Search form

SALMOS 143

Muéetzij jimi nu nyeríj tyuꞌtyáacaꞌan

Chuíicarij David tɨ jaꞌaꞌrij

1Tavástaraꞌ, huánamuajriꞌ jeꞌej nyaj aꞌ jimi tyiꞌtyényuusij,

tyámuaꞌ paj tyáanamuaj jeꞌej nyaj tyáꞌhuoo.

¡Pajta naatájeevej, jiꞌnye muáaj paj tyámuaꞌ een pajta quee tyiꞌtɨ́j jɨn áꞌɨtzeereꞌ!

2Capáj jahuaviiraj tɨꞌij jaataxáj tyiꞌtɨ́j tɨ jɨn quee xáꞌpuɨꞌ huarɨ́j aꞌɨ́jna ɨ tɨ muéetzij muahuɨɨreꞌ,

jiꞌnye néijmiꞌi mu muéetzij jimi áꞌɨtzeereꞌ.

3Aꞌɨ́ɨmaj mu nyamuarityeꞌ ɨ maj nyéjchaꞌɨɨreꞌ,

majta chóotaꞌ meríj naatzíinajraa,

caꞌnyéjrij mu jɨn nyeꞌijtyeꞌ nyej nyij aꞌáa jaꞌchajca joꞌtɨj joꞌtɨ́caꞌ,

aꞌyájna matɨꞌɨj ɨ maj meríj áꞌtyeej maj huácuij.

4Huápuɨꞌɨj nu quee cheꞌ jeꞌej tyéejtyoovej,

ajta ɨ nyaxɨéjnyuꞌcaa quee cheꞌ jeꞌej jájtyoovej.

5Nyáamuaꞌree jeꞌej tɨ jájcuaj tyíꞌeenyeꞌej,

nyajta aꞌɨ́j jitze tyíꞌmuaꞌtzej jeꞌej paj muáaj tyuꞌmuárɨej.

6Muéetzij jimi nu ajméjcaꞌtaxɨꞌɨj,

muéetzij jimi nu jaxɨeꞌveꞌ nyaj huayeꞌen, aꞌyájna tɨꞌɨj ɨ chuéj tɨ huáchij.

7Tavástaraꞌ, ¡caꞌnácan paj naatájeevej,

jiꞌnye canu cheꞌ tyámuaꞌ tyaꞌtányuuvej!

Capáj nye jimi ajtáyiꞌcan,

jiꞌnye aꞌyaa nu éenyeꞌej naꞌmej matɨꞌɨj ɨ muɨꞌchítyee.

8Tɨꞌɨjta íiyaꞌ putyiꞌrɨjcáj muáaj paj noꞌtámuaꞌreeritziꞌtyeꞌen ɨ paj jɨn nyaxɨeꞌveꞌ,

jiꞌnye muéetzij nu nyeríj jitze tyuꞌtyáacaꞌan.

Muáaj paj noꞌtámuaꞌreeritziꞌtyeꞌen jeꞌej nyaj tyiꞌtyínyechaꞌɨj,

jiꞌnye muéetzij jimi pu jáꞌmaꞌcan tyiꞌtɨ́j nyaj aꞌyan tyíꞌxɨeꞌveꞌ.

9Nyajapuáj paj huatányuunyij, Tavástaraꞌ, aꞌɨ́ɨjma jimi ɨ maj nyéjchaꞌɨɨreꞌ,

jiꞌnye muéetzij jimi nu jahuoo paj naatyáhuɨɨreꞌen.

10Náamuaꞌtyej nyej nyij aꞌyan huárɨnyij jeꞌej paj muáaj tyáꞌxɨeꞌveꞌ,

jiꞌnye muáaj paj nyaj Dios puéꞌeen.

¡Cheꞌ aꞌ júuricamej tɨ naa een náaviꞌtɨsimeꞌen

aꞌɨ́jcɨ jitze ɨ juyéj tɨ huatóojeꞌyej!

11Muéetzij jitze maꞌcan, Tavástaraꞌ, ¡naatáꞌ nyej nyij júurij!

Jiꞌnye jɨꞌréenyaꞌaj paj séejreꞌ, ¡nɨiꞌráatoj nyej nyij quee jeꞌej tyéꞌnyamuaꞌajcaj!

12Jiꞌnye capáj tyiꞌtɨ́j jɨn áꞌɨtzeereꞌ, ¡huaꞌantyipuaꞌrityeꞌ aꞌɨ́ɨjma ɨ maj nyéjchaꞌɨɨreꞌ!

¡Huaꞌantyipuaꞌrityeꞌ néijmiꞌcaa aꞌɨ́ɨjma ɨ maj nyéjchaꞌɨɨreꞌ, jiꞌnye nyáaj nu aꞌɨ́ɨn puéꞌeen ɨ tɨ muahuɨɨreꞌ!