Search form

SALMOS 41

Jeꞌej tɨ tyuꞌtyéenyuj ɨ aꞌtɨ́j tɨ tyíꞌcuiꞌ

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj. Chuíicarij David tɨ joꞌyúꞌxacaꞌ

1Cheꞌ huatóotyamuaꞌveꞌen aꞌɨ́jna ɨ tɨ aꞌɨ́j jitze tyíꞌmuaꞌtzej ɨ tɨ quee jucaꞌnyej ajta quee jeꞌej tyéejviicueꞌ,

Tavástaraꞌ pu japuan huatányuusij tɨꞌɨjta jeꞌej puaꞌaj tyíꞌrɨjcaa.

2Tavástaraꞌ pu jachaꞌɨɨj jaꞌmej,

júuricamej pu jaatáꞌsij ajta tɨꞌij huatóotyamuaꞌveꞌen ɨ chuéj japua,

ajta quee tyuꞌtáꞌsij tɨꞌij aꞌyan atyojoꞌréꞌnyej jeꞌej maj tyáꞌxɨeꞌveꞌ ɨ maj jájchaꞌɨɨreꞌ.

3Tavástaraꞌ pu caꞌnyíjraꞌaj jaatáꞌsij tɨꞌɨj quee cheꞌ tyéꞌviicueꞌraj,

ajta tyámuaꞌ jaꞌuurej aꞌɨ́jcɨ ɨ tɨ jɨn tyíꞌcuiꞌ.

4Nyáaj nu aꞌyan tyuꞌtaxájtacaꞌ tɨjɨn:

“Tavástaraꞌ, náꞌancuꞌvaxɨꞌ,

tyináahuaatyeꞌ, tyij nyajta muéetzij jimi ootyáꞌɨtzeerej.”

5Aꞌɨ́ɨmaj ɨ maj nyéjchaꞌɨɨreꞌ aꞌyaa mu tyáꞌxɨeꞌveꞌ tɨꞌij jeꞌej puaꞌaj tyíꞌnyaꞌuurej, aꞌyaa mu tyíꞌxaj tɨjɨn:

“¿Aꞌnajnyí muɨꞌnyij tyej tyij quee cheꞌ jaꞌtamuáꞌreꞌrihuaꞌan?”

6Ya mu nyetyésiseꞌ, majta quee tzáahuatyiꞌraꞌaj jɨn aꞌyan rɨcɨj,

huaꞌmuaꞌtziiraꞌaj jitze pu séejreꞌ néijmiꞌi ɨ tɨ jeꞌej puaꞌaj een,

aꞌaj pu ámiteereꞌ matɨꞌɨjta cáayej jitze ajoojuꞌun.

7Aꞌɨ́ɨ mu jusɨɨreꞌ ɨ maj nyéjchaꞌɨɨreꞌ mej mij nyéetzij naaxáj,

aꞌyaa mu tyíꞌmuaꞌtzej nyej nyasɨ́ɨj puéꞌeenyeꞌ ɨ nyaj jɨn japuéjtzitarej

8majta aꞌyan tyíꞌxaj tɨjɨn:

“Tyiyáaruꞌ pu jimi joꞌvéꞌmej ɨ tɨ jɨn tyíꞌcuiꞌ,

aꞌɨ́j pu jɨn huacaꞌaj joꞌtɨj jáꞌhuiꞌcaa ajta jeꞌen quee cheꞌ ájchesij.”

9Ajta aꞌɨ́jna ɨ tɨ tyámuaꞌ naa tyiꞌnyaꞌamíincuj, nyáaj nyej jitzán tyiꞌcaꞌnyajcaꞌaj,

ɨ tɨ nyaj jamuán tyíꞌcuaꞌcariaꞌaj, aꞌɨ́ɨ pu arí ajta nyéjchaꞌɨɨreꞌ.

10Pajta muáaj, Tavástaraꞌ, náꞌancuꞌvaxɨꞌ,

naatáꞌ nyaj ájchenyij nyajta jeꞌen aꞌyan huóꞌuurej jeꞌej tɨ aꞌɨ́ɨjma jimi tyiꞌtyéevijtɨj.

11Aꞌyaa nu nyij tyáꞌmuaꞌreeren nyaj aꞌyan rɨcɨj jeꞌej tɨ muéetzij tyimuaꞌráanajchi,

tɨ quee nyéetzij jɨmeꞌ jutyamuaꞌveꞌej aꞌɨ́jna ɨ tɨ nyéjchaꞌɨɨreꞌ.

12Ajta nyéetzij jɨmeꞌ, nyaj tyámuaꞌ tyiꞌtyínyechaꞌɨj nyajta quee tyiꞌtɨ́j jɨn áꞌɨtzeereꞌ,

tyámuaꞌ paj tyíꞌnyeviꞌraj muaꞌ muácaꞌ jɨmeꞌ,

nyej nyij aꞌnáj tɨnaꞌaj ajamuán ajaꞌ séjreꞌej.

13¡Cheꞌ tyámuaꞌ éenyeꞌej séjreꞌej ɨ Tavástaraꞌ, huaꞌ Dios ɨ maj Israel jitze ajtyámaꞌcan,

ijíij ajta jusén jɨmeꞌ!

¡Cheꞌ aꞌyan tyáꞌraꞌnyij!