Search form

SALMOS 96

Chuíicarij tɨ jájcuaj ɨ Tavástaraꞌ jimi

1Jájcuacan setyuꞌtáchuiicaj aꞌɨ́jcɨ jimi ɨ Tavástaraꞌ;

setyuꞌtáchuiicaj ɨ Tavástaraꞌ jimi, aꞌyan siaj huacháatɨmee néijmiꞌqueꞌ ɨ cháanacaj japua;

2setyuꞌtáchuiicaj ɨ Tavástaraꞌ jimi, tyámuaꞌ xu tyeetyátoonyij ɨ tɨ jɨn ántyapuaj;

aꞌnáj tɨnaꞌaj xu jaxajta ɨ tɨ jɨn tajapuá huatányuusij.

3Xaataxáj ɨ tɨ jɨn naa huaséꞌrin ajta ɨ tɨ jɨn tyámuaꞌ naa tyíꞌuurej

huaꞌ tzajtaꞌ ɨ tyeɨ́tyee siajta aꞌɨ́ɨjma jimi ɨ maj séej chuéj japua joꞌcháatɨmee,

4jiꞌnye vaꞌcán pu jɨn tyiꞌtyéjvee aꞌɨ́jna ɨ Tavástaraꞌ

ajta jimi aꞌyan tyiꞌtyéevijtɨj tyej tyij tyuꞌtáchuiicaj:

¡ajta aꞌɨ́ɨn puéꞌeen ɨ tɨ jéetzeꞌ áꞌtyesiꞌreꞌ!

5Camu tyiꞌtɨ́j huɨɨreꞌ ɨ huaꞌ dioosijtyamuaꞌ ɨ séecan,

jiꞌnye ɨ Tavástaraꞌ pu jaatyátaahuacaꞌ ɨ tajapuá tɨ séejreꞌ.

6¡Tyámuaꞌ pu naa tyíꞌeen joꞌtɨj aꞌɨ́ɨn jáꞌsejreꞌ!

¡Aꞌɨ́ɨ pu séejreꞌ ɨ tɨ néijmiꞌi jɨn putyíꞌuurej ajta ɨ tɨ jɨn naa huaséꞌrin ɨ tyeyúujraꞌ!

7Siataꞌaj huatóotonyij ɨ Tavástaraꞌ jimi, tyeɨ́tyee siaj huacháatɨmee ɨ chájtaꞌnaj jitze;

siajta jáamuaꞌtyij ɨ tɨ jɨn néijmiꞌi putyíꞌuurej ajta ɨ tɨ jɨn naa huaséꞌrin,

8siataꞌaj jaatyátzaahuatyeꞌen ɨ Tavástaraꞌ aꞌyájna tɨꞌɨj jimi tyúuxɨeꞌveꞌ,

siajta tyuꞌtámuꞌvejritaj ɨ tyeyúujraꞌ tzajtaꞌ,

9siataꞌaj jaatyáanajche ɨ Tavástaraꞌ ɨ tyeyúujraꞌ tzajtaꞌ tɨ naa huaséꞌrin.

¡Micheꞌ néijmiꞌi ɨ tyeɨ́tyee ɨ maj aꞌyan huacháatɨmee ɨ cháanacaj japua jimi juviveej!

10Aꞌyaa xu tyihuoꞌtéꞌexaatyeꞌen tɨjɨn: “¡Aꞌɨ́jna ɨ Tavástaraꞌ pu Rey puéꞌeen!”

Aꞌɨ́ɨ pu tyámuaꞌ jáaruuj ɨ cháanacaj, tɨꞌij quee táhuaanyeꞌen,

aꞌɨ́ɨ pu néijmiꞌcaa ɨ tyeɨ́tyee juxaꞌaj naꞌaj tyíꞌijtyeꞌ.

11¡Micheꞌ huatóotyamuaꞌveꞌen ɨ tajapuá ajta ɨ cháanacaj!

¡Cheꞌ huatyahuáatɨraꞌnyij ɨ jájrij ajta néijmiꞌi aꞌɨ́j tɨ jitze tyíꞌsejreꞌ!

12¡Cheꞌ huatóotyamuaꞌveꞌen ɨ ɨtzitáj ajta néijmiꞌi ɨ tɨ jitzán tyíꞌsejreꞌ!

¡Micheꞌ jutyamuaꞌveꞌej huajíjhua ɨ cɨyéj tɨ tyúꞌuu,

13aꞌɨ́jcɨ jimi ɨ Tavástaraꞌ, tɨ yajaꞌvéꞌmej!

¡Jee, aꞌɨ́ɨ pu yajaꞌvéꞌmej tɨꞌij tyuꞌtaꞌíjtaj ɨ cháanacaj japua,

ajta tyuꞌtaꞌíjtaj ɨ chájtaꞌnaj jitze yan tɨ séejreꞌ ɨ cháanacaj japua

aꞌɨ́jcɨ jɨmeꞌ ɨ tɨ xáꞌpuɨꞌ ajta ɨ tɨ jɨꞌréꞌcan jɨmeꞌ!