Search form

SALMOS 3

Jeꞌej tɨ tyuꞌtyényuunyij tɨꞌij jaatáhuoonyij tɨ ɨ Tavástaraꞌ jaatyáhuɨɨreꞌen

Chuíicarij David tɨ joꞌyúꞌxacaꞌ, tɨꞌɨj juꞌuunacaꞌaj aꞌɨ́jcɨ jimi ɨ juyój Absalón

1Nyavástaraꞌ,

jéehua mu ɨ maj quee tyámuaꞌ nyojoꞌmuaꞌraj,

jéehua mu aꞌɨ́ɨmaj ɨ maj meríj nyéetzij nyéjchaꞌɨɨreꞌ,

2¡jéehua mu ɨ maj aꞌyan tyíꞌnyaxaj tɨjɨn:

“Capu ɨ Dios japuan huatányuusij”!

3Pajta muáaj, nyavástaraꞌ,

aꞌɨ́ɨ paj puéꞌeen ɨ tɨ nyacánasij tɨꞌij naatyáhuɨɨreꞌen,

aꞌɨ́ɨ paj puéꞌeen ɨ nyaj jɨn naa huaséꞌrin,

aꞌɨ́ɨ paj puéꞌeen ɨ caꞌnyíjraꞌaj tɨ nyatáꞌcaa.

4Nyejíihuaj nu aꞌyan tyáꞌhuoo tɨꞌij ɨ Tavástaraꞌ naatyáhuɨɨreꞌen

aꞌɨ́ɨ puꞌij nyanamuajran aꞌájna joꞌtɨj tyámuaꞌ tyejéꞌeen joꞌtɨj aꞌɨ́ɨn jáꞌsejreꞌ.

5Naatyáhuiꞌsij nyajta huatácusij, nyatɨꞌɨj nyij nyajtáhuaꞌaj huatájɨsij,

jiꞌnye aꞌɨ́ɨ pu ɨ Tavástaraꞌ naatyáhuɨɨreꞌej.

6Canu huáꞌtzɨɨnyeꞌ aꞌɨ́ɨjma ɨ maj muiꞌij ɨ maj nyoꞌsii

ɨ maj meríj nyajná mej mij naatyényoꞌsiꞌtyeꞌen.

7¡Ájchesij, Tavástaraꞌ!

¡Pataꞌaj nyaj japua huatányuunyij, nyaj Dios!

Muáaj paj huaꞌ nyéerimij jitze huaꞌrávaxɨꞌɨj ɨ maj nyéjchaꞌɨɨreꞌ,

¡pajta huaꞌ tamej eecátaaraxɨꞌɨj ɨ maj jeꞌej puaꞌaj tyityetyúuchaꞌɨj!

8Muáaj, Tavástaraꞌ, aꞌɨ́ɨ paj puéꞌeen ɨ tɨ tajapuá huatányuusij,

¡pataꞌaj tyámuaꞌ tyihuoꞌtyátoonyij, aꞌɨ́ɨjma ɨ maj aꞌáa joꞌcháatɨmee aꞌchájtaꞌnaj jitze!