Search form

SALMOS 47

Dios pu aꞌɨ́ɨn puéꞌeen ɨ tɨ Rey jɨn tyiꞌtyéjvee néijmiꞌqueꞌ ɨ cháanacaj japua

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj. Chuíicarij aꞌɨ́ɨmaj maj joꞌyúꞌxacaꞌ ɨ yójmuaꞌmuaꞌ aꞌɨ́jcɨ ɨ Coré

1¡Siahuóotyamuaꞌveꞌ, néijmiꞌqueꞌ tɨꞌɨj naꞌaj tyiꞌchájtaꞌnajmee!

¡Siajta huatyényuunyij ɨ Dios jimi siajíihuaj aꞌɨ́jcɨ jɨmeꞌ siaj jutyamuaꞌveꞌ!

2Jiꞌnye aꞌɨ́jna ɨ Tavástaraꞌ, jútyeꞌ ɨmuáj tɨ jáꞌsejreꞌ, huápuɨꞌɨj pu tzɨ́ɨnyiꞌreꞌ,

aꞌɨ́ɨ pu aꞌɨ́ɨn puéꞌeen ɨ tɨ vaꞌcán Rey jɨmeꞌ tyiꞌtyéjvee néijmiꞌqueꞌ ɨ cháanacaj japua.

3Huaꞌajtaviꞌtɨj ɨ maj chájtaꞌ joꞌcháatɨmee ajta aꞌɨ́ɨjma ɨ maj séej chuéj japua jáꞌmaꞌcan

ajta jeꞌen huoꞌtaꞌíj mej mij ityájma taꞌráꞌastijreꞌen.

4Puꞌríj jaꞌantyíhuoj aꞌɨ́jna ɨ tɨ ityájma tyíꞌtacɨꞌtyij,

aꞌɨ́ɨn tɨꞌij puéꞌeen ɨ Jacob tɨ jɨn óotzaahuatyeꞌ, aꞌɨ́jcɨ ɨ tɨ jéehua jaataxɨéꞌvej.

5Dios ɨ Tavástaraꞌ puꞌríj huatyéeyixɨj ɨ juꞌɨpuáa jitze

huaꞌ tzajtaꞌ ɨ maj jutyamuaꞌveꞌej mejijhuaj majta ɨ trompéetaj maj jitze tyíꞌcɨꞌsityeꞌ.

6Setyuꞌtáchuiicaj, setyuꞌtáchuiicaj ɨ Dios jimi.

Setyuꞌtáchuiicaj, setyuꞌtáchuiicaj aꞌɨ́jcɨ jimi ɨ tɨ Rey jɨn tyiꞌtyéjvee tajimí.

7Aꞌɨ́j xu huatáchuiicaj ɨ tɨ naa huánamuajrii ɨ Dios jimi,

jiꞌnye aꞌɨ́ɨ pu aꞌɨ́ɨn puéꞌeen ɨ tɨ Rey jɨn tyiꞌtyéjvee néijmiꞌqueꞌ ɨ cháanacaj japua.

8¡Dios pu aꞌɨ́ɨn puéꞌeen ɨ tɨ Rey jɨn tyiꞌtyéjvee aꞌɨ́ɨjma jimi ɨ maj séej chuéj japua joꞌcháatɨmee!

¡Dios pu arí acáayixɨj ɨ juꞌɨpuáa jitze tɨ naa een!

9Aꞌɨ́ɨmaj ɨ tyétyacaa maj jéetzeꞌ juxɨeꞌveꞌ aꞌájna joꞌmaj joꞌcháatɨmee

aꞌɨ́ɨ mu huaꞌ jitze ajtyáhuiixɨꞌɨj ɨ tyeɨ́tyeristyamuaꞌmeꞌen ɨ Dios raꞌ aꞌɨ́jcɨ ɨ Abraham,

10jiꞌnye ɨ Dios pu jimi jeꞌrámaꞌcan ɨ maj jɨn putyíꞌuurej ɨ cháanacaj japua.

¡Aꞌɨ́ɨ pu néijmiꞌcaa japua tyíꞌijta!