Search form

SALMOS 58

Jeꞌej maj tyaatáhuoonyij mej mij tyámuaꞌ naa tyihuoꞌxáꞌpuɨꞌɨntariꞌtzeꞌen

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj. Capáj tyiꞌtɨ́j antyíuꞌnaꞌan. Nyúucarij tɨ naa huánamuajrii aꞌɨ́ɨn tɨ jariaꞌmuaꞌaj ɨ David

1Muaꞌaj, mu siaj huápuɨꞌɨj uhuácacaꞌnyeꞌej,

¿nyi jɨꞌréꞌcan jɨmeꞌ tyámuaꞌ naa néijmiꞌi setyaꞌxaꞌpuɨꞌɨntareꞌ

nyi siajta tyámuaꞌ naa tyihuáꞌxɨjtyeꞌ ɨ tyeɨ́tyee?

2Ajta aꞌyájna, aꞌyaa xu rɨcɨj jeꞌej puaꞌaj setyáꞌxɨeꞌveꞌej,

muaꞌaj xu tyiꞌtáꞌcaa mej mij junyoꞌsiꞌtyeꞌej aꞌɨ́jcɨ japua ɨ chuéj joꞌmaj joꞌcháatɨmee.

3Ɨ maj jeꞌej puaꞌaj tyityetyúuchaꞌɨj aꞌɨ́ɨ mu jeꞌej puaꞌaj huarɨ́j matɨꞌɨj móoj huaꞌjucáatzeꞌ aꞌséeriaꞌcaj ɨ junáanastyamuaꞌ,

ɨ maj tyíꞌhueꞌtacaa mu jeꞌej puaꞌaj tyityoꞌcárutyij aꞌájna matɨꞌɨj quee xu nanɨeꞌhuaj.

4Jéehua pu huáꞌveꞌrij huaꞌ jitze séejreꞌ aꞌyájna matɨꞌɨj ɨ cúꞌcuꞌsee;

aꞌyaa mu een tɨꞌɨj ɨ cúꞌcuꞌuj tɨ tyúꞌchaꞌvacaa

ɨ tɨ aꞌyan juꞌuurej tɨꞌɨj ɨ tɨquee iityánamuaj, ajta ityóonamuaj ɨ junaxɨéetaꞌ

5tɨꞌij quee jáanamuaj ɨ tɨ tyiꞌtyácuiinaj aꞌɨ́jna ɨ tɨ támuaꞌrej,

ɨ tɨ jaayíꞌtɨn tɨ huojoꞌpuaꞌrityeꞌen.

6Nyaj Dios, ¡antatáarajraꞌ ɨ huaꞌ tamej!

Tavástaraꞌ, ¡antatáarajraꞌ ɨ huaꞌ tamej aꞌɨ́ɨjma ɨ muajyéj!

7Micheꞌ aꞌhuóopuaꞌrixɨꞌɨn, tɨꞌɨj ɨ jájtyij tɨ tyixɨ́reꞌen,

micheꞌ huariaꞌhuaj, aꞌyájna tɨꞌɨj ɨ tuꞌpíj juyéj jitze tɨ tyuꞌuj,

8micheꞌ huatóopuaꞌrej, tɨꞌɨj ɨ xɨ́ꞌpuꞌuj aꞌɨ́jcɨ jitze ɨ juꞌɨ́ꞌriqueꞌ,

¡tɨꞌɨj ɨ páꞌrɨꞌɨj tɨ arájvej ajta quee aꞌnáj jaaséj ɨ tɨ jɨn huányeeriꞌij!,

9micheꞌ huatyátaanyij tɨꞌɨj ɨ tzícareꞌej matɨꞌɨj quee eexúj jamuaꞌréeriacaj,

micheꞌ caꞌnyíin jɨn hueꞌejcuuxɨj, tɨꞌɨj tuꞌpíj tɨ huáꞌraa.

10Aꞌɨ́jna ɨ tɨquee tyiꞌtɨ́j jɨn áꞌɨtzeereꞌ aꞌɨ́ɨ pu huatóotyamuaꞌveꞌsij tɨꞌɨj Dios puéjtzij aꞌɨ́jcɨ jɨmeꞌ ɨ maj jɨn jeꞌej puaꞌaj huarɨ́j;

¡aꞌáa pu joꞌréꞌnyesij joꞌtɨj joꞌxúuriajraa aꞌɨ́jna ɨ tɨ jeꞌej puaꞌaj tyiꞌtyúuchaꞌɨj!

11Aj mu mij aꞌyan tyuꞌtaxájtaj tɨjɨn:

“¡Jéehua pu tyíꞌhuɨɨreꞌ nyej tyámuaꞌ tyiꞌtyínyechaꞌɨɨj!

¡Dios pu séejreꞌ ɨ tɨ huáꞌxɨjtyeꞌen ɨ maj aꞌyan huacháatɨmee ɨ cháanacaj japua!”