Search form

SALMOS 75

Dios, ɨ tɨ Juées jɨn tyiꞌtyéjvee

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj. Capáj tyiꞌtɨ́j antyíuꞌnaꞌan. Chuíicarij maj jɨn tyaatatyójtziꞌreꞌen maj jɨn jaatyáanajche Asaf tɨ jaꞌaꞌrij

1Muéetzij tu tyíꞌmuatyojtziꞌreꞌ, taj Dios,

muéetzij tu tyíꞌmuatyojtziꞌreꞌ,

aꞌyaa tu jéehua tyáꞌhuoo aꞌ jitze maꞌcan tyajta aꞌɨ́j tyíꞌchuiicaj ɨ tɨ naa tyuꞌséꞌrin muáaj paj tyúꞌtaahuacaꞌ.

2Tavástaraꞌ pu aꞌyan tyíꞌxaj tɨjɨn:

“Aꞌájna aꞌnáj nyej nyáaj aꞌyan tyaataxájta,

nyáaj nu néijmiꞌcaa tyámuaꞌ tyáꞌxɨjtyeꞌen.

3Tɨꞌɨjta huatóocaꞌtzɨj ɨ chuéj, majta néijmiꞌi ɨ maj japuan huacháatɨmee,

nyáaj nu aꞌɨ́ɨn puéꞌeen ɨ tɨ tyámuaꞌ tyéꞌchaꞌɨj ɨ tɨ japuan róocaꞌnyej.”

4Ajta aꞌɨ́ɨjma ɨ maj óotzaahuatyeꞌ ajta ɨ maj jeꞌej puaꞌaj rɨcɨj aꞌyaa nu tyihuáꞌixaatyeꞌ tɨjɨn:

“Caxu junyoꞌsiꞌtyeꞌej caxu siajta óotzaahuatyeꞌej;

5caxu aꞌɨ́j jitze tyíꞌcaꞌnyej tyiꞌtɨ́j siaj huayíꞌtɨn

caxu huápuɨꞌɨj óotzaahuatyeꞌej tɨpuaꞌaj tyiꞌtɨ́j setyáxajtasimeꞌen.”

6Jiꞌnye capu ɨ puéjtzij aꞌáa jeꞌréꞌnyesij

aꞌájna joꞌtɨj ɨ xɨcáj jéꞌejnyinyiij nusu joꞌtɨj jaꞌancáruꞌpij,

capu ajta aꞌájna joꞌtɨj quee jáꞌtyiꞌtɨj nusu a jɨríj tzajtaꞌ,

7sulu aꞌɨ́ɨ pu ɨ Dios Juées tɨ jɨn tyiꞌtyéjvee:

aꞌɨ́ɨ pu séecan huatyáxaahuataj ajta séecan tyámuaꞌ tyuꞌtyátoosij.

8Tavástaraꞌ pu jiꞌtyáaja ɨ jumuácaꞌ jitze ɨ tɨ jitzán uhuáaꞌ ɨ tɨ jɨn nyúꞌcamuɨꞌ,

nahuáj pu áꞌnaxcaj ajta arí újmueꞌriacaꞌ.

Tɨꞌɨj jajxɨ́reꞌen aꞌɨ́jcɨ ɨ nahuáj,

néijmiꞌi ɨ maj jeꞌej puaꞌaj rɨcɨj ɨ cháanacaj japua

aꞌɨ́ɨ mu néijmiꞌi juquéiꞌsij.

9Nyáaj nu aꞌnáj tɨnaꞌaj jaxáataj naꞌmej ɨ Dios raꞌ aꞌɨ́jcɨ ɨ Jacob

nyajta jimi tyuꞌtáchuiicaj;

10jiꞌnye aꞌɨ́ɨ pu jaꞌantyipuáꞌrityeꞌsij ɨ maj jɨn óotzaahuatyeꞌ aꞌɨ́ɨmaj ɨ maj jeꞌej puaꞌaj rɨcɨj;

ajta jéetzeꞌ pu tyámuaꞌ tyeetyátoosij aꞌɨ́jcɨ ɨ tyáataj tɨ tyámuaꞌ tyíꞌtyevij.