Search form

SALMOS 136

Ɨ Dios tɨ jusén jɨmeꞌ huaꞌxɨeꞌveꞌ aꞌɨ́ɨjma ɨ maj Israel jitze ajtyámaꞌcan

1Setyuꞌtatyójtziꞌreꞌ ɨ Tavástaraꞌ, jiꞌnye aꞌɨ́ɨ pu tyámuaꞌ een,

jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ.

2Setyuꞌtatyójtziꞌreꞌ ɨ Dios tɨ néijmiꞌcaa tyíꞌijtyeꞌ ɨ dioosij,

jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ.

3Setyuꞌtatyójtziꞌreꞌ ɨ huaꞌ Vástaraꞌ ɨ maj tyiꞌtɨ́j jɨn tyityetyuꞌuj,

jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ.

4Aꞌɨ́jcɨ ɨ tɨ aꞌɨ́ɨ naꞌaj vaꞌcán jɨmeꞌ tyámuaꞌ tyíꞌuurej,

jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ.

5Aꞌɨ́jna ɨ tɨ jaatyátaahuacaꞌ ɨ tajapuá tɨ séejreꞌ aꞌɨ́jcɨ jɨmeꞌ ɨ tɨ jéehua tyuꞌyíꞌtɨn,

jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ.

6Aꞌɨ́jcɨ ɨ tɨ tyámuaꞌ jáaruuj ɨ chuéj ɨ jájtyij japua,

jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ.

7Aꞌɨ́jcɨ ɨ tɨ jaatyátaahuacaꞌ ɨ xɨcáj ajta ɨ máxcɨrɨeꞌ,

jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ:

8ɨ xɨcáj, tɨꞌij tújca jɨn huányeeriꞌcɨj,

jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ,

9ɨ máxcɨrɨeꞌ ajta ɨ xúꞌraꞌvetyee, mej mij tɨ́caꞌ jɨn huányeeriꞌcɨj,

jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ.

10Aꞌɨ́jna ɨ tɨ tyaapuéj ɨ huaꞌyoj tɨ anaquéej huanɨeꞌhuacaꞌ aꞌáa maj jáꞌchajcaꞌaj a Egipto,

jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ.

11Aꞌɨ́jna ɨ tɨ huiꞌrájtoj aꞌɨ́ɨjma ɨ maj Israel jitze ajtyámaꞌcan aꞌájna a Egipto,

jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ;

12aꞌɨ́jcɨ jɨmeꞌ tɨ huataméjcaꞌtacaꞌ ɨ jumuácaꞌ jɨmeꞌ tɨ néijmiꞌi jɨn putyíꞌuurej,

jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ.

13Aꞌɨ́jna ɨ tɨ huaꞌpuaquéj jájsɨɨ ɨ jájrij tɨ poꞌvij,

jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ.

14Aꞌɨ́jna ɨ tɨ huoꞌtaꞌ maj antácɨɨnyej ɨ jájritzeꞌ aꞌɨ́ɨmaj ɨ maj Israel jitze ajtyámaꞌcan,

jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ.

15Aꞌɨ́jna ɨ tɨ jaꞌváꞌnaj a jájritzeꞌ tɨ poꞌvij aꞌɨ́jcɨ ɨ tɨ vaꞌcán jɨn tyíꞌijta aꞌájna a Egipto ajta ɨ xantáaruꞌustyamuaꞌmuaꞌ,

jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ.

16Aꞌɨ́jna ɨ tɨ jutyéɨtyeristyamuaꞌ joꞌvíꞌtɨj aꞌájna joꞌtɨj quee jáꞌtyiꞌtɨj,

jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ.

17Aꞌɨ́jna ɨ tɨ muiꞌcaa antyipuaꞌrityej ɨ maj vaꞌcán jɨn tyityetyúꞌuucaꞌaj rey jɨmeꞌ,

jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ.

18Aꞌɨ́jna ɨ tɨ huoꞌcuij ɨ maj rey jɨn tyityetyúꞌuucaꞌaj majta jéehua uhuácacaꞌnyeꞌej,

jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ.

19Aꞌɨ́jcɨ ɨ Sihón, rey tɨ jɨn tyiꞌtyávaacaꞌaj aꞌɨ́ɨjma jimi ɨ amorreo,

jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ,

20aꞌɨ́jcɨ ɨ Og, rey tɨ jɨn tyiꞌtyávaacaꞌaj aꞌájna a Basán,

jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ.

21Aꞌɨ́jna ɨ chuéj tɨ huoꞌriáaꞌ ɨ rey maj tyiꞌtachuéjcaꞌaj,

jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ,

22ajta jeꞌen aꞌɨ́ɨjma tyuꞌtáꞌ mej mij aꞌɨ́ɨmaj tyaꞌancuriáan ɨ Israel maj jitze ajtyámaꞌcan,

jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ.

23Aꞌɨ́jna ɨ tɨ taꞌtamuáꞌreꞌrii tyatɨꞌɨjtá áꞌviicueꞌriaꞌaj,

jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ.

24Aꞌɨ́jna ɨ tɨ tajapuá huatányuusij aꞌɨ́ɨjma jimi ɨ maj tájchaꞌɨɨreꞌ,

jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ.

25Aꞌɨ́jna ɨ tɨ tyihuáꞌcueꞌtyej ɨ tyeɨ́tyee ajta aꞌɨ́ɨjma ɨ tyiꞌtyán maj tyityaacɨ́ꞌɨj,

jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ.

26¡Setyuꞌtatyójtziꞌreꞌ ɨ Dios tajapuá tɨ jáꞌsejreꞌ,

jiꞌnye capu aꞌnáj antyipuaꞌrij ɨ tɨ jɨn taxɨeꞌveꞌ!