Search form

SALMOS 129

Tavástaraꞌ pu tatáꞌcaa tyaj taxáahuaj séjreꞌej

Cuíinarij ɨ maj jɨn huatyáajuꞌun

1Jéehua nu nyeríj jeꞌej puaꞌaj tyiꞌhuányaxaamujrij

nyatɨꞌɨj nyanaꞌaj tyúꞌtyamueestariacaꞌ

micheꞌ aꞌyan tyuꞌtaxáj ɨ maj Israel jitze ajtyámaꞌcan,

2jéehua nu nyeríj jeꞌej puaꞌaj tyiꞌhuányaxaamujrij

nyatɨꞌɨj nyanaꞌaj tyúꞌtyamueestariacaꞌ,

ajta camu nyéetzij tyiꞌtɨ́j jɨn jeꞌej náaruj.

3Muꞌríj tyinaapuéj ɨ nyahuárij jitze aꞌɨ́jcɨ jɨmeꞌ maj nɨeꞌtyáavaxɨj,

ajta vaꞌtɨ́j pu ereꞌséereꞌejme jóꞌnyaj tyajáꞌpuejtyiꞌ,

4ajta aꞌɨ́jna ɨ Tavástaraꞌ, ɨ tɨ tyámuaꞌ tyiꞌtyúuchaꞌɨj,

aꞌɨ́ɨ pu nyajapuáj huatanyúj aꞌɨ́ɨjma jimi ɨ maj jeꞌej puaꞌaj tyityetyúuchaꞌɨj.

5¡Micheꞌ aꞌɨ́ɨmaj huatóotyeviꞌraꞌastaj majta jeꞌen huatóoꞌuunaj

aꞌɨ́ɨmaj ɨ maj jájchaꞌɨɨreꞌ ɨ Sión!

6¡Micheꞌ aꞌyan huárɨnyij tɨꞌɨj ɨ tuꞌpíj chiꞌij japua tɨ tyéꞌejnyinyiij,

matɨꞌɨj quee xu jeꞌejtzaanaxɨꞌɨn aꞌɨ́ɨ pu huatyáhuasij!

7Tuꞌpíj tɨ quee tyiꞌtɨ́j huɨɨreꞌ muácaꞌraꞌan jitze

aꞌɨ́jcɨ ɨ tyeríicuj tɨ sɨɨreꞌ ajta jaꞌantyájɨꞌquiij;

8tuꞌpíj tɨ quee aꞌtɨ́j aꞌyan tyaataxájta yee:

“¡Tavástaraꞌ pu tyámuaꞌ tyeetyájtoo!”

Ityáj tu muaꞌajmaj tyámuaꞌ tyajamuaatyájtoo

aꞌɨ́jcɨ jitze maꞌcan ɨ Tavástaraꞌ.