Search form

SALMOS 113

Tyicheꞌ tyuꞌtáchuiicaj ɨ Tavástaraꞌ jimi ɨ tɨ tyámuaꞌ tyitájchaꞌɨj

1¡Alelúuyaj!

Mu siaj jahuɨɨreꞌ ɨ Tavástaraꞌ, ¡setyuꞌtatyójtziꞌreꞌ ɨ tɨ jɨn ántyapuaj!

2¡Cheꞌ tyámuaꞌ eenyeꞌ ijíij ajta jusén jɨmeꞌ

ɨ tɨ jɨn ántyapuaj ɨ Tavástaraꞌ!

3¡Micheꞌ tyaatatyójtziꞌreꞌen ɨ tɨ jɨn ántyapuaj ɨ Tavástaraꞌ

aꞌájna joꞌtɨj ɨ xɨcáj jéꞌejnyinyiij ajta joꞌtɨj jaꞌancáruꞌpij!

4Tavástaraꞌ pu néijmiꞌcaa japua séejreꞌ ɨ tyeɨ́tyee;

ajta ɨ tɨ jɨn naa huaséꞌrin aꞌɨ́ɨ pu tajapuá jáꞌsejreꞌ.

5Capu aꞌtɨ́j aꞌyan ajtáhuaꞌaj een tɨꞌɨj ɨ Tavástaraꞌ taj Dios,

aꞌáa tɨ tyejéꞌijtaj jútyeꞌ ɨmuáj,

6ajta aꞌyan tyiꞌjaꞌyájna, tɨ aꞌɨ́ɨn ecóotutaj

tɨꞌij jaaséj ɨ tajapuá tɨ séejreꞌ ajta ɨ cháanacaj.

7Tavástaraꞌ pu chóotaꞌ jaꞌajriásij aꞌɨ́jcɨ ɨ tɨquee jeꞌej tyéejviicueꞌ,

ajta aꞌyan chaꞌtánaꞌaj tyeꞌejriásij aꞌɨ́jcɨ ɨ tɨquee tyiꞌtɨ́j tyíchaꞌɨj

8tɨꞌij jaꞌtyájratyij huaꞌ jamuán ɨ tyeɨ́tyee maj jéehua juxɨeꞌveꞌ,

huaꞌ tzajtaꞌ ɨ tyeɨ́tyee maj jéehua juxɨeꞌveꞌ aꞌájna joꞌtɨj aꞌɨ́ɨn jaꞌchej.

9Aꞌɨ́jcɨ ɨ íitaj tɨ quee tyiyóomuaꞌaj taꞌraa

jaatáꞌsij tɨꞌij huatóotyamuaꞌveꞌen aꞌɨ́jcɨ jɨmeꞌ tɨ arí tyiyójmuaꞌ

ajta tɨ arí jusɨ́ɨj huatyéechiꞌij.

¡Alelúuyaj!