Search form

SALMOS 91

Aꞌɨ́jna ɨ Tavástaraꞌ aꞌɨ́ɨ pu aꞌɨ́ɨn puéꞌeen ɨ tɨ tahuɨɨreꞌ

1Aꞌɨ́jna ɨ tɨ jitzán séejreꞌ ɨ tɨ tyámuaꞌ tyéꞌchaꞌɨj

aꞌɨ́j tɨ jimi jáꞌmaꞌcan ɨ jútyeꞌ ɨmuáj tɨ jáꞌsejreꞌ ɨ tɨ néijmiꞌi putyíꞌuurej ajta néijmiꞌi jɨn antyúumuaꞌreej,

2aꞌyaa pu tyéꞌixaatyeꞌ ɨ Tavástaraꞌ tɨjɨn: “Muáaj paj nyechaꞌɨj,

ɨ nyaj jitzán nyacaꞌnyej, nyaj Dios, ɨ nyaj jitzán tyíꞌcaꞌnyej.”

3Aꞌɨ́ɨ puꞌuj pújoorej tɨꞌij aꞌ japua huatányuunyij

aꞌɨ́jcɨ jimi ɨ tɨ avíitzij jɨn tyuꞌjéꞌcaj ajta aꞌɨ́jcɨ jimi ɨ tɨ jeꞌej puaꞌaj tyúꞌuurej,

4jiꞌnye aꞌɨ́ɨ pu tyámuaꞌ naa tyimueꞌcánasij,

jityán pej pij tyámuaꞌ tyíꞌchaꞌɨɨriꞌhuaj puáꞌmej.

¡Aꞌɨ́j pu jɨn muacánasij ɨ tɨ jɨn tyámuaꞌ een!

5Capáj tyíꞌtzɨɨnyeꞌej tyiꞌtɨ́j tɨ jeꞌej rɨcɨj ɨ tɨ́caꞌ,

nusu ɨ tújca tɨ ajta jéehua jeꞌej puaꞌaj tyíꞌrɨcɨj,

6nusu tyiꞌtɨ́j tɨ jeꞌej tyuꞌmaꞌaj taꞌmej ɨ tɨ́caꞌrij jitze,

nusu ɨ tɨ tyeꞌentyípuaapuaꞌrityee tɨꞌɨj huányeeriꞌcɨj ɨ xɨcáj jɨmeꞌ;

7jiꞌnye séej víꞌraꞌaj mu cuiꞌnyij aꞌ útataꞌ pujmuaꞌ

majta tamuáamuataꞌ víꞌraꞌaj aꞌmuácaꞌtaꞌ pujmuaꞌ,

ajta muéetzij capu tyiꞌtɨ́j jeꞌej muaꞌuuren.

8Muáaj papuꞌuj huaꞌraséeraj puáꞌmej,

pahuaꞌséeraj paj puáꞌmej tɨꞌɨj aꞌyan tyáꞌraꞌnyij aꞌɨ́ɨjma jimi ɨ maj jeꞌej puaꞌaj rɨcɨj jeꞌej tɨ aꞌɨ́ɨjma jimi tyiꞌtyéevijtɨj.

9Jiꞌnye papuꞌríj aꞌyan jáaruuj tɨꞌij ɨ Tavástaraꞌ muaatyáhuɨɨreꞌen,

ajta aꞌɨ́ɨn muachaꞌɨ́ɨj jaꞌmej ɨ tajapuá tɨ jáꞌsejreꞌ,

10capu tyiꞌtɨ́j aꞌ jimi huataséjreꞌsij tɨ jeꞌej puaꞌaj een

capu ajta ɨ cuiꞌnyiꞌraꞌaj aꞌchéj jaꞌráꞌiixaj;

11jiꞌnye aꞌɨ́ɨ pu uhuojoꞌtaꞌítyij ɨ maj jimi tyíꞌhuɨɨreꞌ

mej mij muáachaꞌɨɨn joꞌpaj jeꞌej tyojoomaꞌaj puáꞌmej.

12Aꞌɨ́ɨ mu jumuácaꞌ jɨn muaꞌajriásij

pej pij quee tyiꞌtɨ́j jitze eejcaꞌcataꞌan.

13Ɨꞌríitaj pu áꞌmej paj muajyéj tzajtaꞌ ajaꞌtameꞌen,

huaꞌ tzajtaꞌ ɨ maj tzɨ́ɨnyiꞌreꞌ pajta ɨ cúꞌcuꞌsee tzajtaꞌ.

14“Nyáaj nu japuan huatányuusij,

tɨꞌij quee tyiꞌtɨ́j jeꞌej puaꞌaj jaꞌuurej,

jiꞌnye aꞌɨ́ɨ pu nyaxɨeꞌveꞌ ajta nyamuaꞌtyej.

15Tɨꞌɨj naatájeevej, nyáaj nu nyajta jaatájeevij;

¡nyáaj nu jamuán ajoꞌtyaváaj naꞌmej!

Nyajta japuan huatányuusij tɨꞌij quee jeꞌej tyóomuaꞌajcaj

nyajta jeꞌen tyámuaꞌ tyaataséjrataj séecan jimi;

16nyaatáꞌsij tɨꞌij tyámuaꞌ naa tyiꞌhuóotyamuaꞌveꞌen ajta áꞌtyeeviꞌin júurij:

¡nyajta jaatáꞌsij tɨꞌij huóotyamuaꞌveꞌen aꞌɨ́jcɨ jɨmeꞌ nyej nyáaj japuan huatányuusij!”