Search form

SALMOS 81

Tyiꞌtɨ́j tɨ jɨn ɨ Dios tyámuaꞌ tyihuojóꞌmuaꞌraj ajta ɨ Israel tɨ jɨn jeꞌej puaꞌaj huarɨ́j

Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj, aꞌɨ́jcɨ jitze tyíꞌcanaa ɨ Gat. Aꞌɨ́ɨn tɨ jaꞌaꞌrij ɨ Asaf

1¡Siataꞌaj jutyamuaꞌveꞌej ɨ Dios jimi setyuꞌtáchuiicaj, jiꞌnye aꞌɨ́j tu jɨn uhuájcaꞌnyej!

¡Siajta jíihuaj setyaatatyójtziꞌreꞌen aꞌɨ́jcɨ ɨ Dios raꞌ ɨ Jacob!

2Setyuꞌtáchuiicaj aꞌɨ́j setyiꞌhuáaristyaꞌaj ɨ quéetzarij,

siajta aꞌɨ́jcɨ jitze ɨ áarpaj siajta ɨ canárij jitze.

3Siajta tyuꞌtácɨꞌsityeꞌen ɨ trompéetaj jitze tɨꞌɨj ɨ máxcɨrɨeꞌ jájcuan jɨn huataséjreꞌen,

siajta jeꞌen tɨꞌɨjta néijmiꞌi huataséjreꞌen ɨ máxcɨrɨeꞌ,

jiꞌnye aꞌyaa pu tyúuxɨeꞌveꞌ siaj aꞌɨ́jcɨ xɨcáaraꞌ jitze vaꞌcán jɨn tyuꞌyéꞌestej.

4Jiꞌnye aꞌíi pu aꞌɨ́ɨn puéꞌeen ɨ tɨ jɨn tyuꞌtaꞌíjtacaꞌ

ɨ Dios raꞌ aꞌɨ́jcɨ ɨ Jacob aꞌájna a Israel,

5aꞌɨ́ɨ pu aꞌɨ́ɨn puéꞌeen jeꞌej maj tyaataꞌíj aꞌɨ́jcɨ ɨ José

tɨꞌɨj ɨ Dios huoꞌtanyóꞌsiꞌtyej aꞌɨ́ɨjma ɨ maj Egipto jáꞌmaꞌcan.

Nyúucarij nu huánamuajriꞌ nyaj quee jamuaꞌajcaa aꞌtɨ́j tɨ puéꞌeenyeꞌej, tɨ aꞌyan tɨjɨn:

6“Nuꞌríj tyimuꞌhuatyátɨchiiriꞌ ɨ paj tyoꞌhuatyátɨjcaa,

nuꞌríj tyámuaꞌ tyúꞌruuj aꞌ jimi pej pij quee cheꞌ caꞌnyíin jɨn tyíꞌmuarɨeꞌej.

7Patɨꞌɨj quee cheꞌ jeꞌej jájtyoovaꞌaj nye jimi paj huatyéenyuj, nyáaj nu nyij aꞌ japua huatanyúj,

aꞌɨ́j nu jitze muaatajé ɨ jéetɨrij tɨ tyényuuveꞌej,

nyajta jeꞌen muatyéesej véjriꞌ aꞌájna aꞌ tɨ jaꞌrájmuaa aꞌ tɨ aꞌyan tyajaꞌrájtyapuaj tɨjɨn Meribá.

8Setyúꞌnamuaj, nyetyeɨ́ɨtyeristyamuaꞌ, jeꞌej nyaj tyajáꞌmuaꞌixaatyeꞌ,

¡aꞌyaa nu tyáꞌxɨeꞌveꞌ siaj náanamuaj, muaꞌaj mu siaj Israel jitze ajtyámaꞌcan!

9Capáj sáanturij tyíchaꞌɨɨj maj séej chuéj japua jáꞌmaꞌcan;

capáj pajta séecan dioosij najchej ɨ paj quee huáꞌmuajtyej.

10Nyáaj nu aꞌ vástaraꞌ puéꞌeen, nyajta aꞌ Dios,

ɨ nyaj muiꞌrájtoo aꞌɨ́jcɨ japua ɨ chuéj Egipto tɨ tyajaꞌrájtyapuaj,

tyámuaꞌ paj naa tyaꞌcácuaxaꞌtaj, nyáaj nu nyij muaatájuxɨeetyeꞌsij.

11’Majta ɨ nyetyeɨ́ɨtyeristyamuaꞌ camu nyanamuájracucaꞌaj,

¡camu aꞌyan huarɨ́j jeꞌej nyaj tyihuóꞌixaaj aꞌɨ́ɨmaj ɨ maj Israel jitze ajtyámaꞌcan!

12Aꞌɨ́j nu jɨn huoꞌtaꞌ mej mij aꞌyan huárɨnyij jeꞌej maj aꞌɨ́ɨmaj tyáꞌxɨeꞌveꞌ,

aꞌyaa mu mij atyityejeꞌcháaj muáꞌraa jeꞌej tɨ jéetzeꞌ tyihuaꞌránajchacaꞌ.

13¡Tɨpuaꞌaj aꞌɨ́ɨmaj ɨ nyetyeɨ́ɨtyeristyamuaꞌ manáanamuajrajcheꞌen!

¡Tɨpuaꞌaj ɨ Israel maj jitze ajtyámaꞌcan aꞌyan metyityaajúꞌcajcheꞌen jeꞌej nyaj tyihuoꞌcájuyetyej,

14aꞌyaa puꞌij tɨꞌɨj séej maj ootyásaꞌcɨvaꞌxɨꞌɨn

nyatɨꞌɨj nyáaj huoꞌtyaxáahuatajcheꞌen aꞌɨ́ɨjma ɨ maj huaꞌajchaꞌɨɨreꞌ

nyajta puéjtzij huoꞌtáꞌnyijcheꞌ ɨ maj quee naa huojoꞌmuaꞌraj!

15’Aꞌɨ́ɨmaj ɨ maj jaxanaꞌveꞌ ɨ Tavástaraꞌ aꞌɨ́ɨ mu huápuɨꞌɨj tyuꞌtátzɨɨnyeꞌej,

majta jeꞌen jusén jɨmeꞌ jajpuéetzij muáꞌjuꞌun.

16¡Dios pu ɨ tyeríicuj tɨ jéetzeꞌ jɨ́ꞌreꞌen huaꞌcueꞌtyej ɨ jutyéɨtyeristyamuaꞌ,

ajta sarátyee huáiꞌtyeꞌen ɨtzitáj maj huáxoo!”