Search form

SALMOS 88

Tavástaraꞌ ¿jiꞌnye pej pij manúujɨpuaj?

Chuíicarij aꞌɨ́ɨmaj maj jaꞌaꞌrij ɨ Coré tyíꞌyojmuaꞌ. Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj, mej mij jaatáchuiicaj tɨꞌɨjta sɨ́ɨj tyíꞌcuiꞌij. Jeꞌej tɨ tyihuoꞌmuáꞌtyej aꞌɨ́jna ɨ Hemán, aꞌɨ́ɨjma tɨ jitze ajtyámaꞌcan ɨ ezrahitas, mataꞌaj mij jaatáchuiicaj

1Tavástaraꞌ, nyaj Dios ajta ɨ tɨ nyajapuáj huatányuusij,

tújca nyajta tɨ́caꞌ muéetzij nu muahuavii pej pij naatáhuɨɨreꞌen,

2¡ancuriáaꞌ jeꞌej nyaj aꞌ jimi tyáꞌhuoo!,

¡pajta aꞌyan huárɨnyij jeꞌej nyaj tyíꞌmuahuaviij!

3Jéehua pu ɨ tɨ jeꞌej puaꞌaj een nye jitze tɨ arí huatyáꞌɨtzee,

aꞌɨ́j nu jɨn nyeríj tɨn huatámuɨꞌsij,

4¡puꞌríj ɨꞌríj maj naatyéꞌiten aꞌɨ́ɨjma jamuán ɨ muɨꞌchítyee,

jiꞌnye canu cheꞌ uhuájcaꞌnyej!

5Aꞌáa mu meríj nyojóorɨej huaꞌ tzajtaꞌ ɨ maj meríj huácuij;

aꞌyaa nu een matɨꞌɨj ɨ maj huácuij matɨꞌɨj huatyéenyoꞌsej

majta jeꞌen meríj huoꞌtyáꞌavaatacaꞌ;

aꞌyájna matɨꞌɨj ɨ maj meríj yoꞌrɨej muáaj paj jɨn huoꞌtyáhuɨɨreꞌen

pajta jeꞌen muáaj períj huojoꞌhuáꞌxɨj.

6Muáaj paj aꞌáa nyejeꞌtyájrɨee a tɨ jéetzeꞌ tyétyeꞌ ɨmuáj joꞌcácun,

aꞌájna joꞌtɨj joꞌtɨ́caꞌ ajta jeꞌej puaꞌaj éenyeꞌqueꞌ.

7Nyejitzé pu ráꞌaj ɨ paj jɨn nyúꞌcamuɨꞌ,

¡pajta anyojoꞌcáarujtye tɨꞌɨj jáataꞌ aꞌɨ́jcɨ jitze ɨ tɨ huápuɨꞌɨj tyúꞌtyesiꞌhuarityeꞌ!

8Muáaj paj tyuꞌtáꞌ mej mij manúurɨeenyij ɨ nyaꞌamíincustyamuaꞌ,

pajta tyuꞌtáꞌ mej mij aꞌɨ́ɨmaj quee nyaxɨeꞌveꞌ.

¡Aꞌyaa nu een tɨꞌɨj ɨ tɨ námiꞌ tɨ quee pújoorej tɨꞌij huatóoꞌuunaj!

9Nyajta quee cheꞌ tyámuaꞌ tyaꞌtányeej aꞌɨ́jcɨ jɨmeꞌ nyaj huápuɨꞌɨj nyeyiin.

¡Aꞌnáj tɨnaꞌaj nu muéetzij jimi jahuoo, Tavástaraꞌ,

nyajta muéetzij jimi ajméjcaꞌtaxɨꞌɨj!

10¿Nyi tyiꞌtɨ́j jɨn jeꞌej parɨnyij aꞌɨ́ɨjma jimi ɨ maj meríj huácuij tyej tyij jeꞌej tyoꞌtaséj?

¿Nyi jeꞌej tyíɨꞌrij mej mij aꞌɨ́ɨmaj tyimuaatatyójtziꞌreꞌen ɨ muɨꞌchítyee?

11¿Nyi aꞌɨ́j muaataxájta ɨ tɨ jɨꞌréꞌcan jɨmeꞌ majta ɨ paj jɨn taxɨeꞌveꞌ

aꞌájna joꞌmaj tyityajáꞌavaꞌtacaa, joꞌtɨj aꞌɨ́ɨn tyejéꞌijtaj ɨ tɨ tyeꞌentyípuaapuaꞌrityee?

12Aꞌájna joꞌtɨj jáꞌsejreꞌ ɨ tɨ tyeꞌentyípuaapuaꞌrityee, majta néijmiꞌcaa jóꞌhuaꞌnaj,

¿nyi sɨ́ɨj séeriaꞌaj jaꞌmej tɨ jáamuaꞌtyij paj tyámuaꞌ tyíꞌuurej ajta ɨ paj jɨn vaꞌcán jɨn néijmiꞌi putyíꞌuurej?

13Nyajta nyáaj, Tavástaraꞌ, muéetzij nu jimi jahuoo,

tɨꞌɨjta ariáꞌpuaꞌaj muéetzij jimi nu huatyényuusij.

14¿Jiꞌnye pej pij manúujɨpuaj, Tavástaraꞌ?

¿Jiꞌnye pej pij nye jimi jaꞌavaaj?

15Nyatɨꞌɨj nyanaꞌaj tyúꞌtyamueestariacaꞌ

jeꞌej nu tyéꞌnyamuaꞌtzej nyajta áꞌviicueꞌreꞌ nyej nyij quee huámuɨꞌnyij,

nyetyoꞌviicueꞌriꞌ ɨ tɨ jéehua tyíꞌtyesiꞌ muéetzij tɨ jimi tyojoꞌvéꞌmej,

canu nyij cheꞌ tyéꞌviicueꞌ.

16Nye jitze pu arí yan huatyéenyej ɨ paj jɨn nyúꞌcamuɨꞌ,

ajta jeꞌen naꞌantyimuéꞌtɨj;

17aꞌɨ́ɨ pu aꞌnáj tɨnaꞌaj néijmiꞌqueꞌ nyeriaꞌnaa,

aꞌyájna tɨꞌɨj tɨpuaꞌaj jáataꞌ anyoꞌcájrutyej.

18Camu cheꞌ nye jimi yajáꞌhuaꞌ ɨ nyaꞌ amíincustyamuaꞌ nusu ɨ maj nyamuaꞌtyej,

aꞌɨ́ɨ puꞌquij ɨ tɨ́caꞌrij nyajamuan yésejreꞌ.