Search form

SALMOS 12

Jeꞌej tɨ tyuꞌtyényuunyij tɨꞌij jaatáhuoonyij tɨ ɨ Dios jaatyáhuɨɨreꞌen

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj, aꞌɨ́jcɨ jitze ɨ canárij arahuéeicaj tɨ tyeꞌejvivin. Chuíicarij David tɨ joꞌyúꞌxacaꞌ

1Taatyáhuɨɨreꞌ, Tavástaraꞌ, jiꞌnye camu cheꞌ séejreꞌ ɨ maj muéetzij jimi tyáꞌtzaahuatyeꞌ majta tyámuaꞌ tyíꞌtyesejreꞌej,

camu cheꞌ séejreꞌ ɨ tyétyacaa maj tyámuaꞌ metyityoomuámuaꞌreꞌ.

2Aꞌɨ́ɨ mu jucuanamuaj séej jamuán majta séej;

jeꞌej mu puaꞌaj tyíꞌjepeꞌ majta quee huatoojéꞌyacan jɨn tyíꞌxaj.

3Tavástaraꞌ, pataꞌaj jeꞌejcuuxɨj ɨ huaꞌnaanaꞌ

aꞌɨ́ɨjma ɨ maj jeꞌej puaꞌaj tyíꞌjepeꞌ majta óotzaahuatyeꞌ,

4ɨ maj aꞌyan tyíꞌxaj tɨjɨn:

“Aꞌɨ́ɨ puꞌuj tajitzé juxɨeꞌveꞌ ɨ tatyényij,

tanyanúu pu tajapuá huatányuusij.

¿Aꞌtanyíj óocaꞌnyej tɨꞌij tyitaataꞌíjtyeꞌen?”

5Aꞌyaa pu tyuꞌtaxájtacaꞌ ɨ Tavástaraꞌ tɨjɨn:

“Aꞌɨ́ɨmaj ɨ maj quee jeꞌej tyéejviicueꞌ majta ɨ maj quee jucaꞌnyej

aꞌɨ́ɨjma mu jeꞌej puaꞌaj uurej majta puéjtzij huaꞌtáꞌcaa.

Aꞌɨ́j nu jɨn ijíij ájchesij,

nyajta aꞌyan tyihuoꞌtyáhuɨɨreꞌsij matɨꞌɨj aꞌɨ́ɨmaj jéehua tyáꞌxɨeꞌveꞌ.”

6Aꞌɨ́jna ɨ Tavástaraꞌ tɨ jɨn tyaꞌtóorasij aꞌɨ́ɨ pu jumuaꞌtɨj;

¡aꞌyaa pu een tɨꞌɨj ɨ pláataj tɨ huápuɨꞌɨj jumuaꞌtɨj,

maj tyámuaꞌ tyeetyáatɨej ɨ oornaj jitze aráahuaꞌpuaj puaꞌmáj!

7Muáaj paj Tavástaraꞌ, tachaꞌɨɨj puáꞌmej,

¡aꞌnáj tɨnaꞌaj paj tachaꞌɨɨj puáꞌmej aꞌɨ́ɨjma jimi ɨ tyeɨ́tyee maj jeꞌej puaꞌaj rɨcɨj!

8Aꞌɨ́ɨmaj ɨ maj jeꞌej puaꞌaj tyityetyúuchaꞌɨj joꞌtɨj naꞌaj mu séejreꞌ

majta néijmiꞌqueꞌ ɨ cháanacaj japua jaxɨeꞌveꞌ ɨ tɨ jeꞌej puaꞌaj een.