Search form

SALMOS 38

Jeꞌej tɨ tyuꞌtyényuunyij tɨꞌij jaatáhuoonyij tɨ ɨ Dios jaatáhuɨɨreꞌen

Chuíicarij David tɨ joꞌtyéyuꞌxacaꞌaj, mej mij aꞌɨ́jna jɨn néijmiꞌi tyoꞌtámuaꞌreej ɨ muꞌvéjrij

1Tavástaraꞌ, capáj nyetyaꞌxɨꞌɨj aꞌɨ́jcɨ jɨmeꞌ ɨ paj jɨn nyúꞌcamuɨꞌ

capáj pajta puéjtzij nyataꞌcareꞌen patɨꞌɨjta nyuꞌcamuɨꞌɨj.

2Jiꞌnye puꞌríj nye jitze ráꞌaj aꞌɨ́jna ɨ paj jɨn puéjtzij naatáꞌ;

¡aꞌɨ́j paj jɨn puéjtzij naatáꞌ aꞌchu paj uhuájcaꞌnyej!

3Aꞌɨ́jna ɨ paj jɨn nyúꞌcamuɨꞌ aꞌɨ́jcɨ jɨmeꞌ nyej nyáaj tyiꞌijxánaꞌcɨraꞌ,

néijmiꞌqueꞌ nu ɨ nye tyévij jitze tyíꞌcuiꞌ,

¡capu sɨ́ɨj tyámuaꞌ een ɨ nyacaríj!

4Canu cheꞌ jeꞌej jájtyoovej aꞌɨ́jcɨ jɨmeꞌ nyaj jéehua jeꞌej puaꞌaj huarɨ́j,

jéehua pu tyíꞌnyetyesiꞌhuarityeꞌ canu nyij cheꞌ tyéꞌviicueꞌ.

5Aꞌɨ́jcɨ jɨmeꞌ nyaj quee tyiꞌtɨ́j jóꞌitej,

puꞌríj tyépetyij ɨ nyaj jɨn tyíꞌpuejtyiꞌ ajta jeꞌej puaꞌaj tyaarɨeꞌej.

6Aꞌnáj tɨnaꞌaj nu nyaxamúurityaꞌaj menyoꞌchaꞌcan,

naꞌcanyamuaꞌastɨj nyajta quee jeꞌej tyéejtyoovej.

7Nyahuárij pu nyacuiꞌ aꞌɨ́jcɨ jɨmeꞌ ɨ nyaj puɨstaj,

¡néijmiꞌqueꞌ nu tyíꞌcuiꞌ ɨ nye tyéviraꞌ jitze!

8Huápuɨꞌɨj nu tyíꞌcuiꞌ nyajta quee cheꞌ nyacaꞌnyej,

¡aꞌɨ́jna ɨ nyaj jɨn nyeyiin nyaxɨéjnyuꞌcaa nu jɨn nyeyiin!

9Tavástaraꞌ, muáaj paj jamuaꞌreej jeꞌej nyej nyáaj tyáꞌxɨeꞌveꞌ,

ajta ɨ nyaj jɨn ucayáatɨyiꞌij muáaj paj asɨ́ɨj tyámuaꞌ naa tyáꞌmuaꞌreej.

10Nyaxɨéjnyuꞌcaa pu caꞌnyíin jɨn úꞌtzunaj,

capu cheꞌ maꞌ jáꞌsejreꞌ ɨ nyaj jɨn uhuájcaꞌnyej,

¡canu nyajta cheꞌ tyámuaꞌ metyóonyeej!

11Aꞌɨ́ɨmaj ɨ maj tyámuaꞌ naa tyiꞌnyaꞌamíincustyamuaꞌ,

majta ɨ maj jeꞌej nyamuarimuaj,

aa mu ɨmuáj joꞌtyúꞌuj, mej mij quee jaaséj ɨ nyaj jɨn tyíꞌcuiꞌ.

12Aꞌɨ́ɨmaj ɨ maj nyejeꞌcatamuɨꞌ, tyiꞌtɨ́j mu jɨn avíitzij jeꞌej nyaꞌuurej,

ɨ maj jaxɨeꞌveꞌ tɨꞌij jeꞌej puaꞌaj tyíꞌnyaꞌuurej, aꞌɨ́ɨ mu jaxaj jeꞌej maj tyinaꞌantyipuáꞌrityeꞌen

majta aꞌnáj tɨnaꞌaj jaaxáꞌpuɨꞌɨntarej mej mij avíitzij jɨn jeꞌej puaꞌaj náaꞌuurej.

13Nyajta nyáaj aꞌyaa nu rɨcɨj tɨꞌɨj ɨ tɨ quee iityánamuaj,

cuxáa nyaj quee huáꞌnamuajraj;

cuxáa nyaj quee atányuuveꞌen, canu acácuaxaꞌvaꞌraj.

14Aꞌyaa nu een tɨꞌɨj ɨ tɨ quee iityánamuaj

ajta quee nyuuvej tɨꞌij jujapuá huatányuunyij.

15Nyáaj nu muéetzij jimi tyiꞌijchóꞌveꞌ,

Tavástaraꞌ pajta nyaj Dios paj puéꞌeen,

aꞌyaa nu tyáꞌxɨeꞌveꞌ paj muáaj nyaj jɨmeꞌ huatányuunyij.

16Aꞌɨ́j nuꞌuj muahuavii mej mij quee nyéetzij nyaꞌaꞌtzej,

mej mij quee jutyamuaꞌveꞌej nyatɨꞌɨjta tyiꞌtɨ́j jɨn ootyáꞌɨtzeereꞌen.

17Aꞌyaa pu tyiꞌjɨꞌréꞌcan jɨmeꞌ, nuꞌríj tɨn eetávesij,

ajta quee tyápuaapuaꞌrej ɨ tɨ tyinyetyáacuiꞌ.

18Nyaataxájta tyiꞌtɨ́j nyaj jɨn ootyáꞌɨtzeerej,

jiꞌnye capu naa nyaꞌasej ɨ nyaj jéehua tyiꞌtɨ́j jɨn ootyáꞌɨtzee.

19Muꞌríj jéetzeꞌ huatámuiꞌriacaꞌ ɨ maj nyéjchaꞌɨɨreꞌ;

jéehua mu ɨ maj chaꞌmanaꞌaj tyiꞌtɨ́j jɨn nyéjchaꞌɨɨreꞌ.

20Jeꞌej mu puaꞌaj nyaꞌuurej aꞌɨ́jcɨ jɨmeꞌ nyej nyáaj tyámuaꞌ naa huaꞌ jimi tyíꞌuurej;

jiꞌnye nyáaxɨeꞌveꞌ nyej tyámuaꞌ rɨjcaj aꞌɨ́ɨ mu mij jɨn nyéjchaꞌɨɨreꞌ.

21Tavástaraꞌ, ¡capáj juséentacan manúujɨpuan!

Nyaj Dios, ¡capáj nye jimi ajtáyiꞌcan!

22Nyaj Dios pajta nyaj vástaraꞌ, ¡jiyeꞌtzín paj mujoꞌvéꞌmeꞌen pej pij naatáhuɨɨreꞌen!