Search form

Luk 5

Galow an Kynsa Dyskyblon

Mat 4:18-22; Mark 1:16-20

1Y hwarva, pan esa an routh ow kwaska warnodho dhe glewes ger Duw, yth esa ow sevel ryb lynn Gennesaret, 2hag ev a welas dew worhel ow sevel ryb an lynn; mes an byskadoryon galsa yn-mes anedha hag yth esons ow kolghi an roesow. 3Ev eth a-bervedh yn onan a'n gorholyon, esa dhe Simon, ha govynn orto pellhe nebes dhiworth an lann. Ena ev a esedhas, ha dyski an routhow a-dhiworth an gorhel. 4Ha pan hedhis kewsel, yn-medh ev dhe Simon, ‘Pellha y'n downvor, ha tewlewgh agas roesow rag pyskessa.’ 5Ha Simon a worthybis ow leverel, ‘Mester, ni re lavuryas dres oll an nos heb kavoes travyth; mes herwydh dha er my a dewl an roesow.’ 6Ha wosa gul henna, i a geas niver meur a bysk, may tallathas aga roesow bos terrys. 7Hag i a wrug sinys dh'aga heskowetha y'n gorhel arall a dhos dhe weres dhedha; ytho i a dheuth ha lenwel an dhew worhel, may tallethons sedhi. 8Simon Peder pan y'n gwelas a goedhas orth dewlin Yesu ow leverel, ‘Diberth dhiworthiv, rag gour peghus ov, A Arloedh.’ 9Rag marth a'n jeva, ev ha peub esa ganso, a'n myns a bysk a gavsons, 10ha keffrys Jamys ha Yowann, mebyon Zebede, o keskowetha dhe Simon. Ha Yesu a leveris dhe Simon, ‘Na borth own; alemma rag ty a vydh ow kachya tus.’ 11Hag ow tri aga gorholyon dhe'n tir i a asas pup-tra ha'y holya.

Glanhe Klavorek

Mat 8:1-4; Mark 1:40-45

12Hag y hwarva, pan esa yn onan a'n trevow, awotta gour leun a lovryjyon. Ow kweles Yesu, ev a goedhas war y fas ha'y bysi ow leverel, ‘Arloedh, mar mynnydh ty a yll ow glanhe.’ 13Hag owth ystynn y leuv ev a'n tochyas ow leverel, ‘My a vynn, bydh glanhes.’ Hag a-dhesempis an lovryjyon a'n gasas. 14Hag ev a worhemmynnis dhodho, na lavarra dhe dhenvyth; ‘Mes ke dhe omdhiskwedhes dha honan dhe'n oferyas, ha gwra offrynn rag dha lanheans kepar dell worhemmynnis Moyses, yn dustuni dhedha.’ 15Mes yth esa an son anodho ow mos a-dro moy ha moy, ha routhow bras a dho war-barth rag y glewes, ha may fens yaghhes+ dhiworth aga klevesow. 16Mes ev a vedha owth omdenna dhe dylleryow ynyal, ha pysi.

Yaghheans Den Palsyes

Mat 9:1-8; Mark 2:1-12

17Hag y hwarva yn onan a'n dydhyow na, hag ev ow tyski, yth esa Fariseow ha dyskadoryon an lagha a'ga esedh ena, devedhys a bub tre a Alile, hag a Yudi, hag a Yerusalem; hag yth esa galloes an Arloedh ganso dhe yaghhe.+ 18Hag awotta, gwer ow toen den war ravath, neb o palsyes, hag i a hwila y dhri a-ji ha'y worra a-ragdho. 19Ha rag na gavsons fordh dh'y dhri a-ji drefenn an routh, i a yskynnas dhe benn an chi ha'y iselhe der an prileghennow gans an gravath y'n kres a-dherag Yesu. 20Hag ow kweles aga fydh ev a leveris, ‘Den, dha beghosow yw gevys dhis.’ 21Ha'n skribys ha'n Fariseow a dhallathas resna, ow leverel, ‘Piw yw hemma, ow kewsel blasfemyow? Piw a yll gava peghosow saw unnsel Duw?’ 22Mes Yesu owth aswonn aga frederow a worthybis ha leverel dhedha, ‘Pandr'a resnowgh yn agas kolonn? 23Pyneyl yw esya, leverel “Bedhes dha beghosow gevys”, po leverel “Sav ha kerdh”? 24Mes may hwodhvowgh bos galloes dhe Vab an den war an nor dhe ava peghosow’ (ev a leveris dhe'n palsi) ‘my a lever dhis, sav, drehav dha ravath ha ke dhe'th tre.’ 25Ha hware ev a sevis a-ragdha, ha drehevel an dra re bia ow krowedha warnodho, ha mos dh'y dre, ow kormel Duw. 26Ha pubonan a's teva marth, hag yth esons ow kormel Duw ha lenwys a own vons i, ow leverel, ‘Ni re welas marthusyon hedhyw.’

Galow Levi

Mat 9:9-13; Mark 2:13-17

27Ha wosa hemma ev eth yn-kerdh ha gweles toller, Levi y hanow, esedhys orth an dollva, hag ev a leveris dhodho, ‘Hol vy.’ 28Hag ev a asas pup-tra, hag a sevis yn-bann ha'y holya.

29Ha Levi a wrug kevywi bras ragdho yn y ji, hag yth esa routh veur a dolloryon hag erell esedhys orth an voes gansa. 30Ha'n Fariseow ha'ga skribys a grodhvola war y dhyskyblon ow leverel, ‘Prag y tebrowgh hag eva gans tolloryon ha peghadoryon?’ 31Ha Yesu a worthybis ow leverel dhedha, ‘Nyns eus edhomm a vedhek dhe dus yagh, saw dhe glevyon; 32ny dheuvev dhe elwel re wiryon saw peghadoryon dhe edrek.’

An Govynn a-dro dhe Benys

Mat 9:14-17; Mark 2:18-22

33I a leveris dhodho, ‘Dyskyblon Yowann menowgh a wra penys owth hepkorr dybri, hag ow kul pysadow, ha keffrys dyskyblon an Fariseow, mes dha dhyskyblon jy a dheber hag eva.’ 34Yesu a leveris dhedha, ‘A yllowgh gul dhe gowetha an gour pries gul penys ha'n gour pries hwath gansa? 35An dydhyow a dheu, pan vydh an gour pries kemmerys dhiworta, hag ena i a wra penys y'n dydhyow na.’ 36Hag ynwedh ev a leveris parabolenn dhedha: ‘Denvyth ny skward klout dhiworth pows nowydh ha'y wria war bows koth, poken ev a skward an bows nowydh, ha ny akord klout an bows nowydh gans an bows koth. 37Ha ny worr denvyth gwin nowydh yn gwingreghyn koth; poken an gwin nowydh a derr an kreghyn hag a vydh skoellys, ha'n kreghyn a vydh distruys; 38mes gwin nowydh yw gorrys yn kreghyn nowydh.+ 39Ha ny vynn denvyth a yv gwin koth eva gwin nowydh; rag hware+ ev a lever, “Gwell+ yw an gwin koth.” ’

An Bibel Kernewek 2018

© Kesva an Taves Kernewek 2004, 2018

© Cornish Language Board 2004, 2018

More Info | Version Index