Search form

SALMOS 76

Dios, ɨ tɨ néijmiꞌi jɨn tyuꞌtyáamueꞌtɨj

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj, aꞌɨ́jcɨ jitze ɨ maj jɨn tyíꞌcuiꞌnacaa tɨ tyeꞌejvivin. Chuíicarij maj jɨn tyaatatyójtziꞌreꞌen maj jɨn jaatyáanajche Asaf tɨ jaꞌaꞌrij

1Dios mu néijmiꞌqueꞌ jamuaꞌtyej aꞌájna a Judá;

néijmiꞌqueꞌ pu namuajreꞌ aꞌájna a Israel jeꞌej tɨ aꞌɨ́ɨn ántyapuaj.

2Ɨ tyeyúujraꞌ aꞌáa pu jáꞌsejreꞌ ɨ jɨríj japua tɨ aꞌyan ántyapuaj tɨjɨn Sión,

aꞌáa tɨ jáꞌsejreꞌ a Jerusalén;

3aꞌáa pu tyuꞌtyáanaꞌxɨj ɨ tyapúustiꞌij ɨ maj jɨn junyoꞌsiꞌtyaꞌcaꞌaj,

ɨ maj jɨn huatyóonaj, chúun, túꞌnamuaꞌaj ajta ɨꞌrɨ́j.

4¡Muáaj paj huápuɨꞌɨj naa huaséꞌrin, taj Dios!

¡Jéetzeꞌ paj vaꞌtɨ́j séejreꞌ quee ɨ jɨríj tɨ jusén jɨn séejreꞌ!

5Aꞌɨ́ɨjma mu néijmiꞌi tyoꞌhuáariꞌriꞌ ɨ maj jéetzeꞌ jaayíꞌtɨn maj huatyényoꞌseꞌen,

majta quee jeꞌej huarɨ́j aꞌɨ́ɨmaj ɨ maj jéetzeꞌ uhuácacaꞌnyeꞌej,

aꞌɨ́ɨmaj mu tajɨ́ɨsaꞌpuaj huatácuꞌtzucaꞌ matɨꞌɨj mij huácuij.

6Camu majta cheꞌ pújoorej mej mij huatáhuaaxɨꞌɨn ɨ cariáataꞌ majta ɨ cahuáayuꞌuj

patɨꞌɨj muáaj, Dios raꞌ ɨ Jacob huoꞌtányeechej.

7¡Muáaj paj huápuɨꞌɨj áꞌtzaahuatyiꞌreꞌ!

¿Aꞌtanyíj pújoorej tɨꞌij aꞌjimi ajoꞌtyávaacaj

tɨꞌɨjta huataséjreꞌen ɨ paj jɨn nyúꞌcamuɨꞌ?

8Tajapuá pu ɨmuáj séejreꞌ ɨ puéjtzij paj taatáꞌsij,

ajta ɨ cháanacaj pu tyíꞌtzɨɨnyeꞌ aꞌɨ́j pu jɨn quee cheꞌ táhuan,

9taj Dios,

patɨꞌɨjta ájchenyij pej pij tyoꞌxáꞌpuɨꞌɨntareꞌen

ajta pej pij huaꞌ japua huatányuunyij aꞌɨ́ɨjma ɨ maj japuéjtzitarej ɨ cháanacaj japua.

10Aꞌɨ́jna ɨ tɨ jɨn nyúꞌcamuɨꞌ ɨ tyévij aꞌɨ́ɨ pu puéꞌeenyeꞌej jaꞌmej ɨ tɨ jɨn tyimuaatatyójtziꞌreꞌej,

¡tyij ajta cɨ́ɨ naꞌaj tyiꞌijnyúꞌcaj aꞌɨ́ɨ pu puéꞌeenyeꞌej jaꞌmej aꞌ cúruun!

11Siataꞌaj muaꞌaj jimi tyaꞌtóoratziij aꞌɨ́jcɨ ɨ Tavástaraꞌ, siajta ɨ Dios jimi,

siajta jeꞌen néijmiꞌi jɨn aróoꞌastej.

Muaꞌaj, mu siaj ataváatɨmee aꞌɨ́jcɨ jimi ɨ tɨ aꞌyan tyúuxɨeꞌveꞌ tyaj tzáahuatyiꞌraꞌaj jimi tyíchaꞌɨɨj,

¡siataꞌaj jimi tyuꞌtámuꞌvejritaj!

12Jiꞌnye aꞌɨ́ɨ pu huáariꞌraj ɨ huáꞌjuuricamej aꞌɨ́ɨjma ɨ maj tyíꞌijta

ajta tyuꞌtáꞌsij mej mij tyuꞌtátzɨɨnyeꞌen ɨ maj tyíꞌijta ɨ cháanacaj japua.