Search form

SALMOS 29

Ɨ nyúucariaꞌraꞌ ɨ Tavástaraꞌ ɨ tɨ néijmiꞌi jɨn putyíꞌuurej

Chuíicarij David tɨ joꞌyúꞌxacaꞌ

1Siataꞌaj néijmiꞌi tyaatatyójtziꞌreꞌen ɨ Tavástaraꞌ, mu siaj yójmuaꞌmuaꞌ puéꞌeen ɨ Dios,

setyuꞌtatyójtziꞌreꞌ ɨ tɨ néijmiꞌi jɨn putyíꞌuurej siajta ɨ tɨ jɨn naa huaséꞌrin ɨ Tavástaraꞌ,

2setyuꞌtatyójtziꞌreꞌ ɨ tɨ naa huaséꞌrin ɨ tɨ jɨn ántyapuaj ɨ Tavástaraꞌ,

siajta jaatyáanajche ɨ Tavástaraꞌ aꞌájna joꞌtɨj naa tyejéꞌeen joꞌtɨj aꞌɨ́ɨn jáꞌsejreꞌ.

3Ɨ nyúucariaꞌraꞌ ɨ Tavástaraꞌ aꞌɨ́ɨ pu caꞌnyíin jɨn tányuuvej ɨ jájritzeꞌ,

aꞌɨ́jna ɨ Dios tɨ jɨn naa huaséꞌrin aꞌɨ́ɨ pu caꞌnyíin jɨn namuajreꞌ,

Tavástaraꞌ pu aꞌáa jáꞌsejreꞌ ɨ jájritzeꞌ tɨ caꞌnyíin jáꞌxɨreꞌ.

4Caꞌnyíin pu jɨn namuajreꞌ ɨ nyúucariaꞌraꞌ ɨ Tavástaraꞌ tɨꞌɨj víityee maj tyényuuveꞌen,

ajta quee aꞌtɨ́j pújoorej tɨ jaatyápuaꞌrityeꞌen ɨ nyúucariaꞌraꞌ ɨ Tavástaraꞌ,

5aꞌɨ́ɨ pu ɨ nyúucariaꞌraꞌ ɨ Tavástaraꞌ jaꞌcátaaraxɨj ɨ jucúj tɨ tyuꞌuj.

¡Tavástaraꞌ pu jaꞌcátaaraxɨj ɨ jucúj aꞌáa tɨ joꞌváatɨmee a Líbano!

6Ajta jaatácaꞌtzɨj ɨ jɨríj aꞌáa tɨ joꞌquéetɨmee a Líbano ajta aꞌájna a Sirión,

¡ajta tyuꞌtáꞌsij maj tyítzunaxɨꞌɨn matɨꞌɨj ɨ túuruꞌuj majta ɨ visáaruꞌuj!

7Ɨ nyúucariaꞌraꞌ ɨ Tavástaraꞌ aꞌyaa pu een tɨꞌɨj ɨ maj tyóonaꞌaxcavaꞌraꞌan,

8aꞌɨ́jna ɨ nyúucariaꞌraꞌ ɨ Tavástaraꞌ aꞌɨ́ɨ pu jaatácaꞌtzɨj ɨ chuéj tɨ quee tyiꞌtɨ́j japuan séejreꞌ,

¡Tavástaraꞌ pu jaatácaꞌtzɨj ɨ chuéj tɨ quee tyiꞌtɨ́j japuan séejreꞌ aꞌáa tɨ jáꞌsejreꞌ a Cadés!

9Ɨ nyúucariaꞌraꞌ ɨ Tavástaraꞌ aꞌɨ́ɨ pu jaatácaꞌtzɨj ɨ suꞌuj tɨ huaꞌuj

ajta néijmiꞌi tyuꞌriáꞌnaꞌcaj ɨ tɨ viváajmaꞌaj tyuꞌuj.

Néijmiꞌi mu jaatyátzaahuatyeꞌsij, aꞌájna joꞌtɨj ɨ tyeyúujraꞌ joꞌtyéjvee.

10Tavástaraꞌ pu tyihuáꞌijtyeꞌ ɨ víityee,

¡Tavástaraꞌ pu rey jɨn tyíꞌijta jusén jɨmeꞌ!

11Tavástaraꞌ pu caꞌnyíjraꞌaj huoꞌtaꞌsij ɨ jutyéɨtyeristyamuaꞌ,

Tavástaraꞌ pu tyámuaꞌ tyihuoꞌtyátoosij ajta tyámuaꞌ naa tyihuoꞌtyéjeevij ɨ maj jitzán ajtyámaꞌcan.