Search form

SALMOS 21

Jeꞌej tyaj tyuꞌtáchuiicaj tyatɨꞌɨj tyuꞌtyámueꞌtɨn

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj. Chuíicarij David tɨ joꞌyúꞌxacaꞌ

1Tavástaraꞌ, aꞌɨ́ɨ pu jutyamuaꞌveꞌ ɨ tɨ rey jɨn tyiꞌtyéjvee jiꞌnye caꞌnyíjraꞌaj paj jaatáꞌ,

¡jéehua pu huápuɨꞌɨj jutyamuaꞌveꞌ jiꞌnye muáaj paj jaatáꞌ tɨ tyuꞌtyámueꞌtɨn!

2Aꞌyaa paj huarɨ́j jeꞌej tɨ aꞌɨ́ɨn tyáꞌxɨeꞌvaꞌcaꞌaj,

capáj tyiꞌtɨ́j jɨn quee aꞌyan huarɨ́j jeꞌej tɨ aꞌɨ́ɨn tyimuaatáhuaviiriꞌ.

3Muáaj paj jaataxɨéꞌvej pajta vaꞌcán jɨn tyámuaꞌ tyeetyájtoo

pajta cúruun juꞌcárujtyiꞌriꞌ ooroj tɨ puéꞌeen.

4Júuricamej pu muaatáhuaviiriꞌ, muáaj pej pij jaatáꞌ,

júuricamej tɨ áꞌtyeeren ajta quee tyiꞌtɨ́j jɨn jeꞌej rɨnyij.

5Tyíꞌmuatyojtziꞌreꞌ aꞌɨ́jcɨ jɨmeꞌ paj jaatáhuɨɨ, ijíij pu vaꞌcán jɨn putyiꞌuurejve,

muáaj paj jaatáꞌ mej mij jaatyátzaahuatyeꞌen ajta jeꞌen jɨꞌréenyeꞌej séejreꞌ.

6Jusén jɨmeꞌ paj tyámuaꞌ tyeetyájtoo,

jéehua pu jutyamuaꞌveꞌ aꞌɨ́jcɨ jɨmeꞌ paj jitzán séejreꞌ.

7Muáaj, rey paj puéꞌeen, capu aꞌnáj antyipuaꞌrij ɨ paj jɨn tyiꞌtyéjvee, jiꞌnye Tavástaraꞌ paj jitze tyíꞌcaꞌnyej,

¡aꞌɨ́j paj jitze tyíꞌcaꞌnyej ɨ tɨ jɨn muaxɨeꞌveꞌ aꞌɨ́jna ɨ tɨ jútyeꞌ ɨmuáj jáꞌsejreꞌ!

8Aꞌɨ́jna ɨ paj néijmiꞌi jɨn putyíꞌuurej aꞌɨ́ɨ pu néijmiꞌcaa huataꞌsij ɨ maj muájchaꞌɨɨreꞌ,

jaꞌmuácaꞌtaꞌ paj jɨn huoꞌtáaꞌsij ɨ maj muaxanaꞌveꞌ,

9aꞌúu paj huojoꞌtyátoosij ɨ oornaj tzajtaꞌ tɨ úꞌtaa

patɨꞌɨj aꞌɨ́j jɨn huatáꞌsejrataj pej pij huoꞌxɨ́jtyeꞌen.

Aꞌɨ́jna ɨ Tavástaraꞌ, tɨ jɨn nyúꞌcamuɨꞌ,

aꞌɨ́j pu jɨn huaꞌantyipuaꞌrityeꞌsij ɨ tɨéj jɨmeꞌ tɨ néijmiꞌi tyeꞌentyípuaapuaꞌrityee.

10Pajta huoꞌrioꞌuunaj íiyan cháanacaj japua pajta huaꞌ tzajtaꞌ ɨ tyeɨ́tyee

aꞌɨ́ɨjma ɨ huaꞌyojmuaꞌ pajta ɨ maj huaꞌ jitze eerányesij.

11Tyij majta jaxɨeꞌvaꞌaj maj jeꞌej puaꞌaj muáaꞌuurej

majta jaxajta jeꞌej maj huárɨnyij aꞌ jimi

capu aꞌyan tyeꞌmej jeꞌej maj aꞌɨ́ɨmaj tyáꞌxɨeꞌveꞌ,

12jiꞌnye muáaj paj huoꞌtamuárityeꞌsij,

aꞌ túꞌnamuaꞌ paj jɨn aꞌɨ́ɨjma huatyámueꞌtɨj.

13¡Ájchesij Tavástaraꞌ, aꞌɨ́jcɨ jɨmeꞌ ɨ paj néijmiꞌi jɨn putyíꞌuurej!

¡Tyetyíꞌyeꞌestej tyajta tyuꞌtáchuiicaj aꞌɨ́jcɨ jɨmeꞌ paj tyuꞌtyáamueꞌtɨj!