Search form

SALMOS 53

Tyiꞌtɨ́j tɨ jɨn jeꞌej puaꞌaj huarɨ́j ɨ tyévij

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj, mej mij jaatáchuiicaj tɨꞌɨjta sɨ́ɨj tyíꞌcuiꞌij. Jeꞌej tɨ tyihuoꞌmuáꞌtyej aꞌɨ́jna ɨ David

1Aꞌɨ́ɨmaj ɨ maj quee maꞌumuámuaꞌreꞌ aꞌyaa mu tyíꞌmuaꞌtzej tɨquee ɨ Dios maꞌ jáꞌsejreꞌ

néijmiꞌi mu meríj jeꞌej puaꞌaj tyityoꞌcájrupij,

néijmiꞌi mu meríj tyiꞌtɨ́j jɨn jeꞌej puaꞌaj huarɨ́j,

¡capu sɨ́ɨj séejreꞌ tɨ tyámuaꞌ tyiꞌtyúuchaꞌɨɨj!

2Tajapuá ɨmuáj, aꞌɨ́ɨ pu ɨ Dios huaꞌsej aꞌɨ́ɨjma ɨ tyeɨ́tyee

tɨꞌij huoꞌséj tɨpuaꞌaj sɨ́ɨj séjreꞌej tɨ tyojóꞌitej,

aꞌtɨ́j tɨ ɨ Dios huoocaj.

3Majta néijmiꞌi mu meríj yaa pujmuaꞌ huárupij,

néijmiꞌi mu juxaꞌaj tyiꞌtɨ́j jɨn meríj jeꞌej puaꞌaj huarɨ́j.

¡Capu cheꞌ sɨ́ɨj séejreꞌ tɨ tyámuaꞌ tyiꞌtyúuchaꞌɨɨcaj!

¡Capu naꞌaj sɨ́ɨj maꞌ jáꞌsejreꞌ!

4Camu tyojóꞌitej aꞌɨ́ɨmaj ɨ maj jeꞌej puaꞌaj tyityetyúuchaꞌɨj,

aꞌɨ́ɨmaj mu huaꞌcɨꞌɨn ɨ nyetyeɨ́ɨtyeristyamuaꞌ tɨꞌɨj aꞌtɨ́j tɨ páan huácuaꞌnyij,

aꞌɨ́ɨmaj ɨ maj quee jahuoo ɨ Dios jimi.

5Tyij ajta quee mejeꞌtyiꞌtɨɨtan mej mij aꞌɨ́ɨmaj juvivej,

aꞌɨ́ɨ mu juviváaj muáꞌjuꞌun aꞌɨ́jcɨ jɨmeꞌ ɨ maj tyíꞌtzɨɨnyeꞌ,

jiꞌnye Dios pu tyojoꞌcuíxɨꞌɨj ɨ tyihuáꞌcarij aꞌɨ́ɨjma ɨ maj jájchaꞌɨɨreꞌ.

Aꞌɨ́ɨ mu tyéviꞌsiꞌ huataséjreꞌej, jiꞌnye Dios pu mahuóohuaꞌxɨj.

6¡Aꞌtzúj cuj aꞌájna a tɨ aꞌyan tyajaꞌrájtyapuaj tɨjɨn Sión

aꞌáa jeꞌréꞌnyej ɨ tɨ huaꞌ japua huatányuusij ɨ maj Israel jitze ajtyámaꞌcan!

Tɨꞌɨj ɨ Dios ajtáhuaꞌaj tyámuaꞌ tyihuoꞌtyátoonyij ɨ jutyéɨtyeristyamuaꞌ,

aꞌɨ́ɨmaj mu huatóotyamuaꞌveꞌsij ɨ Jacob maj jitze eerámaꞌcan,

majta néijmiꞌi ɨ maj Israel jitze ajtyámaꞌcan.