Search form

SALMOS 99

Ɨ Tavástaraꞌ pu Rey jɨn tyiꞌtyéjvee tɨ jéetzeꞌ vaꞌcán jɨn antyúumuaꞌreej

1¡Tavástaraꞌ pu Rey puéꞌeen!

¡Ɨ maj tajapuá tyíꞌhuɨɨreꞌ mu tyámuaꞌ tyéꞌchaꞌɨj aꞌɨ́jcɨ ɨ tɨ jitzán acájca!

Aꞌɨ́ɨmaj mu ɨ tyeɨ́tyee juvivej, ajta néijmiꞌi ɨ cháanacaj.

2Tavástaraꞌ pu vaꞌcán jɨn tyiꞌtyéjvee aꞌájna a Sión;

Tavástaraꞌ pu néijmiꞌcaa japua séejreꞌ.

3Cheꞌ tyámuaꞌ eenyeꞌ ɨ tɨ jɨn ántyapuaj, vaꞌcán pu jɨn séejreꞌ ajta tzáahuatyiꞌreꞌ;

¡Dios pu néijmiꞌi jɨn tyámuaꞌ een!

4Muáaj paj Rey puéꞌeen ɨ tɨ néijmiꞌi putyíꞌuurej ajta aꞌɨ́j xɨeꞌveꞌ ɨ tɨ xáꞌpuɨꞌ;

muáaj paj néijmiꞌcaa juxaꞌaj panaꞌaj tyuꞌtyájtoo.

Pajta tyámuaꞌ naa tyihuóꞌixaaj ɨ yójmuaꞌmuaꞌ aꞌɨ́jcɨ ɨ Jacob

aꞌɨ́jcɨ ɨ tɨ xáꞌpuɨꞌ ajta ɨ tɨ huatóojeꞌyej.

5¡Setyuꞌtatyójtziꞌreꞌ ɨ Tavástaraꞌ, aꞌɨ́jcɨ ɨ taj Dios,

siajta tyítunutaxɨꞌɨn joꞌtɨj aꞌɨ́ɨn jaꞌraꞌɨ́ɨcajmee!

¡Dios pu néijmiꞌi jɨn tyámuaꞌ een!

6Aꞌɨ́jna ɨ Moisés ajta ɨ Aarón aꞌɨ́ɨ mu puaríij jɨn tyityetyuꞌuj;

Samuel pu ajta huaꞌ tzajtaꞌ ajoꞌtyávaacaꞌaj ɨ maj tyaatatyójtziꞌrej.

Tavástaraꞌ pu huoꞌtyáhuɨɨ aꞌɨ́ɨjma

matɨꞌɨj aꞌɨ́ɨmaj jaatáhuaviiriꞌ tɨ huoꞌtáhuɨɨreꞌen.

7Dios pu huaꞌ jamuán tyuꞌxájtacaꞌ

aꞌɨ́jcɨ jitze ɨ jéetɨrij tɨ huaꞌ japua ajaꞌcávaꞌcaꞌaj,

majta aꞌɨ́ɨmaj aꞌyaa mu huarɨ́j tɨꞌɨj tyihuoꞌtaꞌíj

majta mu jaꞌráꞌastej ɨ nyúucarij tɨ huaꞌ jimi jaatyájtoo.

8Tavástaraꞌ, taj Dios, ¡muáaj paj tyihuáꞌixaatyaꞌcaꞌaj!

Muáaj paj huaꞌ jimi aꞌɨ́ɨn puéꞌeenyeꞌej ɨ Dios tɨ tyúꞌuunyiꞌ,

ajta aꞌyaa paj chaꞌtaj panaꞌaj puéjtzij tyihuoꞌtáꞌ tyiꞌtɨ́j maj jɨn jeꞌej puaꞌaj huarɨ́j.

9Setyuꞌtatyójtziꞌreꞌ ɨ Tavástaraꞌ taj Dios,

¡siajta jimi tyítunutaxɨꞌɨn aꞌájna ɨ jɨríj jitze tɨ tyámuaꞌ een!

¡Aꞌɨ́jna ɨ taj Dios, ajta Tavástaraꞌ, néijmiꞌi pu jɨn tyámuaꞌ een!