Search form

NAMBAR 21

Kanaan Mi Nih Israel An Tuk

1Kanaan miphun Arad ram siangpahrang, Negeb i a ummi nih Israel mi hna cu Atharim lam in an ra ti kha a theih tikah, Israel cu a doh i tlawmpal cu sal ah a tlaih hna. 2Cun Israel mi nih Bawipa sinah biakamnak an ser i, “Hi mi hna cu kan kut chungah na kan pek ahcun, an khua kha kan hrawh cikcek hna lai,” tiah an ti. 3Cun Bawipa nih Israel mi hna aw cu a ngaih i Kanaan mi hna cu an kut ah a pek hna; anmah le an khua hna cu an hrawh cikcek hna; cucaah cuka hmun cu Hormah tiah ti a si.

Dar Rul

4Hor Tlang in, Edom ram kha hrial awkah Rili Sen lam kha an tlaih i lam ah mi hna cu an ing a puang. 5Cun mi hna nih cun Pathian le Moses kha an zaihnawh hna i, “Zeicaahdah ramlak i thih awkah hin Izipt ram in nan kan chuahpi? Zeitintiah rawl a um lo, ti a um lo i, hi rawl òhalo hi cu kan fih,” tiah an ti. 6Khi tikah Bawipa nih meirul kha mi lakah cun a thlah hna i mi kha an cuk hna caah Israel mi tampi an thi. 7Cun annih nih Moses sinah an ra i, “Bawipa le nangmah kha kan in mawhchiat hna caah kan sual cang; kannih sinin rul kha a lak hna nakhnga, Bawipa sinah thlacam tuah,” tiah an ti. Cucaah Moses nih annih caah thla a cam. 8Cun Bawipa nih Moses cu, “Meirul pakhat in ser law, tung cungah tar tuah; rul cukmi paoh nih an zoh tikah an nung lai,” tiah a ti. 9Cucaah Moses nih dar rul pakhat a ser i tung cungah a tar; cun, rul nih pakhatkhat a cuk hna tikah, dar rul cu an zoh ahcun an nung.

Israel Mi Nih Moab Ram An Hel

10Cun Israel mi hna cu an i thawh i Oboth ah an riak. 11Cun Oboth in an i thawh i Moab ral, nichuahlei i a ummi ramlak chung i Iyeabarim ah an riak. 12Cuka cun an tho òhan i Zered Nelrawn ah an riak. 13Cuka cun an tho i Arnon tiva khattelei ral ah an riak; mah hmun cu Amor mi hna ramri in aa thawkmi ramlak chungah a si, zeitintiah Arnon tiva cu Moab ramri a si, Moab le Amor mi hna karlak ah. 14Cucaah Bawipa Raldohnak Cauk chungah hi bangin an ti.

“Sufah i Waheb le

Arnon nel hna le

15Ar khua umnak tiang a phan i

Moab ramri tiang a òum mi

Nel hna tlangpang cu,”

16Cun cuka cun Beer tiang an kal; mah cucu Bawipa nih Moses sinah, “Mi kha hmunkhat ah pum hna law, ti ka pek hna lai,” tiah a timi tikhor kha a si. 17Cu tikah Israel nih mah hla hi an sa:

“Maw tikhor, ti hung chuak tuah!

Hla in hloi tuah u!

18Bawi nih an cawhmi tikhor,

Mi hna lak i milian nih

An bawifung le an òhiangòhunh in

An cawhmi tikhor cu.”

Cun ramlak cun Mattanah tiang

an kal i,

19Mattanah in Nahaliel tiang, cun Nahaliel in Bamoth tiang, 20cun Bamoth in Moab ram chung i a ummi nelrawn tiang an kal; cu nelrawn cu thetse rawn a vun zohtu Pisgah tlangpar pawngah a um.

Israel Mi Nih Sihon An Tei

(Deu 2.26-37)

21Cun Israel nih Amor mi siangpahrang Sihon sinah lamkaltu an thlah hna i, 22“Na ram kan tanter tuah; lo ah siseh, mitsur dum ah siseh kan pial pah lai lo; tikhor ti zong kan ding lai lo; na ram chungin kan chuah hlantiang Siangpahrang Lampi kan zul ko lai,” tiah an ti. 23Sihmanhsehlaw Sihon nih Israel cu a ram tanter kha a awnh duh hna lo. A mi vialte kha a pumh hna i ramlak ah Israel doh awkah cun a kal i Jahaz a phan i Israel kha a tuk. 24Cun Israel nih vainam in an sam hna i a ram kha Arnon in Jabbok tiang, Ammon mi hna ramri tiang, an lak; zeitintiah Jazer cu Ammon mi hna ramri ah a si. 25Cun Israel nih mah hi khua vialte hna kha an lak i Amor mi khua vialte ah Israel cu an um, Heshbon le a khuate vialte hna ah cun an um. 26Zeitintiah Heshbon cu Amor mi siangpahrang Sihon khua kha a si; Sihon nih cun Moab siangpahrang hmasa deuh kha a rak doh i Arnon tiangin a ram kha a kut chungin a rak lak. 27Cucaah pupa hla a rak satu hna nih,

“Heshbon ah ra tuah u, remh tuah u,

Sihon khua cu fehter si seh.

28Zeitintiah Heshbon in mei a chuak i

Sihon khua in meizik a chuak.

Moab siangpahrang Ar kha

a kangh,

Arnon hmunsang bawi hna zong.

29Maw Moab, ngaihchiat awk

na va si dah!

Maw Khemosh biami hna, nannih cu nan lo cang ai!

A fapa hna cu ralzam ah a ser hna i,

A fanu hna cu Amor mi siangpahrang

Sihon sinah cun sal ah a ser hna.

30Cucaah an tefa hna cu Heshbon in

Dibon tiang an rawk i

Medeba tiang mei a kangh hlantiang

kannih nih kan òhio,” tiah an ti.

Israel Mi Nih Og An Tei

(Deu 3.1-11)

31Cu bantukin Israel nih Amor mi hna ram ah cun an um. 32Cun Moses nih Jazer cu va ngiat awkah a thlah hna i a khuate kha an lak hna i khika ah a ummi Amor mi hna kha an pawnchuah hna. 33Cun an i mer i Bashan lei lam kha an zulh. Bashan siangpahrang Og nih Edrei ah anmah doh awkah amah le a mi vialte he an hung chuak. 34Sihmanhsehlaw Bawipa nih Moses cu a chawnh i, “Amah kha òih hlah, zeitintiah amah cu a mi vialte le a ram he na kut chungah kan pek cang; Heshbon ah a ummi Amor mi hna siangpahrang Sihon cungah na tuah bantuk khan, amah cungah na tuah lai,” tiah a ti. 35Cucaah a fapa hna le a mi vialte hna he, amah caah a taangmi pakhat hmanh um lo tiangin, amah cu an thah i a ram cu an rawlh.

Hakha Common Language Bible

© Bible Society of Myanmar 2006

More Info | Version Index