Search form

SALMOS 140

Jeꞌej tyaj tyityeetyényuunyij tɨꞌij ɨ Dios taatyáhuɨɨreꞌen

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj. Chuíicarij David tɨ jaꞌaꞌrij

1Tavástaraꞌ, pataꞌaj nyajapuáj huatányuunyij aꞌɨ́ɨjma jimi ɨ maj jeꞌej puaꞌaj tyityetyúuchaꞌɨj;

pajta naatyéchaꞌɨɨn aꞌɨ́ɨjma jimi ɨ maj ucóonyoꞌseꞌveꞌ,

2aꞌɨ́ɨjma jimi ɨ maj tyámuaꞌ juꞌuurej mej mij tyiꞌtɨ́j jeꞌej puaꞌaj huáꞌuurej

majta aꞌnáj tɨnaꞌaj junyoꞌsiꞌtyeꞌej.

3Huaꞌ nyanúu pu antyipityíijmee, aꞌyájna tɨꞌɨj ɨ cúꞌcuꞌuj tyíꞌnyanuu,

ajta ɨ maj jɨn tyíꞌxaj aꞌyaa pu een tɨꞌɨj ɨ cúꞌcuꞌuj tyiꞌhuaꞌveꞌrij.

4Tavástaraꞌ, náachaꞌɨj aꞌɨ́ɨjma jimi ɨ maj jeꞌej puaꞌaj rɨcɨj,

náachaꞌɨj aꞌɨ́ɨjma jimi ɨ maj junyoꞌsiꞌtyeꞌej,

ɨ maj tyiꞌtɨ́j jeꞌej tyíꞌxaꞌpuɨꞌɨntareꞌ nyej nyij nyáaj eeriáꞌɨtzen.

5Aꞌɨ́ɨmaj ɨ maj óotzaahuatyeꞌ aꞌɨ́ɨ mu tyiꞌtɨ́j jɨn nyacuanamuaj,

majta meríj tyámuaꞌ tyúꞌruuj ɨ maj jɨn naatyéeviꞌ majta jeꞌen naatyájɨꞌqueꞌen,

aꞌáa mu meríj tyámuaꞌ jaꞌhuooruj jóꞌnyaj joꞌréꞌnyinyiij.

6Aꞌyaa nu nyeríj tyaatéꞌexaa ɨ Tavástaraꞌ tɨjɨn: “Muáaj paj nyaj Dios puéꞌeen,

¡náanamuajriꞌ, jeꞌej nyej nyáaj aꞌ jimi jéehua tyáꞌhuoo!

7Tavástaraꞌ, Tavástaraꞌ, nyaj japua paj huatányuunyij mu paj néijmiꞌi jɨn antyíaꞌmuaꞌreej,

muáaj paj jachaꞌɨj ɨ nyaj muꞌuj aꞌájna joꞌmaj jáꞌnyoꞌseꞌ.”

8-9Tavástaraꞌ, capáj tyiꞌtáꞌcareꞌen tɨꞌij aꞌyan tyáꞌraꞌnyij jeꞌej tɨ aꞌɨ́ɨn tyáꞌxɨeꞌveꞌ ɨ tɨ jeꞌej puaꞌaj rɨcɨj;

capáj tyiꞌtáꞌcareꞌen tɨ aꞌyan atyojoꞌréꞌnyinyiicaꞌan jeꞌej tɨ arí aꞌɨ́ɨn tyaaxáꞌpuɨꞌɨntarej.

Aꞌɨ́ɨmaj ɨ maj nyájnaamuaj aꞌɨ́ɨ mu nye jimi eecámuꞌvajra,

cheꞌ aꞌɨ́ɨjma japua rájvetyij ɨ maj jɨn jaxɨeꞌveꞌ mej mij nyéetzij jeꞌej puaꞌaj náaꞌuurej.

10Cheꞌ aꞌɨ́ɨjma japua rávatzɨj ɨ tɨꞌɨxcuáa tɨ aꞌtáatɨmee,

micheꞌ aꞌáa huajaꞌtyáhuaꞌxɨj joꞌtɨj jaꞌtyácucuꞌun, joꞌmaj quee cheꞌ aꞌnáj jeꞌtácɨɨnyij.

11Cheꞌ quee aꞌyan séjreꞌej ɨ cháanacaj japua aꞌɨ́jna ɨ tɨ tyíꞌhueꞌtacaa,

cheꞌ ɨ tɨ jeꞌej puaꞌaj een jaatamuárityeꞌen aꞌɨ́jcɨ ɨ tɨ ucóonyoꞌseꞌveꞌ ajta jeꞌen joꞌpuáꞌrityeꞌen.

12Nyáaj nu jamuaꞌreej tɨ ɨ Tavástaraꞌ jáꞌxaꞌpuɨꞌɨntariꞌtzeꞌen aꞌɨ́jcɨ ɨ tɨquee jeꞌej tyéejviicueꞌ

ajta japuan huatányuusij aꞌɨ́jcɨ ɨ tɨ quee jeꞌej jájtyoovej.

13Aꞌɨ́ɨmaj mu ɨ tyétyacaa maj tyámuaꞌ tyityetyúuchaꞌɨj tyimuaatatyójtziꞌreꞌej;

¡majta a jimi júurij muáꞌjuꞌun ɨ tyeɨ́tyee maj tyámuaꞌ tyityaajúꞌ!