Search form

SALMOS 52

Capu tyiꞌtɨ́j huɨɨreꞌ ɨ tɨ jɨn óotzaahuatyeꞌ aꞌɨ́jna ɨ tɨ jeꞌej puaꞌaj rɨcɨj

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj. Jeꞌej tɨ tyihuoꞌmuáꞌtyej aꞌɨ́jna ɨ David, tɨꞌɨj ɨ Doeg Edom tɨ jáꞌmaꞌcan Saúl jimi ujóꞌmej tɨꞌij jaatéꞌexaatyeꞌen tɨ ɨ David aꞌáa joꞌtyávaacaꞌaj joꞌtɨj ɨ Abimélec jaꞌchej

1¿Jiꞌnye pej pij aꞌɨ́jna jɨn áꞌatzaahuatyeꞌ ɨ paj jɨn jeꞌej puaꞌaj rɨcɨj, mu paj néijmiꞌi putyíꞌuurej?

¡Aꞌɨ́ɨ pu jusén jɨmeꞌ séejreꞌ ɨ Dios tɨ jɨn taxɨeꞌveꞌ!

2Aꞌɨ́j papuꞌuj curiaꞌmuaꞌsij pej pij jeꞌej puaꞌaj huárɨnyij,

muaꞌ nyanúu pu jeꞌej puaꞌaj tyíꞌuurej aꞌyájna tɨꞌɨj ɨ náhuaaj tɨ tyíꞌɨtzɨj.

3Aꞌɨ́ɨ pu jéetzeꞌ muaꞌráanajchij ɨ tɨ jeꞌej puaꞌaj een quee ɨ tɨ xáꞌpuɨꞌ,

aꞌɨ́j paj jéetzeꞌ xɨeꞌveꞌ ɨ tɨ hueꞌtzij pequee aꞌɨ́jcɨ ɨ tɨ jɨꞌréꞌcan jɨmeꞌ.

4Nyanúrij tɨ tyíꞌhueꞌtacaa,

aꞌɨ́j paj xɨeꞌveꞌ ɨ nyúucarij tɨ tyeꞌentyípuaapuaꞌrityee,

5aꞌyaa puꞌij ajta ɨ Dios tyimuaꞌantyipuáꞌrityeꞌsij jusén jɨmeꞌ,

aꞌɨ́ɨ pu muaatyéviꞌraj ajta jeꞌen muiꞌrárɨesij aꞌchiꞌtáj, ajta muáariꞌraj aꞌjúuricamej.

6Aꞌɨ́ɨmaj ɨ maj jáꞌastijreꞌ ɨ Dios, aꞌíj mu séjran majta jeꞌen tyuꞌtátzɨɨnyeꞌej;

majta aꞌɨ́j mu huatyáxaahuataj ɨ tyáataj, aꞌyan metyiꞌxáataj tɨjɨn:

7“Cásɨꞌ aꞌɨ́jna ɨ tɨ quee jahuoo tɨꞌij ɨ Dios jaatyáhuɨɨreꞌen,

ɨ tɨ aꞌɨ́j jitze tyíꞌcaꞌnyej ɨ tɨ jéehua tyíꞌijchaꞌɨj

ajta quee jatapuáꞌcɨtacaa tɨ jeꞌej puaꞌaj rɨjcaj.”

8Nyajta nyáaj aꞌyaa nu een tɨꞌɨj ɨ ítyeɨꞌrij tɨ naa tyiꞌhuaꞌraa

aꞌájna joꞌtɨj joꞌtyéjvee ɨ tyeyúujraꞌ ɨ Dios;

¡aꞌnáj tɨnaꞌaj nu aꞌɨ́j jitze tyíꞌcaꞌnyej ɨ tɨ jɨn taxɨeꞌveꞌ!

9Nyaj Dios, aꞌnáj tɨnaꞌaj nu tyimuaatatyójtziꞌreꞌej aꞌɨ́jcɨ jɨmeꞌ jeꞌej paj tyiꞌtɨ́j huáruuj;

muéetzij nu jimi tyiꞌijchóꞌveꞌej huaꞌ jamuán ɨ maj tyámuaꞌ een aꞌ jimi,

jiꞌnye muáaj paj néijmiꞌi jɨn tyámuaꞌ een.