Search form

SALMOS 103

Tyámuaꞌ nu tyeetyátoosij ɨ Tavástaraꞌ

David tɨ jaꞌaꞌrij

1Néijmiꞌi nu ɨ nyamuaꞌtzíiraꞌaj jɨn tyámuaꞌ tyeetyátoosij ɨ Tavástaraꞌ;

néijmiꞌi nu ɨ nye tyéviraꞌ jɨn tyámuaꞌ tyeetyátoosij aꞌɨ́jcɨ ɨ tɨ tyámuaꞌ een ɨ tɨ jɨn ántyapuaj.

2Néijmiꞌi nu ɨ nyamuaꞌtzíiraꞌaj jɨmeꞌ tyámuaꞌ tyeetyátoosij ɨ Tavástaraꞌ,

nyajta quee séej jóꞌhuaꞌxɨj ɨ tɨ jɨn tyámuaꞌ nyej jimi tyúꞌruuj.

3Aꞌɨ́ɨ pu aꞌɨ́ɨn puéꞌeen ɨ tɨ néijmiꞌi tyinaatúꞌuunyiꞌraj ɨ nyaj jɨn quee xáꞌpuɨꞌ huarɨ́j,

ajta néijmiꞌi jɨn tyíꞌnyahuaatyeꞌen tyiꞌtɨ́j nyaj jɨn tyíꞌcuiꞌ,

4aꞌɨ́ɨ pu nyaj japua huatányuusij nyej nyij quee huámuɨꞌnyij,

ajta nɨeꞌcánasij aꞌɨ́jcɨ jɨmeꞌ ɨ tɨ jɨn nyaxɨeꞌveꞌ tyámuaꞌ naa tyuꞌtoocuaꞌnyéej,

5ajta néijmiꞌi tyinaatáꞌsij ɨ tɨ jéetzeꞌ tyiꞌjɨ́ꞌreꞌen

ajta nyajajcuareꞌen aꞌyájna tɨꞌɨj ɨ cuéꞌraꞌvej.

6Tavástaraꞌ pu aꞌɨ́j jɨn huáꞌxɨjtyeꞌen ɨ tɨ jɨꞌréꞌcan jɨmeꞌ tyámuaꞌ naa tyáꞌxaꞌpuɨꞌɨntareꞌ

aꞌɨ́ɨjma ɨ maj jájpuejtzij aꞌɨ́jcɨ jɨmeꞌ maj jeꞌej puaꞌaj huáꞌuurej.

7Aꞌɨ́j pu jaataséjra ɨ ju juyéj ajta jeꞌej tɨ tyuꞌmuárɨej

aꞌɨ́jcɨ ɨ Moisés ajta aꞌɨ́ɨjma ɨ Israel maj jitze ajtyámaꞌcan.

8Tyámuaꞌ pu naa tyihuojóꞌmuaꞌraj ɨ Tavástaraꞌ ajta tyihuaꞌcuꞌvejꞌ

ajta quee jiyeꞌtzín tyinyúꞌcaj jiꞌnye aꞌɨ́ɨ pu taxɨeꞌveꞌ.

9Capu aꞌnáj tɨnaꞌaj tatyaꞌxɨꞌ capu ajta jusén jɨmeꞌ nyúꞌcamuɨꞌ;

10capu aꞌyan tyitaatáꞌ tɨꞌɨj tyiꞌtacɨꞌpuáatacaj

aꞌɨ́jcɨ jɨmeꞌ tyaj jeꞌej puaꞌaj huarɨ́j ajta tyiꞌtɨ́j tyaj jɨn tyiꞌijxánaꞌcɨraꞌ,

11ajta quee ɨꞌríj tɨ huatyeꞌiteehuaj ɨ tɨ jɨn huaꞌxɨeꞌveꞌ aꞌɨ́ɨjma ɨ maj jaꞌtzaahuatyeꞌ

aꞌyájna tɨꞌɨj quee tyíɨꞌrij tɨ huatyeꞌiteehuaj tɨꞌɨj naꞌaj ɨ tajapuá ɨmuáj ajta iiyeꞌej cháanacaj japua.

12Puꞌríj aꞌɨmuáj tyojoohuáꞌxɨj ɨ tyaj jɨn tyiꞌijxánaꞌcɨraꞌcaꞌaj,

aꞌyájna tɨꞌɨj aꞌɨmuáj tyejéꞌsejreꞌ joꞌtɨj ɨ xɨcáj jéꞌejnyinyiij ajta joꞌtɨj jaꞌancáruꞌpij.

13Aꞌyaa pu een ɨ Tavástaraꞌ, aꞌɨ́ɨjma jimi ɨ maj jaꞌtzaahuatyeꞌ,

tyámuaꞌ pu naa tyihuáꞌxɨeꞌveꞌ tɨꞌɨj ɨ huaꞌ táataj ɨ tɨꞌríij,

14jiꞌnye aꞌɨ́ɨ pu jamuaꞌreej jeꞌej tɨ yeꞌej tyitáataahuacaꞌ,

tyámuaꞌ pu naa tyáꞌmuaꞌreej tyaj chuéj tyanaꞌaj puéꞌeen.

15Aꞌɨ́jna ɨ júuricamaꞌraꞌ ɨ tyévij aꞌyaa pu een tɨꞌɨj ɨ tuꞌpíj:

aꞌyaa pu tyeꞌejnyésij tɨꞌɨj ɨ xúuxuꞌuj aꞌájna aꞌɨtzitáj,

16jiyeꞌtzín pu ɨ áacaj jaariáꞌtuuxɨj, tɨꞌquij quee cheꞌ ajaꞌhuaꞌtaj jaꞌmej,

ajta jeꞌen quee cheꞌ aꞌtɨ́j jamuaꞌreeriaj jaꞌmej jeꞌej tɨ tyiꞌtɨ́j jáaruuj.

17Ajta ɨ Tavástaraꞌ tɨ jɨn taxɨeꞌveꞌ aꞌɨ́ɨ pu jusén jɨmeꞌ séejreꞌ

aꞌɨ́ɨjma jimi ɨ maj jaꞌtzaahuatyeꞌ,

capu aꞌnáj huatyápuaꞌrij ɨ tɨ jɨn tyámuaꞌ tyáꞌxaꞌpuɨꞌɨntareꞌ

aꞌyaa pu jusén jɨmeꞌ tyiꞌséereꞌej jaꞌmej ɨ tyeɨ́tyee jimi,

18ajta aꞌɨ́ɨmaj jimi ɨ maj jaꞌráꞌastej jeꞌej tɨ aꞌɨ́ɨn tyaꞌtóoraj

majta quee yóꞌhuaꞌnaj maj aꞌyan rɨjcaj tɨꞌɨj aꞌɨ́ɨn tyuꞌtaꞌíjtacaꞌ.

19Tavástaraꞌ pu arí ɨ juꞌɨpuáa tyámuaꞌ huáruuj aꞌájna u tajapuá,

ajta ɨ tɨ jɨn tyíꞌijta pu néijmiꞌqueꞌ antyúumuaꞌreej.

20¡Tyámuaꞌ xu tyeetyátoonyij ɨ Tavástaraꞌ, tajapuá siaj néijmiꞌi putyíꞌuurej!

Muaꞌaj, mu siaj aꞌyan rɨcɨj jeꞌej tɨ aꞌɨ́ɨn tyíꞌijta,

siaj tyámuaꞌ tyáꞌnamuaj siajta aꞌyan rɨcɨj tɨꞌɨj aꞌɨ́ɨn tyíꞌijta.

21¡Tyámuaꞌ xu tyeetyátoonyij ɨ Tavástaraꞌ muaꞌaj siaj xantáaruꞌustyamuaꞌmuaꞌ puéꞌeen,

ɨ maj jahuɨɨreꞌ majta aꞌyan rɨcɨj jeꞌej tɨ aꞌɨ́ɨn tyaꞌajxɨéꞌviꞌraꞌ!

22¡Cheꞌ néijmiꞌi jitzán tyámuaꞌ tyíꞌsejriaꞌaj ɨ Tavástaraꞌ tyiꞌtɨ́j tɨ aꞌɨ́ɨn tyúꞌtaahuacaꞌ,

néijmiꞌqueꞌ joꞌtɨj aꞌɨ́ɨn tyejéꞌijtaj!

¡Tyámuaꞌ nu tyeetyátoosij ɨ Tavástaraꞌ néijmiꞌi jɨmeꞌ ɨ nyajúuricamej!