, 7Bawipa nih Moses sinah cun, 8Òhiangòhunh kha i lak law, mibu kha pum tuah hna, nangmah he na u Aaron he, cun lungpi kha a ti chuahter dingin an hmaiah chim; cu bangin lungpi chungin an caah ti na chuahter lai; cu bangin mibu le an saòil cu din awk na pek hna lai,” tiah a ti. 9Moses nih Bawipa hmai i òhiangòhunh cu nawl a pek bang khan a lak.

10Cun Moses le Aaron nih mibu cu hmunkhat ah lungpi hmaiah cun an pumh hna i annih sinah, “Nannih ralchanh hmangmi hna, ngai tuah u; hi lungpi chung hin nan caah ti kan chuahter lai maw?” tiah a ti. 11Cun Moses nih a kut a hler i lungpi cu a òhiangòhunh khan voi hnih a tuk i ti tampi a chuak i mibu le an saòil nih an din. 12Cun Bawipa nih Moses le Aaron cu, “Nan ka zumh lo i Israel mi hna mithmuh ah nan ka thianter lo caah, cucaah nannih nih cun hi mirun hi ka pekmi hna ram chungah nan luhpi hna lai lo,” tiah a ti hna. 13Mah hihi Meribah ti cu an si, Israel mi hna nih Bawipa cu bia an chuah i annih lak i a thiannak a langhternak hmun kha, a si.

Edom Nih Israel Lam A Kham

14Moses nih Kadesh in Edom siangpahrang sinah lamkal a hei thlah hna i, “Hi bangin nan unau Israel mi nih an ti: Kan cung i vanchiatnak a tlungmi vialte cu na hngalh ko: 15kan pupa nih Izipt ram ah an vung kal i Izipt ram ah saupi kan um i Izipt mi hna nih fak piin kanmah le kan pupa hna kha an kan hrem; 16cun kannih nih Bawipa kha kan auh tikah kan aw kha a theih i vancungmi pakhat a run thlah i Izipt ram in a kan chuahpi; atu cu hika ah hin na ramri i a ummi Kadesh khua ah kan um. 17Cucaah na ram hi kan tanter ko sawh. Lo siseh mitsur dum siseh kan tanpah hna lai lo, tikhor ti zong kan ding lai lo; Siangpahrang Lampi kha kan zulh lai i orhlei ah siseh kehlei ah siseh kan i mer lai lo, na ram kan tan dih hlantiang cu,” tiah a ti. 18Sihmanhsehlaw Edom nih, “Na lan kho hnga lo, vainam he kan chuahhnawh sual hnga,” tiah a ti. 19Cun Israel mi hna nih amah cu, “Lampi kha kan zul ko lai i kanmah le kan saòil nih na ti kan din ahcun a man kan in pek lai; ke in a lanh lawng kan lanhter ko, thil dang zeihmanh kan ti lai lo,” tiah an ti. 20Sihmanhsehlaw anih nih, “Na lan kho hnga lo,” tiah a ti. Cun Edom nih mi tampi le a òhawngmi ralkapbu he a chuahhnawh hna. 21Cu bangin Edom nih Israel cu a ram chung i lanh kha a thlauh; cu caah Israel nih amah kha a hrial.

Hor Tlang Ah Aaron A Thi

22Cun Kadesh in Israel mi hna cu an bu ning piin an chuak i Hor Tlang kha an phan. 23Bawipa nih Moses le Aaron cu, Edom ramri ah a ummi Hor Tlang ah khan a chawnh hna i, 24“Aaron cu a mi hna sinah pumh a si cang lai; Meribah ti ah khan ka nawlbia nan doh caah, Israel mi hna ka pekmi ram ah khan a lut lai lo. 25Aaron le a fapa Eleazar cu la hna law, Hor Tlang ah hunpi hna law, 26Aaron cu a puan phoih hna law, a fapa Eleazar kha hruk hna; cun Aaron cu a mi hna sinah pumh a si cang lai i khika ah a thi lai,” tiah a ti. 27Bawipa nih nawl a pek bangin Moses nih a tuah i mibu vialte mithmuh ah Hor Tlang ah cun an hung kai. 28Cun Moses nih Aaron cu a puan kha a phoih hna i a fapa Eleazar kha a hrukter hna. Khika ah tlangpar ah cun Aaron cu a thi. Cun Moses le Eleazar cu tlang cungin an rung òum. 29Mibu nih an dihlak in Aaron kha a thi cang ti an hngalh tikah, Israel innchungkhar vialte nih Aaron cu ni sawm thum a zuun an ngaih.

Hakha Common Language Bible

© Bible Society of Myanmar 2006

More Info | Version Index